HALPT daut waut, wan eena bät? No de Bibel no jo. Wan Gott siene true Deena bäden, dan halpt dee daut sea (Lukas 22:40; Jakobus 5:13). Bäden kaun ons en väl Stekjen halpen. Daut kaun ons halpen, Gott noda to komen un dan woat ons daut uk bäta gonen. Woo schauft daut?

Well wie mol sajen, dien Kjint kjricht een Jeschenkj. Wurscht du wellen haben, daut daut bloos sull schaftich sennen ooda wurscht du dien Kjint daut lieren, daut daut saul dankscheen sajen? Wuarom es dit wichtich? Wan wie daut sajen, woo dankboa wie sent, dan woa wie noch dankboara. Es daut uk soo aus dit, wan wie to Gott räden? Gaunz kloa! Unjasto wie ons daut mol.

Dankjebäda. Wan wie onsen Voda fa daut goode danken, waut wie beläwen, dan woa wie dolla no onse Säajnungen kjikjen. Un daut halpt dan, daut wie dankboara sent, uk schaftja sent un nich soo sea no daut schlajchte kjikjen (Filippa 4:6).

Een Biespel: Jesus bedankt sikj aun sienen Voda, wäajen dee no am horcht un uk daut deed, wua hee om bäd (Johanes 11:41).

Om Vejäwunk bäden. Wan wie Gott om Vejäwunk bäden, dan woat ons daut dietelja, woo iernst daut es, waut wie orrajcht jedonen haben. Un dan hab wie noch een jratret Leetsennen un wie vestonen dan uk bäta, woo wichtich daut es, Gott to jehorchen. Daut halpt ons uk, daut wie ons nich soo schuldich feelen.

Een Biespel: David säd en een Jebäd, woo leet am daut wia, waut hee orrajcht jedonen haud, un woo schod am daut wia (Psalm 51).

Om Rot un Weisheit bäden. Wan wie Jehova no Rot un Weisheit froagen toom goode Entscheidungen moaken, dan halpt ons daut, daut wie deemootich bliewen. Un daut halpt ons uk denkjen, daut wie nich aules kjennen un daut wie ons motten opp onsen himlischen Voda veloten (Spricha 3:5-6).

Een Biespel: Salomo fruach en een Jebäd deemootich no Rot un no Weisheit toom äwa Israel rejieren (1. Kjennichs 3:5-12).

Bäden, wan wie iernste Trubbels haben. Wan wie Jehova sajen, waut ons schwoa es un wie nich weeten, waut wie doonen sellen, dan woat ons daut sea halpen un wie woaren opp am vetruen enne Städ opp ons selfst (Psalm 62:9).

Een Biespel: Kjennich Asa bäd, aus hee jäajen eenen stoakjen Fient kjamfen must (2. Chronik 14:10).

Fa dee bäden, waut daut aun Help fält. Soone Jebäda halpen ons, daut wie nich bloos aun ons selfst denkjen un daut wie dolla met aundre metfeelen.

Een Biespel: Jesus bäd fa siene Nofolja (Johanes 17:9-17).

Bäden toom Gott preisen. Wan wie Jehova preisen, fa aul daut, waut hee deit un woo hee es, dan woa wie am noch dolla respakjten un väl mea räakjnen. Soone Jebäda kjennen ons uk halpen, daut wie Jehova, onsen Gott un Voda, noda komen.

Een Biespel: David wees Gott, woo dankboa hee am wia fa siene Schepfunk (Psalm 8).

Noch waut goodet, waut daut Jebäd haft, es, daut wie “Gott sien Fräd, dee wiet äwa aules jeit”, kjrieen (Filippa 4:7, PB). En dise schlemme Welt es daut goanich leicht, ennalich Fräd to haben. Oba daut fält ons aula; daut halpt mau rajcht fa de Jesuntheit (Spricha 14:30). Oba kjemt Gott sien Fräd von veselfst? Ooda es doa noch waut wichtjeret met en?