Jehova Gott well, daut wie am aules vetalen, waut ons Sorjen moakt un oppem Hoaten licht (Psalm 55:23). Endoont, aus daut groote ooda kjliene Trubbels sent, wie kjennen am daut em Jebäd sajen. Wan wie ons äwa de Trubbels Sorjen moaken, dan deit hee uk, wiels hee es om ons bekjemmat. Un wan wie to am bäden, dan kjenn wie ennalich Fräd kjrieen (Filippa 4:6-7).

Wan wie Trubbel haben met onse Jefeelen ooda Narfen, feel wie ons veleicht gaunz auleen. Aundre Menschen kjennen nich emma krakjt vestonen, waut wie derchgonen (Spricha 14:10). Oba wie kjennen iernstlich to Jehova bäden un am sajen, woo wie ons feelen. Hee woat ons leeftolich toohorchen un hee kaun ons vestonen. Jehova sitt ons un weet, waut ons schwoa es un waut onse Trubbels sent. Hee well, daut wie am aules sajen, waut ons Sorjen moakt (2. Chronik 6:29-30).

Wan wie to Jehova bäden, woat ons Vetruen jrata un wie sent ons secha, daut hee om ons bekjemmat es. Veleicht feelst du die uk soo aus de Psalmenschriewa, waut en sien Jebäd säd: “Du hast miene Trubbels jeseenen; du weetst, woo grulich sea schwoa mie daut es” (Psalm 31:7, NW). To weeten, daut Jehova daut sitt, waut wie derchgonen, kaun ons en schwoare Tieden halpen. Hee sitt nich bloos onse Trubbels, oba hee steit ons uk bie un kaun daut baste vestonen, waut wie derchgonen. Un hee halpt ons derch sien Wuat, Troost un Moot to kjrieen.