Meist aule Menschen haben daut kloa, daut wesse Sachen orrajcht sent. Biejlikj wudd meist jieda eena sajen, daut wäm dootmoaken, vejewaultjen ooda Kjinja mesbrucken gaunz orrajcht es. Un bie aundre Sachen sent sikj de Mieeschte eenich, daut et rajcht es, biejlikj jerajcht, leeftolich un metfeelent to sennen. Oba daut jeft uk eenjet, wua väle denkjen, daut jieda eena doonen kaun, waut dän jankat. Biejlikj wan daut om soont jeit aus Sex, opprechtich sennen ooda de Kjinja opptrakjen, denkjen väle, daut et nich eene rajchte ooda orrajchte Wajch jeft. Foaken entscheiden de Menschen bloos no äa Jefeel no ooda no daut no, woo de Menschen rom äant äwa eene Sach denkjen. Oba kaun eena sikj emma opp daut veloten?

Foaken lot wie ons biem waut entscheiden von ons Jewessen leiden. Daut es, waut wie ennalich denkjen, waut rajcht un orrajcht es (Reema 2:14-15). Von kjlien aun weeten Kjinja aul, wan doa waut ojjerajcht es, un dee feelen sikj schuldich, wan dee waut Schlajchtet jedonen haben. Un wan wie oppwaussen, lia wie noch mea von de Famielje, Frind, Lierasch un de Jemeent äwa daut, waut dee fa rajcht un orrajcht talen. Wan wie dan waut entscheiden, sajcht ons Jewessen ons, aus daut met daut stemt, waut wie jelieet haben.

Ons Jewessen kaun ons bat doa brinjen, met aundre Menschen mettofeelen un dee uttohalpen, Dankboakjeit to wiesen un aundre jerajcht to behaundlen. Daut kaun ons uk doavon aufhoolen, Sachen to doonen, waut onse Frind wudd beleidjen ooda wuawäajen wie ons wudden motten schämen ooda schuldich feelen.

Kjenn wie ons emma opp ons Jefeel veloten? Een Maun, waut Garrick heet, säd, daut hee aus junga Maun aules deed, waut am jankad. Oba hee wort en, daut et nich goot utkjeem, wan hee bloos daut deed, waut hee fa rajcht tald. Hee selfst sajcht, daut hee een sea schlajchtet un schwienschet Läwen fieed. Hee brukt Droggs un deed sikj besupen un daut jinkj sea hunjsch too.

Eenjemol horch wie no ons Jefeel, wan wie waut entscheiden, oba foaken es ons daut uk wichtich, woo aundre äwa onse Entscheidungen denkjen. Doaderch kjenn wie von dee äare Erfoarunk lieren un waut dee weeten. Onse Famielje un Frind un de Menschen rom ons woaren daut jleichen, wan wie soont doonen, waut dee fa rajcht talen.

Kjenn wie ons emma opp aundre äare Meenunk veloten? Eene Fru, waut Priscila heet, haud aus Mejal met veschiedne Junges Sex, wiels een deel von äare Frind daut deeden. Fa aundre wia daut gaunz normal, oba see wia nich schaftich. See sajcht: “Mie jinkj daut nich scheen, daut to doonen, waut aule aundre deeden, wiels daut haud mie bat doa jebrocht, soont to doonen, waut onkluak un jefäadlich wia.”

Wan wie weeten wellen, aus waut rajcht ooda orrajcht es, spälen onse Jefeelen un dee von de aundre eene groote Roll. Oba wan wie ons bloos opp Jefeelen veloten, kaun daut bieaun passieren, daut onse Entscheidunk ons selfst ooda aundre toom Schoden es, wiels wie dan nich doaräwa nodenkjen, woo daut utkomen kunn (Spricha 14:12). Mau rajcht wan wie un aundre uk denkjen, daut waut rajcht es, kaun daut oba doawäajen schlajcht fa ons sennen. Un de Meenunk äwa rajcht un orrajcht endat je sikj uk. Biejlikj jewesset Vehoolen, waut se ieeschtemma fa schlajcht talden, es nu gaunz normal; un soont, waut se veleicht ieeschtemma fa goot talden, woat nu fa orrajcht jetalt.

Jeft daut eene bätre Help to entscheiden, waut rajcht un waut orrajcht es? Kjenn wie ons no waut rechten, waut sikj nich endat un waut uk om een poa Joa wieda noch jeltich es?

Jo, daut jeft eene Help, waut sikj nich endat un wua opp to veloten es, un dee schauft fa Menschen aulawäajen. En dän näakjsten Artikjel woa wie seenen, wua wie kjennen de baste Help finjen toom entscheiden, waut rajcht un waut orrajcht es.