KAPITEL 37

Sull ekj mie deepen loten?

Tieekjen rajcht ooda orrajcht aun:

Toom Jehova deenen, mott eena sikj deepen loten.

□ Rajcht

□ Orrajcht

De Doop es daut mieeschte doatoo toom die halpen, nich to sindjen.

□ Rajcht

□ Orrajcht

Derch de Doop es daut mäajlich, daut du kaust jerat woaren.

□ Rajcht

□ Orrajcht

Wan du nich jedeept best, dan hast du kjeene Veauntwuatunk ver Gott fa daut, waut du deist.

□ Rajcht

□ Orrajcht

Wan diene Frind sikj deepen loten, meent daut, daut du uk aul soo wiet best.

□ Rajcht

□ Orrajcht

WAN du Gott jehorchen deist un proofst, sien Frint to sennen un met aundre von dienen Gloowen rätst, dan es daut gaunz jeweenlich, daut du doaräwa nodenkjst, die deepen to loten. Oba woo weetst du daut, aus du aul reed best? Toom die halpen, dise Froag to beauntwuaten, well wie daut derchgonen, waut hia bowen oppjerieecht es.

● Toom Jehova deenen, mott eena sikj deepen loten.

Rajcht. Jesus säd daut siene Jinja sikj musten deepen loten (Matäus 28:19-20). Mau rajcht Jesus leet sikj deepen. Toom Christus nofoljen motst du die deepen loten, oba ieescht motst du vestonen, waut daut bediet, dise Entscheidunk to moaken un daut uk opp iernst wellen.

● De Doop es daut mieeschte doatoo toom die halpen, nich to sindjen.

Orrajcht. De Doop wiest aundre, daut du die Jehova en een Jebäd hanjejäft hast un vesproaken hast, am to deenen. Dit Vespräakjen es oba nich soo aus bie irjenteenen Kontrakt, wua eena vesprakjt, sikj aun jewesset to hoolen, wan eenem daut uk nich daut dolste jefelt. Wan eena sikj Jehova hanjeft, dan es daut aundasch: Eena deit daut, wiels eena daut well nokomen, waut hee velangt.

● Derch de Doop es daut mäajlich, daut du kaust jerat woaren.

Rajcht. De Schreft sajcht, daut de Doop wichtich es fa de Radunk (1. Petrus 3:21, JHF). Daut meent oba nich, daut eena sikj derch de Doop eene Vesechrunk kjaft toom jerat woaren. Eena lat sikj deepen, wäajen eena Jehova leeft un am fa emma deenen well met sien gaunzet Hoat (Markus 12:29-30).

● Wan du nich jedeept best, dan hast du kjeene Veauntwuatunk ver Gott fa daut, waut du deist.

Orrajcht. Jakobus 4:17 (PB) sajcht: “Wäa doa weet, goodet to doonen, un deit daut nich, fa dän es daut Sind” – endoont aus dee jedeept es ooda nich. Soo, wan du weetst, waut rajcht es un oolt jenuach best toom weeten, waut du met dien Läwen doonen west, dan wudd daut goot sennen, daut du met diene Elren doaräwa rädsd ooda met eenen erfoarnen Brooda ooda eene Sesta. Dee woaren die kjennen halpen, die fa de Doop reedtomoaken.

● Wan diene Frind sikj deepen loten, meent daut, daut du uk aul soo wiet best.

Orrajcht. Die deepen to loten mott diene ieejne Entscheidunk sennen (Psalm 110:3). Du wurscht die bloos dan sellen deepen loten, wan du daut gaunz vestonen kaust, waut daut bediet, eent von Jehova siene Zeijen to sennen. Un du motst die ieescht secha sennen, daut du reed best, dise Veauntwuatunk to äwanämen (Liera 5:3-4).

De Doop endat dien Läwen

Derch de Doop woascht du en dien Läwen väl goodet beläwen. Oba daut es uk eene iernste Veauntwuatunk, daut Vespräakjen to hoolen, waut du Jehova jejäft hast.

Best du reed, die Jehova hantojäwen? Wan daut soo es, dan kaust du schaftich sennen, wiels du woascht Jehova deenen un derch dien Läwen wiesen, daut du am leefst (Matäus 22:36-37).

WICHTJA BIBELVARSCH

Jie sellen “junen Kjarpa Gott … jäwen aus een heiljet, läwendjet Opfa, daut Gott aunnämen kaun. Lot daut jun jeistlicha Gottesdeenst sennen” (Reema 12:1, PB)

IEDEE

Diene Elren kjennen die halpen, wäm enne Vesaumlunk to finjen, waut die halpen kaun, em jeisteljen verauntokomen (Aposteljeschicht 16:1-3).

HAST DU DAUT JEWIST . . . ?

Sikj deepen loten es een sea wichtjet Poat von daut “Tieekjen”, waut doa needich es toom jerat woaren (Hesekiel 9:4-6, PB).

WAUT EKJ DOONEN WELL!

Toom soo wiet komen, daut ekj mie kaun deepen loten, well ekj mie dise Lieren von de Schreft dolla unjastonen: ․․․․․

Waut ekj miene Elren äwa dit wudd wellen froagen, es: ․․․․․

WAUT JLEEFST DU?

● Wuarom es de Doop soo waut iernstet?

● Waut kunn junge Menschen bat doa brinjen, sikj too schwind deepen to loten?

● Wäajens waut wellen eenje junge Menschen sikj nich deepen loten?

[Takjst]

‘‘Mie deepen to loten holp mie, goode Entscheidungen to moaken un nich soont to doonen, waut mie wudd kjennen schoden.’’ (Holly)

[Kausten]

Waut eena äwa de Doop foaken weeten well

Waut stalt de Doop väa? De Doop bediet, daut Jehova sienen Wellen to doonen von nu aun fa eenem wichtja es, aus daut to doonen, waut eenem jankat.

Waut meent daut, sikj Jehova hantojäwen? Daut meent, daut du Jehova vesprakjst, daut du am woascht dien Läwen jäwen un am deenen (Matäus 16:24). Ver diene Doop wurscht du sellen to Jehova bäden un am sajen, daut du von nu aun am deenen west.

Waut motst du doonen, ea du die kaust deepen loten? Du wurscht sellen daut jehorchen, waut Gott enne Schreft sajcht un to aundre uk von dienen Gloowen räden. Un du wurscht sellen doaropp schaufen, Frind to woaren met Gott. Woo kaun eena daut? Eena mott to am bäden un de Schreft studieren. Du wurscht Jehova deenen sellen, wäajen du daut selfst west un nich wäajen aundre die bemotten wellen.

Met waut fa een Ella saul eena sikj deepen loten? Daut Ella es nich daut wichtichste. Oba eena mott oolt jenuach sennen toom daut vestonen, waut daut bediet, Jehova eenem sien gaunzet Läwen to jäwen.

Waut, wan du die west deepen loten, oba diene Elren sajen, du saust noch wachten? Veleicht wellen dee haben, daut du mea Erfoarunk kjrichst em Deenst fa Jehova. Horch no dee un nutz de Tiet goot ut toom Jehova noch noda komen (1. Samuel 2:26).

[Kausten]

Oabeitsblaut

west du die deepen loten?

Läs die aul dit hia unjen derch toom seenen, aus du aul boolt reed best, die deepen to loten. Ea du oppschrifst, waut du doaräwa denkjst, läs de Bibelvarzhen.

Bie waut wiest du nu aul, daut du Jehova vetrust? (Psalm 71:5). ․․․․․

Woo hast du aul bewäsen, daut du daut vesteist, waut rajcht un orrajcht es? (Hebräa 5:14). ․․․․․

Woo foaken deist du bäden? ․․․․․

Äwa waut bätst du un woo wiesen diene Jebäda, daut du Jehova leefst? (Psalm 17:6). ․․․․․

Moak die eene List met Sachen, waut du doonen west toom diene Jebäda noch vebätren. ․․․․․

Woo foaken deist du fa die selfst de Schreft studieren? (Josua 1:8).

Äwa waut deist du studieren? ․․․․․

Moak die eene List met Sachen, waut du doonen west toom dien Bibelstudium noch vebätren. ․․․․․

Strenjst du die em Prädichtdeenst aun? (Biejlikj, kaust du aundre de Hauptlieren von de Schreft utlajen? Deist du Wadabesuchs moaken, wan doa wäa intressieet wia? Proofst du, met wäm een Bibelstudium auntofangen?)

□ Jo □ Nä

Deist du prädjen, mau rajcht wan diene Elren uk nich kjennen? (Aposteljeschicht 5:42).

□ Jo □ Nä

Moak die eene List met Sachen, waut du doonen west toom dienen Prädichtdeenst noch vebätren (2. Timotäus 2:15). ․․․․․

Wankst du pinkjlich no de Toopkomes ooda mau wietleftich? (Hebräa 10:25). ․․․․․

Woo moakst du bie de Toopkomes met?

Wan diene Elren die de Frieheit jäwen, wankst du no de Toopkomes, wan dee uk nich doonen?

□ Jo □ Nä

Kaust du sajen, daut die daut eene Freid es, Gott sienen Wellen to doonen? (Psalm 40:9).

□ Jo □ Nä

Haben aundre junge Menschen die mol prooft mettorieten, waut orrajchtet to doonen un du deetst daut nich? (Reema 12:2). ․․․․․

Waut west du doonen, om daut diene Leew fa Jehova stoakj blift? (Judas 20-21). ․․․․․

Wurscht du Jehova wieda deenen, mau rajcht wan diene Elren un Frind uk opphieeden? (Matäus 10:36-37).

□ Jo □ Nä

[Bilt]

Sikj deepen to loten es eene iernste Entscheidunk, waut eena goot äwalajen saul, krakjt soo aus wan eena sikj befrieen well