Harmagedon es de latsta Kjrich tweschen menschelje Rejierungen un Gott. Dise Rejierungen un dee äare Helpa stalen sikj mau rajcht nu aul jäajen Gott doaderch, daut see opp kjeene Wajch wellen Gott siene Rejierunk unjadon sennen (Psalm 2:2). De Kjrich von Harmagedon woat met de menschelje Rejierungen een Enj moaken (Daniel 2:44).

 Daut Wuat “Harmagedon” kjemt bloos eemol enne Bibel väa un daut es en Openboarunk 16:16 (PB). Dise Profezeiunk en Openboarunk wiest, daut dis Kjrich opp dee Städ sennen woat, “dee opp hebräisch Harmagedon heet”. “De Kjennichs opp de Ieed äwa de gaunze Welt” woaren sikj to “dän aulmajchtjen Gott sien grooten Dach toom Kjrich … saumlen” (Openboarunk 16:14, PB).

 Wäa woat dän Kjrich von Harmagedon derchfieren? Jesus Christus woat de Leida sennen von eene himlische Armee, waut disen Kjrich jäajen Gott siene Fiend jewennen woat (Openboarunk 19:11-16, 19-21). Doa woaren aule Fiend met en sennen, waut sikj jäajen Gott stalen un am nich achten (Hesekiel 39:7).

 Woat Harmagedon bloos opp eene jewesse Städ oppe Ieed derchjefieet woaren? Nä, daut woat nich bloos opp eene jewesse Städ sennen. De Kjrich von Harmagedon woat äwa de gaunze Welt sennen (Jeremia 25:32-34; Hesekiel 39:17-20).

 Harmagedon meent: “Boajch von Megiddo”. Eenjemol woat doa uk jeschräwen “Har-Magedon” (opp Hebräisch Har Meghiddṓn). Megiddo wia mol eene Staut en daut ieeschtemmasche Israel. Soo aus se sajen, worden doa foaken wichtje Kjrieej derchjefieet. Eenje von dee sent mau rajcht enne Bibel oppjeschräwen (Rechta 5:19-20; 2. Kjennichs 9:27; 23:29). Oba Harmagedon kaun nich een Kjrich sennen en daut ieeschtemmasche Megiddo. Woo weet wie daut? Daut jeft doa eenen grooten Boajch un dee Jäajent wudd nich groot jenuach sennen, daut aul dee, waut jäajen Gott kjamfen, doa wudden Rum haben. Wua woat de Kjrich von Harmagedon dan sennen? Dee woat oppe gaunze Welt sennen. De polietische Machten woaren sikj toopstonen toom jäajen Gott siene Rejierunk kjamfen.

 Woo woat daut en dän Kjrich von Harmagedon sennen? Wie weeten nich krakjt, woo Gott siene Macht en disen Kjrich brucken woat. Oba hee kaun wada krakjt dautselwje brucken, waut hee uk enne Vegonenheit jebrukt haft, soo aus Hoagel, Ieedbäben, Äwaschwamunk, Fia un Schwäwelblitt, Blizt un Krankheiten (Hiob 38:22-23; Hesekiel 38:19, 22; Habakuk 3:10-11; Sacharja 14:12). Wäajen doa soon derchenaunda sennen woat, woaren eenje von Gott siene Jäajna sikj secha uk unjarenaunda dootmoaken. Oba dee woaren daut motten enseenen, daut et Gott es, waut jäajen an schauft (Hesekiel 38:21, 23; Sacharja 14:13).

 Woat en Harmagedon de Welt to Enj gonen? Daut woat nich daut Enj sennen von dän Ieedbaul, wiels Gott haft de Ieed doatoo jemoakt, daut de Menschen doa sellen fa emma bowen läwen (Psalm 37:29; 96:10; Liera 1:4). Enne Städ de Menschheit gaunz uttoroden, woat Harmagedon de Menschheit raden, wiels daut sajcht, daut doa eene groote Häad von Gott siene Deena äwaläwen woat (Openboarunk 7:9, 14; Psalm 37:34).

 Un dan uk noch, wan de Schreft von daut Wuat “Welt” rät, dan sent doa foaken de schlajchte Menschen met jemeent, waut sikj jäajen Gott stalen (1. Johanes 2:15-17). En dän Senn wudd Harmagedon “daut Enj von dise … (Welt)” sennen (Matäus 24:3, JHF).

 Wanea woat de Kjrich von Harmagedon sennen? Jesus räd von “een Älent”, ooda eene groote Triebsaul, waut jroz ver dän Kjrich von Harmagedon sennen wudd. Von dee Tiet säd Jesus: “Wanea dee Dach ooda dee Stund sennen woat, weet kjeena, nich emol de Enjel em Himmel, uk nich de Sän. Daut weet bloos de Voda” (Matäus 24:21, 36, PB). Waut de Schreft oba doch sajcht, es, daut de Kjrich von Harmagedon en dee Tiet sennen woat, wua Jesus aul aus Kjennich em Himmel rejieet, un dee Tiet funk aune 1914 aun (Matäus 24:37-39).