KAPITEL 35

Woo kaun ekj Gott sien Frint woaren?

Jeremy beläwd waut sea truajet un dan wort hee en, woo väl wieet daut wia, daut hee kunn met Gott Frind sennen. Hee sajcht: “Aus ekj 12 Joa wia, veleet miene Pape de Famielje. Ekj weet noch, woo ekj eemol de Nacht em Bad lieech un prachad Jehova, daut miene Pape wada sull trigjkomen.”

Jeremy funk aun enne Bibel to läsen, wäajen hee soo vetwiewelt wia. Am jinkj Psalm 10:14 sea to Hoaten. Doa sajcht daut von Jehova, daut de Weisenkjinja Jehova vetruen kjennen un daut hee dee jieren halpen well. Jeremy sajcht noch: “Ekj feeld mie werkjlich soo, aus wan Jehova to mie vetald un to mie säd, daut hee wull mien Voda sennen un hee wull mie uk halpen. Wäa kunn een bätra Voda sennen aus Jehova?”

DERCH de Schreft lat Jehova uk die weeten, daut hee well dien Frint sennen, wäajen daut sajcht je: “Nodat junt no Gott, dan woat hee uk dicht no junt komen” (Jakobus 4:8, PB). Denkj bloos mol han, Jehova lot die en, sien Frint to sennen. Un mau rajcht dan, wan wie am uk nich seenen kjennen un hee soo grulich sea groot es.

Oba daut du kaust met Gott Frind sennen, motst du dien Poat doonen. Daut es krakjt soo aus met eene Plaunt, waut eena besorjen mott, daut dee waussen kaun. Dee mott eena pinkjlich jeeten un doano sennen, daut dee uk opp de rajchte Städ es. Krakjt soo mott eena waut doafäa doonen, wan eena well met Gott Frind sennen. Oba waut krakjt mott eena doonen?

De Bibel läsen un studieren

Met eenen Frint vetalt eena sikj waut. Eena horcht no dän un dee horcht no eenem. Un krakjt soo es daut, wan wie met Gott Frind sent. Wan wie de Schreft läsen un studieren, horch wie no am (Psalm 1:2-3).

Veleicht intressieet die daut nich soo sea, de Bibel to läsen un to studieren. Veleicht jeit die daut uk soo aus eenje Jugentliche. Dee jleichen dolla Mowies to kjikjen, Gäms to spälen un met Frind toop to sennen. Oba wan du west met Gott Frind sennen, es daut onbedinjt needich, daut du am toohorchen deist. Un daut kaust du, wan du de Bibel läsen deist.

Weetst waut? Du kaust de Bibel soo läsen, daut die daut nich enoolent woat un soogoa sea scheen jeit. Un mau rajcht dan, wan du nich soo sea jleichst to läsen. Daut ieeschte motst du die Tiet nämen doatoo. Eene Mejal, waut Lais heet, sajcht: “Ekj hab mie een Program jemoakt toom de Bibel läsen. Ekj läs jieda zemorjes daut ieeschte een Kapitel en de Bibel.” Maria, waut 15 Joa es, deit daut wada en eene aundre Tiet. See sajcht: “Ekj doo jieda zeowes verem schlopen gonen een Stootje de Bibel läsen.”

Besee die ieescht mol  dän Kausten “Forsch de Schreft deepa no”, ea du die een Program moakst fa daut Bibelläsen. Schriew die daut opp, wanea du woascht eene haulwe Stund em Dach Tiet haben toom en Gott sien Wuat läsen.

․․․․․

Oba de Tiet to nämen toom de Bibel läsen, es noch mol de Aunfank. Wan du de Schreft läst, woascht du enwoaren, daut nich aules soo leicht to vestonen es. Veleicht jeit die daut uk soo aus Jezreel, waut 11 Joa es. Hee sajcht: “Jewesset es en de Schreft nich soo leicht to vestonen. Un veleicht uk nich soo intressaunt.” Woa nich mootloos, wan die daut uk soo jeit. Wäajen wan du de Bibel läst, es daut soo, aus wan du met dienen Frint Jehova toop best un am toohorchst. Du kaust selfst entscheiden, aus daut Bibelläsen fa die scheen es un woo väl goodet du doavon kjrieen west.

Hia nich opp to bäden

Wan wie bäden, räd wie met Gott. Stal die mol väa, waut fa een gaunz besondret Jeschenkj daut es! Du kaust emma met Jehova vetalen. Un daut äwa Dach, uk de Nacht. Hee es emma reed fa die. Hee well soo jieren no daut horchen, waut du am sajchst. Daut es, wuarom de Schreft sajcht: “Lot Gott met bäden un prachren un dankscheen sajen aules weeten waut junt fält!” (Filippa 4:6, PB; von ons schroz jemoakt).

Soo aus dis Varsch wiest, kjenn wie met Jehova äwa veschiedenstet vetalen. Un doa sent uk onse Trubbels un Sorjen met en. Un uk daut, wuafäa du dankboa best. Bedankst du die nich uk aun diene Frind, wan dee waut fa die doonen? Un krakjt daut kaust du met Jehova doonen. Doa es kjeen Frind, waut mea fa die jedonen haft aus hee (Psalm 106:1).

Hia kaust du oppschriewen, wuafäa du Jehova dankboa best.

․․․․․

Doa woaren secha mol Tieden komen, wua du die sea bedrekjt feelst. Doawäajen sajcht daut en Psalm 55:23 (PB): “Laj diene Laust opp däm HARN; dee woat fa die sorjen un hee woat dän jerajchten niemols faulen loten.”

Hia kaust du oppschriewen, waut die bedrekjt un wuaräwa du wurscht jleichen to bäden.

․․․․․

Waut du met Jehova beläfst

Doa es noch waut wichtjet, waut du doonen kaust, daut du noch een jratra Frint met Jehova woascht. David schreef en Psalm 34:9 (PB): “Finjt eemol selfst ut, woo goot de HAR es.” Aus hee dän 34. Psalm schreef, haud hee jroz waut sea schlemmet derchjemoakt. Hee must von dän Kjennich Saul utkleiwen, waut am wull dootmoaken. Oba daut wia nich daut eensje schlemme, waut hee beläwd. Hee must uk noch en de Filista äa Launt nenranen, waut siene Fiend wieren. Un hee wort von dee bloos doawäajen nich dootjemoakt, wäajen hee sikj soo deed, daut hee nich gaunz kluak wia (1. Samuel 21:11-16).

David oba docht nich, daut hee daut doonen kunn, wäajen hee soo kluak wia. Hee jeef Jehova de Iea. En dänselwjen Psalm säd hee noch: “Ekj socht dän HARN un hee auntwuad mie, un hee rad mie ut aul miene Forcht” (Psalm 34:5, PB). Wäajen David daut selfst beläwd haud, kunn hee sajen: “Finjt eemol selfst ut, woo goot de HAR es.” *

Felt die irjentwaut en dien Läwen bie, wua du seenen kust, daut Jehova fa die sorjd? Wan die waut biefelt, dan schriew daut hia opp. Oba weetst waut? Daut brukt nich waut butajeweeneljet sennen. Daut kaun uk soont sennen, waut du jieda Dach beläfst un waut sikj veleicht soo späat, waut doa von veselfst es.

․․․․․

Veleicht hast du de Schreft derch diene Elren kjanen jelieet. Un daut es die secha sea toom gooden. Oba jieda eena mott sien Poat doonen, daut dee kaun een Frint met Gott sennen. Es Jehova aul dien Frint jeworden? Wan nich, dan kaust du daut en dit Kapitel seenen, woo eena daut doonen kaun. Jehova woat die sea doafäa beloonen. Wäajen de Bibel sajcht je: “Froacht, un junt woat jejäft woaren. Sieekjt, un jie woaren finjen” (Matäus 7:7, PB).

VON DIT KAUST DU EN DAUT IEESCHTE BUAK, KAPITEL 38 UN 39 MEA LÄSEN

EN DAUT NÄAKJSTE KAPITEL

Es die daut schwoa, met aundre äwa Gott to räden? Doa woascht du lieren, woo du met aundre kaust äwa dienen Gloowen räden.

[Footnoot]

WICHTJA BIBELVARSCH

“Jlekjlich sent dee, dee sikj doaräwa em kloaren sent, daut an daut jeistelje fält” (Matäus 5:3, NW).

WEETST WAUT?

Wan du vea Sieden dän Dach en de Bibel läst, best du dee en een Joa derch.

HAST DU DAUT JEWIST . . .?

Daut es to seenen, daut Jehova die trakjt, wäajen du dit Buak läst un proofst daut notokomen, waut et hia bennen sajcht (Johanes 6:44).

WAUT EKJ DOONEN WELL

Daut mie daut Bibelläsen mea halpt, well ekj ․․․․․

Daut ekj pinkjelja kom toom bäden, well ekj ․․․․․

Waut ekj miene Mame un Pape äwa dit noch froagen well, es ․․․․․

WAUT WURSCHT DU SAJEN?

● Waut kaun eena doonen, daut eenem daut Bibel studieren noch scheena jeit?

● Wuarom freit Jehova sikj äwa onse Jebäda, wan wie uk fälahauft sent?

● Woo kaun eena noch dolla von Hoaten bäden?

[Takjst]

Aus ekj jinja wia, bäd ekj meist emma om dautselwje. Nu vetal ekj Jehova jieda Dach, waut mie scheen jeit un uk waut mie schlajcht jeit. Ekj bäd am nu uk nich emma dautselwje, wäajen ekj nich jieda Dach dautselwje beläw’’ (Eve).

[Kausten/​Bilt]

 Forsch de Schreft deepa no

1. Sieekj die en de Bibel eene Jeschicht, waut du sea jleichst. Bäd Gott om Weisheit, daut hee die halpt, dee to vestonen.

2. Hab dien Kopp doabie. Nemm die Tiet. Lot die doa gaunz nenn. Läs daut soo, aus wan du wurscht doa sennen: Sitst du, waut doa jroz passieet? Hieescht du de Menschen äare Stemmen? Woo rikjt daut doa? Woo schmakjt daut Äten? Läs de Jeschicht soo, daut et läwendich fa die es!

3. Jrebbel doaräwa no, waut du jeläst hast. Du kaust die froagen:

● Wuarom leet Jehova dise Jeschicht oppschriewen?

● Woone Menschen well ekj nodoonen? Aus woone Menschen well ekj onbedinjt nich sennen?

● Waut lia ekj ut dise Jeschicht?

● Waut lieet mie dise Jeschicht äwa Jehova un uk woo hee daut haft?

4. Bäd nochmol to Jehova. Saj Jehova daut, waut du ut de Jeschicht jelieet hast un en waut du die vebätren west. Jehova haft die sien Wuat, de heilje Schreft, jejäft un bedank die bie am emma wada fa daut Jeschenkj!

[Bilt]

“Dien Wuat es eene Laump, mie dän Wajch to wiesen, uk een Licht, mie dän Stich to bedachen” (Psalm 119:105, PB).

[Kausten/​Bilt]

Daut ieeschte kjemt daut wichtichste

Hast du kjeene Tiet toom bäden? Ooda nich Tiet toom de Bibel läsen un waut nosieekjen? Daut licht foaken doaraun, daut eena daut wichtichste nich aun de ieeschte Städ stalt.

Proow daut mol: Doo mol eenje groote Steena en eenen Ama nenn. Un dan schedd dän voll Saunt. Nu hast du dän Ama voll Steena un Saunt.

Nu moak dän ladich un doo daut jroz omjedreit. Doo nu ieescht dän Saunt doa nenn un dan de Steena. Kaun daut doa nenn? Daut kaun doa nich nenn, wäajen du dän Saunt daut ieeschte doa nendeetst.

Waut lia wie ut dit? De Bibel sajcht, wie sellen rutfinjen, “waut daut aulabaste [wichtichste] es” (Filippa 1:10, PB). Wan wie ons fa Tietvedrief (soo aus de Saunt) daut ieeschte Tiet nämen, dan woa wie nich mea Tiet haben fa daut, waut wichtja es, daut jeistelje (de groote Steena). Oba wan wie daut soo doonen, aus de Schreft daut sajcht, dan hab wie Tiet fa beides, fa daut jeistelje un fa Tietvedrief. Daut licht bloos doaraun, waut du daut ieeschte en dienen Ama nendeist.

[Bilt]

Krakjt soo aus eena eene Plaunt besorjen mott, daut dee waust, soo mott wie uk waut doonen, daut wie kjennen met Gott Frind sennen.