PAULUS prädijd sea flietich de goode Bootschoft. Dis Apostel, waut ieescht wia een Jäajna jewast, haud nu selfst väle Jäajna. Hee muak miere Prädichtreisen un wort nich meed, de Menschen wiet un breet von daut Kjennichrikj to vetalen, wuaderch Gott sien Väanämen fa de Menschen erfellen woat.

Opp siene ieeschte Prädichtreis heeld Paulus en Liestra eenen Maun, waut von kjlien aun wia jelämt wast. De Menschen jleewden, Paulus un dän sien Poatna Barnabas wieren Jetta, un wullen dee soogoa Opfa brinjen. Oba Paulus un Barnabas kunnen dee noch afens doavon aufhoolen. Lota leeten oba deeselwje Menschen sikj von Paulus siene Jäajna doatoo brinjen, dän to steenjen. Oba Paulus äwaläwd daut un wankt lota wada trigj un spruak de Jinja doa Moot too.

Eenje judische Christen jleewden, de nichjudische Christen musten jewesse Jesazen hoolen, waut Gott derch Moses jejäft haud. Paulus brocht dise Sach ver de Apostel un de elre Mana en Jerusalem. Met iernstlichet noforschen en de Schreften uk met de Help von Gott sienen heiljen Jeist kjeemen dee to eenen Schluss. Dee schreewen aun de Christenvesaumlungen, see sullen sikj von Aufjetta un Huararie aufhoolen un durwen uk kjeen Bloot äten ooda Fleesch, waut nich utjeblat wia. Dise Jesazen wieren needich, oba daut Jesaz von Moses brukten de Christen nich mea hoolen (Aposteljeschicht 15:28-29).

Opp siene tweede Prädichtreis kjeem Paulus no de Staut Beria en de Jäajent, wua vondoag Griechenlaunt es. De Juden doa neemen de Bootschoft met Freiden aun. Dee forschten jieda Dach en de Schreften no, om to seenen, aus daut, waut Paulus säd, stemd. Oba daut jeef mol wada Jäajna un Paulus must doa veloten. Hee jinkj no Ateen. Doa hilt hee eene Räd ver eene huach utjelieede Grupp Menschen. Siene Räd es een goodet Väabilt doafäa, woo eena frintlich, derchdocht un jeschekjt räden kaun.

No siene dredde Prädichtreis jinkj Paulus no Jerusalem. Aus hee em Tempel wia, muaken jewesse Juden eenen grooten Opprua un wullen dän ombrinjen. Oba doa kjeemen reemische Soldoten mank. Dee neemen Paulus met un befruagen dän. Wiels Paulus een reemischa Birja wia, kjeem hee lota ver dän reemischen Harscha Felix. De Juden hauden kjeenen Bewies, fa waut see Paulus beschuljen deeden. Lota kjeem Paulus ver Festus, eenen aundren reemischen Harscha. Wiels Paulus oba beduad, dee wudd am aun de Juden utleewren, säd hee, hee wull ver dän Kjeisa en Room komen. Festus jeef daut too (Aposteljeschicht 25:11-12).

Paulus wort dan metem Schepp no Italien jeschekjt, om dort jerecht to woaren. Oba daut Schepp kjeem tosplät un Paulus must opp de Insel Malta bliewen, bat de Winta äwa wia. En Room wond Paulus dan twee Joa en een jepachtet Hus. Uk wan hee bewoakt wort, vetald hee aule, waut am besochten, von Gott sien Kjennichrikj.

Stett sikj opp Aposteljeschicht 11:22 bat 28:31.