En daut latste Buak von de Schreft rät daut von een willet Tia, waut utem Mäa rutkjemt un säwen Kjap un tieen Hieena haft. Un dit Tia haft daut Numma, ooda dän Nomen, 666 (Openboarunk 13:1, 17-18). Dit Tia es een Jlikjnis fa de Rejierungen oppe gaunze Welt, waut äwa “aule Volkjsstam un Sproaken un Velkja” rejieren (Openboarunk 13:7, De Plautdietsche Bibel). Un de Nomen 666 jeft auntovestonen, daut aul dise Rejierungen fa Gott to beseenen nuscht enhoolen. Woo weet wie daut?

  Daut es een Nomen, waut eene Bediedunk haft. Wan Gott wäm eenen Nomen oppjeft, dan haft daut emma eene Bediedunk. Waut deed Gott biejlikj, aus hee en de Bibeltiet eenen Maun vespruak, daut hee am “een Voda äwa väle Velkja” moaken wudd? Hee nand am nich mea Abram, waut “Jeieeda Voda” bediet, oba Abraham, waut “Voda äwa väle” bediet (1. Mose 17:5, Footnooten, De Plautdietsche Bibel). Krakjt soo haud Gott uk goode Uasoak, daut hee daut wille Tia dän Nomen 666 oppjeef. Dis Nomen jeft auntovestonen, woo dit Tia es.

  Daut Numma 6 es een Jlikjnis fa waut onvolkomnet. En de Schreft woaren Nummasch foaken aus Jlikjnis jebrukt. Daut Numma 7 es jeweenlich een Bilt fa eene Sach, waut volstendich ooda volkomen es. Un 6 es je eent weinja aus 7. Doawäajen jeft daut Numma 6 foaken auntovestonen, daut eene Sach fa Gott to beseenen onvolkomen ooda nich volstendich es. Un foaken haft dit Numma uk met Gott siene Fiend to doonen (1. Chronik 20:6).

  Daut Numma 6 woat dreemol wadaholt toom waut stoakja moaken. Eenjemol sajcht de Schreft waut dreemol toom waut gaunz dietlich moaken (Openboarunk 4:8; 8:13). Derch daut Numma 666 well Gott daut gaunz dietlich moaken, daut de menschelje Rejierungen fa am to beseenen verheipts nuscht enhoolen. Dee haben daut nich kunt bat doa brinjen, daut et oppe Welt opp iernst Fräd un Sechaheit jeef. Soont kaun bloos Gott derch sien Kjennichrikj doonen.

Daut Moltieekjen

 De Schreft sajcht, daut de Menschen daut Moltieekjen, ooda “daut Tia sien Tieekjen”, kjrieen, wiels dee daut wille Tia bewundren un daut mau rajcht aunbäden (Openboarunk 13:3-4; 16:2, De Plautdietsche Bibel). Woo bäden dee daut aun? Doaderch, daut dee äa Launt ooda de Laundestieekjens ooda de Soldoten von äa Launt veieren ooda erhäwen. En daut Buak The Encyclopedia of Religion sajcht daut: “Eent von daut, waut de Menschen en de vondoagsche Tiet daut dolste aunbäden, ooda veieren, es dee äa Heimatlaunt.” a

 Woo kjricht eena daut Moltieekjen oppe Haunt ooda aum Stiern? (Openboarunk 13:16). Aus Gott de Israeliten siene Jebooten jeef, säd hee to dee, waut see met dee doonen sullen: “Binjt dee aun de Haunt opp een Zadel, un aum Stiern en een Henjsel” (5. Mose 11:18, De Plautdietsche Bibel). Waut meend daut? De Israeliten sullen nich opp iernst een Tieekjen oppe Haunt ooda aum Stiern haben. Oba dee sullen bie aules, waut see deeden un dochten, Gott siene Jebooten em Denkj hoolen un dee nokomen. Krakjt soo es daut Moltieekjen uk nich opp iernst een Tieekjen met daut Numma 666, waut eena biejlikj irjentwua aum Kjarpa haft. Daut es een Jlikjnis doafäa, daut eena sikj gaunz un goa von de Rejierungen en dise Welt beharschen lat. Un dit Tieekjen jeft uk auntovestonen, daut eena sikj jäajen Gott stalt (Openboarunk 14:9-10; 19:19-21).