1. Woo docht de Apostel Paulus äwa de Vesaumlungshelpa?

 DE Vesaumlungshelpa doonen eene sea wichtje Oabeit enne Vesaumlungen. Fa dän Apostel Paulus wieren soone true Mana sea väl wieet. Aus hee biejlikj eenen Breef aun de Christen en Filippi schreef, bestald hee, de Vesaumlungshelpa un de Eltestasch noch oppoat to jreessen (Filip. 1:1).

2. Woo denkjt een Brooda doaräwa, daut hee een Vesaumlungshelpa es?

² Väl jedeepte Breeda, waut Vesaumlungshelpa sent, haben eene groote Freid doabie, krakjt endoont woo oolt dee sent. Biejlikj Devan wort von 18 Joa aus een Vesaumlungshelpa aunjestalt, un een Brooda, waut Luis heet, aus hee väaren enne 50 wia. Woo docht Luis äwa dit? Hee säd: “Fa mie es daut een grootet Väarajcht, dise Oabeit aus Vesaumlungshelpa to doonen, besonda wan ekj doaraun denkj, woo väl Leew de Vesaumlunk mie aul jewäsen haft.” Väl Breeda jeit daut krakjt soo.

3. Woone Froagen woa wie ons nu unjastonen?

³ Wurscht du die daut kjennen väanämen, een Vesaumlungshelpa to woaren, wan du een jedeepta Brooda best? Waut kunn die halpen, dän Wunsch doatoo to kjrieen? Un waut es no de Schreft no needich doatoo? En disen Artikjel woa wie ons dise Froagen unjastonen. Oba ieescht woa wie doavon räden, waut dän Vesaumlungshelpa siene Oabeit es.

WAUT HABEN DE VESAUMLUNGSHELPA FA OPPGOWEN?

4. Waut vonne Oppgowen haben de Vesaumlungshelpa? (See uk daut Bilt.)

⁴ Een Vesaumlungshelpa es een jedeepta Brooda, waut derch dän heiljen Jeist aunjestalt woat, de Eltestasch enne  Vesaumlunk met een deel wichtje Oppgowen to halpen. Eenje Vesaumlungshelpa seenen doano, daut de Vekjindja jenuach Städen un Bieekja haben toom prädjen. Aundre halpen bie de Reinjunk met un daut aules enne Go blift. De Vesaumlungshelpa sent uk Ordna un schaufen met daut Audio- un Video-Jereetschoft, wäarent wie onse Toopkomes haben. Aul dise Oabeiten sent sea needich, wan dee uk nich met daut Lieren to doonen haben. Oba daut Wichtichste es, daut dee Jehowa leewen un soo läwen, aus hee daut fa rajcht talt. Un dee leewen äare Breeda un Sestren uk sea (Mat. 22:37-39). Woo kaun een jedeepta Brooda doano hanoabeiden, een Vesaumlungshelpa to woaren?

5. Woo kaun een Brooda doano sträwen, een Vesaumlungshelpa to woaren?

⁵ De Bibel wiest kloa, waut von soone velangt woat, waut doa wellen Vesaumlungshelpa woaren (1. Tim. 3:8-10, 12-13). Wan du doano sträfst, een Vesaumlungshelpa to woaren, dan wurscht du die dise Ieejenschoften ut de Schreft unjastonen kjennen un die dan aunstrenjen, dee notokomen. Oba daut ieeschte von aules motst du die doaräwa em Kloaren sennen, wuarom du wurscht wellen een Vesaumlungshelpa woaren.

WUAROM WEST DU EEN VESAUMLUNGSHELPA WOAREN?

6. Waut sull die bat doa brinjen, waut fa diene Breeda un Sestren to doonen? (Matäus 20:28). (See uk daut Bilt.)

⁶ Ons bastet Biespel es Jesus Christus. Hee deed aules ut Leew – Leew fa sienen Voda un Leew fa de Menschen. Dise Leew brocht am bat doa, sikj sea auntostrenjen un soont fa aundre to doonen, waut läach aunjeseenen wia (läs Matäus 20:28; Joh. 13:5, 14-15). Wan du uk ut Leew een Vesaumlungshelpa woaren west, woat Jehowa die säajnen un halpen, bat doa to komen (1. Kor. 16:14; 1. Pet. 5:5).

7. Wuarom es daut orrajcht, no een Aumt to sträwen, bloos om goot aunjeseenen to sennen?

⁷ Enne Welt woaren soone Menschen foaken jeloft, waut doa emma proowen, de Baste to sennen. Oba mank Jehowa siene Deena nich. Wan een Brooda waut ut Leew deit, soo aus Jesus, dan es dee nich doano ut, huach aunjeseenen to sennen, Macht to haben ooda äwa aundre to harschen.  Wan soona, waut bloos well huach aunjeseenen sennen, enne Vesaumlunk wudd een Aumt kjrieen, wudd dee secha nich wellen irjent eefache Oabeiten doonen, waut doa needich sent, om sikj om Jehowa siene Schop to kjemren. Dee wudd sikj doatoo veleicht too groot doonen (Joh. 10:12). Jehowa woat daut nich säajnen, wan eena, waut stolt ooda ekjich es, no een Aumt sträft (1. Kor. 10:24, 33; 13:4-5).

8. Waut von Rot jeef Jesus siene Apostel?

⁸ Mau rajcht eenje von Jesus siene goode Frind sträwden mol no een Väarajcht, oba nich utem rajchten Senn. Een Biespel doafäa sent de Apostel Jakobus un Johanes. Dee fruagen Jesus doano, äant eene besondre Städ en sien Kjennichrikj to jäwen. Lowd Jesus äant doafäa, daut see no daut sträwden? Nä. Enne Städ daut säd hee to aule 12 Apostel: “Wäa mank junt well groot sennen, dee mott dän aundren sien Deena sennen. Un wäa von junt well de Väaschta sennen, dee mott aul de aundre äa Sklow sennen” (Mar. 10:35-37, 43-44). De rajchta Grunt, no een Aumt to sträwen, wudd sennen, daut eena waut fa aundre doonen well. Soone Breeda woaren een groota Säajen sennen enne Vesaumlunk (1. Tes. 2:8).

WOO KAUST DU EENEN JRATREN WUNSCH KJRIEEN, MEA TO DOONEN?

9. Woo kaust du noch eenen jratren Wunsch kjrieen, waut fa aundre to doonen?

⁹ Gaunz secha leefst du Jehowa un west waut fa aundre doonen. Oba veleicht denkjst du, daut et too väl es fa die, waut von eenen Vesaumlungshelpa velangt woat. Woo kaust du dan noch eenen jratren Wunsch kjrieen, waut fa aundre to doonen? Denkj mol han, woo väl Freid daut jeft! Jesus säd: “Daut jeft mea Freid, wan eena jeft, aus wan eena nemt” (Apj. 20:35). Jesus selfst kjeem disen Gruntsauz no. Hee haud werkjlich Freid doabie, waut fa aundre to doonen, un du kaust daut uk.

10. Woo wees Jesus, daut am daut Freid jeef, waut fa aundre to doonen? (Markus 6:31-34).

¹⁰ See wie mol, woo Jesus wees, daut hee wellich reed wia, waut fa aundre to doonen (läs Markus 6:31-34). Opp eene Sauz wieren hee un siene Apostel gaunz meed. Dee wieren oppem Wajch no eene ruje Städ, wua see sikj vereiwen kunnen. Oba eene Häad Menschen wia doa aul ea, un dochten, daut Jesus äant lieren wudd. Hee wudd haben kunt nä sajen, wiels “see hauden nich mol soo väl Tiet toom noch äten.” Ooda Jesus wudd dee haben kunt eent ooda twee Sachen lieren un dan dee fuatschekjen. Oba wiels hee dee soo sea leewd, “funk hee aun, dee välet to lieren.” Un hee deed daut soo lang, bat “daut aul lot jeworden” wia (Mar. 6:35). Hee lieed dee nich, wiels hee bemust wia, oba wiels “am daut äwa dee jaumad”. Hee wull dee lieren, wäajen hee dee leewd. Jesus haud groote Freid, wan hee waut fa aundre doonen kunn.

11. Woo holp Jesus dise Häad Menschen ut? (See uk daut Bilt.)

¹¹ Jesus lieed de Menschen nich bloos waut äwa Gott, oba hee deed uk aundret fa dee, waut doa needich wia. Hee muak derch een Wunda Äten reed un säd to siene Jinja, daut dee daut sullen mank de Menschen vedeelen (Mar. 6:41). Doaderch lieed hee siene Jinja, woo eena waut fa aundre doonen kunn. Hee wees dee doaderch uk, daut soone Oabeiten aus uthalpen un bedeenen wichtich wieren – krakjt soone Oabeiten aus de Vesaumlungshelpa vondoag dän Dach foaken doonen. Stal die väa, woo schaftich de Apostel wieren, daut see doa methalpen kunnen, aus Jesus derch een Wunda Äten muak, wua daut Volkj dan von äten kunn, bat dee aula “saut worden”! (Mar. 6:42). Dit  wia nich daut ieeschte Mol, daut Jesus dolla om aundre todoonen wia aus om sikj selfst. Sien gaunzet Läwen aus hee oppe Ieed wia, haft hee waut fa aundre jedonen (Mat. 4:23; 8:16). Jesus haud soo väl Freid un am muak daut soo tofräd, aundre to lieren un uk aundre Sachen fa dee to doonen. Gaunz secha woascht du daut uk beläwen, woo väl Freid daut jeft, wan du doano sträfst, aus Vesaumlungshelpa waut fa aundre to doonen.

12. Wuarom sull kjeena denkjen, daut dee sikj met nuscht vesteit, om de Vesaumlunk to halpen?

¹² Wan du denkjst, daut du die met nuscht vesteist, dan woa nich mootloos. Gaunz secha kaust du irjentwaut fa de Vesaumlunk doonen. Veleicht kaun die daut halpen, wan du mol äwa daut nodenkjst, waut Paulus en 1. Korinta 12:12-30 schreef. Dan froag Jehowa doano, daut hee die halpt to vestonen, waut dit met die to doonen haft. Daut, waut Paulus säd, wiest, daut jieda eena, waut Jehowa deent, wichtich un wieetvoll es enne Vesaumlunk. Wan du noch nich een Vesaumlungshelpa woaren kaust, wäajen du nu jroz noch aun eenje Ieejenschoften schaufen motst, dan jeff nich opp. Enne Städ daut proow, aules to doonen, waut du kaust, om Jehowa to deenen un diene Breeda to halpen. Du kaust die gaunz secha sennen, daut de Eltestasch doaräwa nodenkjen woaren un die soone Oppgowen jäwen, waut du doonen kaust (Reem. 12:4-8).

13. Wuarom es daut nich too schwoa, bat doa to komen, een Vesaumlungshelpa to woaren?

¹³ Denkj uk noch aun dit: De mieeschte Ieejenschoften, waut de Bibel von eenen Vesaumlungshelpa velangt, sent uk soone Ieejenschoften, waut aule Christen haben motten. Aule Christen sellen Jehowa noda komen, friejäwrich sennen un soo läwen, aus hee daut haben well. Veleicht hast du aul aun de mieeschte von dise Ieejenschoften jeschauft. Oba well wie nu mol seenen, woo een Brooda krakjt doano sträwen kaun, een Vesaumlungshelpa to woaren.

WOO KAUST DU DOANO STRÄWEN, EEN VESAUMLUNGSHELPA TO WOAREN?

14. Waut meent daut, “riep to sennen”? (1. Timotäus 3:8-10, 12).

¹⁴ Well wie ons nu mol eenjet unjastonen, waut en 1. Timotäus 3:8-10, 12 velangt woat (läs). Een Vesaumlungshelpa mott “riep sennen”. Daut kaun uk soo äwasat woaren: Dee mott “siene Sach iernst nämen”, “veauntwuatlich sennen” un “sikj soo oppstalen, daut aundre am respakjten kjennen”. Oba dit meent nich, daut dee  emma mott iernsthauft sennen ooda kjeenmol kaun Spos haben (Liera 3:1, 4). Daut meent, daut dee flietich aul siene Veauntwuatungen nokomen saul. Wan du doafäa bekaunt best, daut du opp to veloten best, dan woaren de Breeda vonne Vesaumlunk die väl räakjnen un respakjten.

15. Waut meent daut, “nich onopprechtich sennen em Räden” un “nich bejierich sennen no onopprechtjen Vedeenst”?

¹⁵ “Nich onopprechtich sennen em Räden”, bediet, de Woarheit sajen un opp to veloten sennen. Eena helt uk sien Wuat un deit aundre nich aunschmäaren (Psa. 15:1-2). “Nich bejierich sennen no onopprechtjen Vedeenst”, meent, daut eena opprechtich Jeschaften drift un uk opprechtich met Jelt omjeit. Eena wudd uk nich siene Gloowesbreeda utnutzen, om derch dee mea Jelt to moaken.

16. (a) Waut meent daut, “nich väl Wien drinkjen”? (b) Waut bediet daut, “een reinet Jewessen” to haben?

¹⁶ “Nich väl Wien drinkjen”, bediet, daut du nich too väl Stoakjet drinkjst un nich bekaunt best aus een Supa. Un “een reinet Jewessen” bediet, daut du die en dien Läwen aun Jehowa siene Jesazen helst. Wan du uk nich volkomen best, hast du oba ennalichen Fräd, wäajen du een goodet Veheltnis met Gott hast.

17. Waut meent daut, daut Breeda sellen “jeprooft woaren, aus dee dän Deenst doonen kjennen”? (1. Timotäus 3:10). (See uk daut Bilt.)

¹⁷ “Dee saul ieescht mol jeprooft woaren, aus dee dän Deenst doonen kaun”. Daut meent, daut de Eltestasch jeseenen haben, daut du diene Veauntwuatungen fein nokjemst un opp to veloten best. Soo, wan de Eltestasch die eene Oppgow jäwen, dan hool die aun de Aunwiesungen, waut de Organisazion doatoo jeft. Du motst uk krakjt vestonen, waut bie dise Oppgow aules met en es un bat wanea du waut saust foadich haben. Wan du jieda Oppgow fein nokjemst, woaren de Breeda un Sestren daut moakjen un daut sea schazen, daut du veraunkjemst. Jie Eltestasch, seet doano, daut jie jedeepte Breeda utlieren (läs 1. Timotäus 3:10). Sent en june Vesaumlunk jedeepte Breeda, waut tweschen 10 un 14 Joa sent ooda jinja? Doonen dee aul fa sikj selfst studieren un sikj goot fa de Toopkomes reedmoaken? Doonen dee pinkjlich Auntwuaten jäwen un prädjen gonen? Wan jo, dan jäft dee Oppgowen, waut dee uk nokomen kjennen. Opp dee Wajch kjennen dee “jeprooft woaren, aus dee dän Deenst doonen  kjennen”. Wan dee dan ieescht soo bie 17 bat 19 Joa sent, sent dee veleicht aul soo wiet, daut dee kjennen aus Vesaumlungshelpa aunjestalt woaren.

18. Waut meent daut, daut eenen Brooda “met nuscht to beschuljen jeit”?

¹⁸ “Met nuscht to beschuljen”, meent, daut die kjeena met Rajcht fa waut beschuljen kaun. Daut kaun sennen, daut Christen ojjerajcht beschulcht woaren. Bie Jesus wia daut soo un hee säd, daut et bie siene Nofolja uk soo sennen wudd (Joh. 15:20). Oba wan du wieda een reinet Läwen fieescht, soo aus Jesus, woascht du die kjennen eenen gooden Nomen moaken enne Vesaumlunk (Mat. 11:19).

19. Waut es doa met en, “bloos eene Ehefru to haben”?

¹⁹ Dee “kjennen bloos eene Ehefru haben”. Wan du befriet best, mott daut met daut tooppaussen, woo Jehowa daut von Aunfank aun enjerecht haft: een Maun un eene Fru (Mat. 19:3-9). Een christelja Ehemaun mott siene Fru tru sennen un dee wudd kjeenmol Huararie begonen (Heb. 13:4). Doa es uk met en, daut dee kjeenmol wudd no eene aundre Fru schmeichlen (Hiob 31:1).

20. Woo kaun een Maun wiesen, daut hee siene Famielje “fein weet väatostonen”?

²⁰ “Dee sellen äare ieejne Kjinja un dee, waut to äa Hus jehieren, fein weeten veropptogonen.” Wan du daut Haupt von eene Famielje best, motst du diene Veauntwuatunk iernst nämen. Doo pinkjlich met diene Famielje toop studieren. Go met jiedrem eenen von diene Famielje soo foaken aus mäajlich toop prädjen. Halp diene Kjinja, daut dee kjennen Frind woaren met Jehowa (Efs. 6:4). Een Maun, waut doa fein fa siene Famielje oppkjemt, woat sikj uk goot om de Vesaumlunk kjemren kjennen (see uk 1. Timotäus 3:5).

21. Waut kaust du doonen, wan du noch nich een Vesaumlungshelpa best?

²¹ Jie Breeda, wan jie noch nich Vesaumlungshelpa sent, dan bät to Jehowa un läst junt disen Artikjel goot derch. Unjastot junt daut, waut no de Schreft no von Vesaumlungshelpa velangt woat un strenjt junt aun, daut notokomen. Denkjt doaräwa no, woo sea jie Jehowa un june Breeda un Sestren leewen. Prooft, eenen jratren Wunsch to kjrieen, mea fa dee to doonen (1. Pet. 4:8, 10). Dan woa jie uk selfst kjennen de Freid beläwen, waut doavon kjemt. Mucht Jehowa junt doabie sea säajnen, wan jie doano sträwen, Vesaumlungshelpa to woaren! (Filip. 2:13).