Mie lachad daut, wäajen mien Frint wia nich een werkjelja Christ. Ekj fruach am: “Waut weetst du von de Bibel?” Hee deed nich fuaz auntwuaten, oba tolatst säd hee, daut siene Mame eent von Jehova siene Zeijen wia un daut hee daut von dee haud. Dan wort ekj nieschierich un wull mea weeten.

Wie vetalden bat wiet enne Nacht. Hee vetald mie, daut de Soton de Harscha äwa dise Welt es (Joh. 14:30). Du hast daut veleicht aul lang jewist, oba fa mie wia daut nie un oppfaulent. Ekj haud emma jehieet, daut doa een jerajchta un leeftolja Gott äwa dise Welt harscht. Oba daut paust nich met daut toop, waut ekj en mien Läwen jeseenen haud. Ekj wia je dan noch mau 26 Joa un haud bloos Trubbels jeseenen.

Mien Voda wia een Zhett-Flieeja fa de Armee en de Stäts un doawäajen wist ekj aus Kjint aul, daut daut irjentwanea kunn een Kjrich jäwen met Atomm-Bommen. Dee Armee wia emma reed, eene Atomm-Bomm loostoloten. Aus ekj en de Uniwersität en Kalifornien wia, wia de Kjrich en Vietnam. Ekj schauft met de aundre Schiela toop jäajen de Rejierunk. De Poliezen wieren ons met äare Knutten hinjaraun un wie worjden ons un kunnen meist nuscht seenen wäajen de Gauss-Bommen. Daut jinkj doa sea hunjsch too un de Menschen wieren sea jäajenaun. Eenje von de Väaschte von de Politikj worden omjebrocht un de Menschen em auljemeenen wieren sea jäajen de Rejierunk, un doa wia sea väl Orru. Jieda eena bleef opp siene ieejne Iedee un Meenunk stonen un daut wia sea toom dral woaren.

Aune 1970 neem ekj em Nuaden Alaska eene Oabeit aun, wua ekj een deel Jelt vedeend. Dan fluach ekj no London un koft mie doa een Mootasikjel un fua nom Sieden, onen to weeten, wua ekj han wull. Moonaten lota kjeem ekj dan no Afrika. Hinjawäajes troff ekj soone, waut uk von äare Trubbels utkleiwen wullen.

Met aules, waut ekj jeseenen un jehieet haud, wort mie dietlich, daut daut rajcht wia, waut de Bibel säd, daut een schlajchta Jeist äwa de Welt harscht. Doawäajen wull ekj weeten: “Wan Gott nich äwa dise Welt harscht, waut deit hee dan?”

En de näakjste Moonaten kjrieech ekj miene Auntwuat. Met de Tiet lieed ekj dan väl Mana un Frues kjanen, waut dän woaren Gott tru wieren, wan doa uk välet oppkjeem. Ekj funk aun, dee väl to räakjnen.

Aus ekj trigjkjeem no London, jinkj ekj no de Mame von mienen Frint un see jeef mie eene Bibel. Aus ekj dan lota no Amsterdam en Hollaunt fua, sach een Brooda mie, aus ekj unja een Licht oppe Gauss enne Bibel läsd. Hee holp mie, mea to lieren. Daut näakjste fua ekj no Dublin en Irlaunt un doa funk ekj daut Betel von Jehova siene Zeijen. Ekj puttad eefach aune Däa. Soo lieed ekj Arthur Matthews kjanen, eenen feinen Brooda, waut väl Erfoarunk haud. Ekj fruach am no een Bibelstudium un hee säd, hee wudd met mie studieren.

Ekj neem mien Studium sea iernst un läsd flietich aul de Bieekja un Tietschreften von de Zeijen. Un secha läsd ekj uk de Bibel. Daut wia soo intressaunt! Bie de Toopkomes sach ekj, daut mau rajcht Kjinja de Auntwuaten fa soone Froagen wisten, wua utjelieede Mana fa hundade Joaren äwa nojedocht hauden, soo aus: “Wuarom jeft daut soo väl schlajchtet? Wäa es Gott? Waut passieet, wan wie stoawen?” Ekj wia dän tietäwa bloos met Jehova siene Zeijen toop, wäajen ekj kjand sest kjeenen Mensch en daut gaunze Launt. Dee holpen mie, Jehova to leewen un daut ekj sienen Wellen doonen wull.

Aune 1972 leet ekj mie deepen. Een Joa lota funk ekj metem Pioniadeenst aun en de kjliene Vesaumlunk von Newry em Nuaden von Irlaunt. Ekj deed mie een kjlienet steenanet Huskje renten, waut aun eene Boaj-Kaunt stunt. Doa biesied wia eene Veefens un ekj eewd miene Räden ver daut Vee. Daut leet soo, daut dee dän Tiet goot toohorchten, waut dee doa stunden un wadakeiwden. Dee kunnen je mie nich Rot jäwen, oba daut holp mie, daut ekj bie miene Räden fein no miene Toohiera kjikjen kunn. Aune 1974 wort ekj dan Sondapionia un mien Poatna wia Nigel Pitt. Wie bleewen Läwestiet Frind.

To jane Tiet wia em Nuaden von Irlaunt sea väl Orru un Jewault. Eenje nanden de Städ mau rajcht: “Daut Launt von de Bommen un de Betroonen”. Daut wia sea jeweenlich, daut eena de Menschen oppe Gaussen feiten sach un daut Menschen dootjeschoten worden ooda daut se Koaren oppbommden. De Trubbels kjeemen foaken von de Jemeenten, oba foaken uk von de Politikj. Oba de Protestanten un uk de Katolikjen aunerkjanden daut, daut Jehova siene Zeijen sikj opp kjeene Sied stalden enne Politikj. Un doawäajen kunn wie frie un en Sechaheit prädjen. Dee, met dee wie vetalden, wisten daut foaken aul, wua daut wada Feit jäwen wudd un doawäajen kunnen dee ons woarnen un wie kunnen de Jefoa utem Stich gonen.

 Oba bieaun kunn wie de Jefoa nich gaunz utem Stich gonen. Opp eene Sauz deed ekj met Denis Carrigan, eenen aundren Pionia, en eene Staut prädjen, wua daut sest kjeene Zeijen jeef. Doa wia wie noch mau bloos eemol jewast. Eene Fru schmeet ons väa, daut wie en Werkjlichkjeit Soldoten von Enjlaunt wieren. Veleicht docht see daut, wäajen wie beid nich soo vetalden aus de Menschen en Irlaunt. Oba wie grulden ons, wäajens wan eena bloos frintlich wia to de Enjlenda äare Soldoten, kunn daut aul soont jäwen, daut se eenem dootschooten ooda derch de Kjneeen schooten. Aus wie doa buten enne Kold stunden un no de Boss luaden, sag wie, daut een Foatich doa bie daut Koffe-Stua stellhilt, wua de Fru ons beschulcht haud. See kjeem dan rut un räd met de twee Mana em Foatich un wees sea oppjeräacht no ons. De Mana kjeemen gaunz sacht no ons jefoaren un fruagen, wanea de Boss komen wudd. Aus de Boss ieescht kjeem, räden dee ieescht met dän Foara. Wie kunnen nich krakjt hieren, waut dee doa vetalden, oba doa wieren nich aundre Metfoara un doawäajen wia wie ons meist secha, daut dee doa Plons muaken, woo dee ons butakaunt Staut äwatsied schaufen kunnen. Oba daut neem sikj nich soo rom. Aus wie ieescht ut de Boss rutkroopen, fruach ekj dän Foara: “Waut wullen jane äwa ons weeten?” Un hee säd bloos: “Ekj weet wäa jie sent un ekj säd an daut. Sorj die nich. Du best en Sechaheit.”

Aune 1976 lieed ekj Pauline Lomax opp eenen Distrikjt-Kongress a en Dublin kjanen. See wia eene Sondapionia, waut doa wia von Enjlaunt jekomen. See wia eene sea feine Sesta, waut jeistlich jesonnen un deemootich wia. Pauline un äa Brooda Ray kjanden de Woarheit aul von kjlien aun. Een Joa lota wieren Pauline un ekj befriet un wie wieren toop wieda em Sondavoltietdeenst en Ballymena em Nuaden von Irlaunt.

Dan wia wie een Stootje em Kjreisdeenst en Belfast, Londonderry, un uk en aundre jefäadelje Städen. Ons muak daut sea väl Moot to seenen, waut von stoakjen Gloowen onse Breeda un Sestren hauden un woo dee Jehova deenden. Dee hauden sea väl äwakomen, waut gaunz deep en an bennen wia, biejlikj, waut dee ea jleewden, woo dee äwa aundre dochten un uk Hauss. Jehova säajend un beschizt dee!

Ekj wond tieen Joa en Irlaunt. Dan word wie aune 1981 fa de 72. Klauss fa de Gilead-School enjelot. Doahinja word wie no Sierra Leone em Wasten von Afrika jeschekjt.

Wie wonden met 11 aundre feine Menschen toop en een Missionoahus. Wie hauden toop eene Koakstow, dree Bodstowen, twee Räajnasch, een Fon, eene Wauschmaschien un eenen Drieeja. Daut Fia jinkj foaken ut un daut wort verhäa nich bekaunt jemoakt. Oppem Bän hauden de Rauten sikj daut tusich jemoakt un em Kjala kjeemen foaken Kobra-Schlangen nenn.

Wan daut Läwen wäajen aul dit uk nich emma leicht wia, muak de Deenst oba groote Freid. De Menschen hilden sea väl von de Schreft un deeden oppmoakjsom toohorchen. Väle studieeden un neemen de Woarheit aun. De Einheima säden to mie eefach “Mister Robert” un to Pauline “Missus Robert”. Oba aus ekj dan fa een Stootje mea fa daut Betel schaufen deed un weinja em Deenst wia, fungen de Menschen aun, Pauline “Missus Pauline” to nanen un mie “Mister Pauline”. See jleicht daut sea!

 Väl Breeda wieren oam, oba Jehova sach emma doano, daut dee aules hauden; eenjemol opp eene besondre Wajch (Mat. 6:33). Mie denkjt daut noch von eene Sesta, waut bloos soo väl Jelt haud toom fa sikj un äare Kjinja dän Dach Äten kjeepen. Oba see jeef aul daut Jelt eenen kranken Brooda, waut nich jenuach haud toom sikj Medizien kjeepen jäajen de Malaria Krankheit. Dänselwjen Dach kjeem eene Fru gaunz onverhofs no de Sesta un leet sikj de Hoa schmock moaken un see betold ar doafäa. Soo waut aus dit passieed foaken.

Wie wieren näajen Joa en Sierra Leone. Dan kjeem wie no Nigeria. Doa wia wie nu en een grootet Betel. Ekj deed je noch deeselwje Offiz-Oabeit, waut ekj ea en Sierra Leone deed, oba fa Pauline wia daut eene groote Veendrunk un uk schwoa. Ea wia see jieda Moonat 130 Stund em Deenst un see haud een deel feine Bibelstudiums. Nu kjrieech see Oabeit enne Neistow, wua see dän Tiet äwa Kjleeda flekjen deed. Daut dieed een Stootje, bat see sikj doa ieescht hanwanen kunn, oba dan sach see daut, woo väl aundre daut räakjenden, waut see deed. See kjikjt dan dolla doano, woo see aundre von de Betel-Famielje halpen un Moot moaken kunn.

De Kultua en Nigeria un woo de Menschen daut hauden, wia gaunz aundasch, aus wie daut jewant wieren un wie musten väl lieren. Eemol kjeem een Brooda met eene Sesta, waut korz nom Betel jekomen wia, toop en miene Offiz nenn, daut ekj dee sull een bät kjanen lieren. Aus ekj ar de Haunt jäwen wull, bekjt see sikj ver mie bat oppe Ieed. Ekj vefieed mie, un mie kjeemen fuaz twee Bibelvarzhen em Kopp: Aposteljeschicht 10:25-26 un Openboarunk 19:10. Ekj docht bie mie soo: “Saul ekj ar sajen, daut see nich soo aus dit saul?” Oba dan foll mie bie, daut se dee em Betel aunjenomen hauden – see weet je, waut de Bibel lieet.

De gaunze Tiet, waut wie doa vetalden, feeld sikj mie daut sea fonnich. Aus dee ieescht wajch wieren, socht ekj mie een bät waut no äwa dee Kultua. Ekj lieed, daut de Sesta bloos eene Jewanheit nojekomen wia, waut don noch emma en eenje Poats von Nigeria Mood wia. De Mana bekjten sikj uk ver aundre. Daut haud nuscht met aunbäden to doonen, oba daut wia dee äare Oat un Wies, woo dee Respakjt weesen, un daut jeft mau rajcht Biespels enne Schreft fa daut (1. Sam. 24:9). Ekj sie schaftich, daut ekj nich waut säd, wua ekj nich omwist. Dan haud ekj veleicht waut jesajcht, wua de Sesta sikj wudd haben kunt sea schlajcht äwa feelen.

 En Nigeria hab wie väl Breeda un Sestren jetroffen, waut eenen besonda stoakjen Gloowen hauden. Eena doavon wia Isaiah Adagbona. b Hee lieed de Woarheit kjanen, aus hee noch een junga Maun wia, oba dan kjrieech hee de Lepra-Krankheit. Doawäajen schekjten se am no eene Städ, wua de Leprakranke wonen musten un hee wia doa de eensja Brooda. Wan hee uk Jäajenstaunt haud, holp hee oba mea aus 30 Leprakranke, de Woarheit kjanen to lieren, un doa kunn mau rajcht eene Vesaumlunk oppjestalt woaren.

Aune 1996 word wie no daut Betel en Kenia jeschekjt. Ekj wia nu daut ieeschte Mol wada doa, von don aus ekj daut beläwd, waut ekj aum Aunfank vetald. Wie wonden em Betel. Doa rom daut Betel jeef daut eene Sort Open. Dee stoolen sikj de Frucht, wan Sestren dee von eene Städ no de aundre druagen. Eenen Dach haud eene Sesta em Betel äa Fensta opjeloten. Aus see dan no Hus kjeem, sach see, daut eene Open-Famielje sikj daut Äten scheen schmakjen leet, waut dee doa bennen jefungen hauden. See schrieech bloos un rand fuaz wada rut. De Open schrieejen uk un hupsten toom Fensta rut.

Pauline un ekj wieren en eene Vesaumlunk opp Swahili. Daut dieed nich lang un ekj kjrieech de Oppgow, daut Buakstudium von de Vesaumlunk to leiden (nu heet daut Bibelstudium von de Vesaumlunk). Oba ekj kunn opp dee Sproak nich väl mea sajen aus een kjlienet Kjint. Ekj deed em verut aules fein studieren, doawäajen kunn ekj de Froagen väaläsen. Oba wan de Auntwuaten bloos een kjlien bätje aundasch wieren aus em Varsch, kunn ekj daut nich vestonen. Daut späad sikj soo fonnich! Mie wia daut schod fa de Breeda un Sestren, oba ekj must dee sea bewundren, woo jeduldich un deemootich dee daut aunneemen, daut ekj daut Studium leiden deed.

Wie wieren nich mol een Joa en Kenia. Aune 1997 word wie dan no daut Betel en Brooklyn, New York enjelot. Nu wia wie met eenst en een sea rikjet Launt. Oba en soon Launt es daut uk nich emma leicht (Spr. 30:8-9). Mau rajcht doa weesen onse Breeda grooten Gloowen. Dee brukten äare Tiet un aules, waut see hauden, om Jehova siene Organisazion to unjastetten un nich, om selfst rikj to woaren.

Met de Joaren hab wie een deel Breeda un Sestren jeseenen, waut en gaunz veschiedne Omstend tru bleewen. En Irlaunt sag wie, woo de Breeda Gloowen hauden, wan doa uk väl Jewault wia. En Afrika sag wie dee äaren Gloowen, wan daut uk oam wia ooda wan dee nich met de Breeda toop sennen kunnen. Un enne Stäts sag wie dän Gloowen, wan daut uk een rikjet Launt wia. Jehova freit sikj secha sea, wan hee raufkjikjt un sitt, woo siene Deena am en aul dise veschiedne Loagen äare Leew wiesen!

De Joaren sent bosich vebiejegonen, soo “aus een Wäwa sien Schepkje” (Hiob 7:6). Nu schauf wie enne Hauptoffiz en Warwick, New York met aundre toop. Ons jeit daut sea scheen, daut wie noch emma met Menschen toopschaufen kjennen, waut sikj opp iernst unjarenaunda leewen. Wie sent schaftich un tofräd, daut wie daut doonen kjennen, waut ons mäajlich es, om onsen Kjennich Jesus Christus to unjastetten. Boolt woat hee aule True beloonen (Mat. 25:34).