De Schreft haft äa Läwen veendat

WAUT wort een Maun en Schottlaunt en, waut wichtja wia, aus sea wiedatokomen en siene Oabeit? Waut holp eenen Maun en Brasilien opptohieren, met een sea schwienschet Läwen to fieren un uk met Kokaina to schmieekjen. Woo kunn een Maun von Sloweenien opphieren met sea supen? Kjikj mol, waut dise dree Menschen to sajen haben.

“Ekj haud werkjlich een goodet Läwen”(JOHN RICKETTS)

WANEA JEBUAREN: 1958

VON WOON LAUNT: SCHOTTLAUNT

WAUT EKJ EA WIA: EEN RIKJA JESCHAFTSMAUN

MIENE VEGONENHEIT: Ekj woss en eene rikje Famielje opp. Mien Voda wia een Soldot en de brietische Armee. Wie trocken väl opp un dol. Wie wonden nich bloos en Schottlaunt, oba uk en Enjlaunt, Dietschlaunt, Kenia, Malaysia, Irlaunt un Ziepern. Von acht Joa aun schekjten miene Elren mie en Schottlaunt no de School. Un lota studieed ekj dan en de Cambridge-Uniwersität.

Aus ekj 20 Joa wia funk ekj aun, enne Eelj-Kompanie to schaufen un daut deed ekj fa acht Joa. Ieescht schauft ekj doamet en Sied-Amerika, lota en Afrika un tolatst noch en Wast-Australien. Nodäm aus ekj no Australien jetrocken wia, funk ekj met mien ieejnet Jeschaft aun. Un daut vekoft ekj lota.

Ekj muak soo väl Jelt met daut Jeschaft vekjeepen, daut ekj nich mea brukt schaufen. Ekj wia noch mau 40 Joa. Un ekj brukt de Tiet, waut ekj nu haud, toom reisen. Ekj fua metem Mootasikjel twee Mol rom Australien. Un ekj muak uk eene Weltreis. Ekj haud werkjlich een goodet Läwen.

WOO MIEN LÄWEN SIKJ DERCH DE SCHREFT JEENDAT HAFT: Mau rajcht ea ekj mien Jeschaft vekoft, wull ekj aul Gott doafäa danken, daut ekj soon goodet Läwen haud. Ekj funk aun, no de anglikanische Kjoakj to wanken, wua ekj wia oppjewossen. Oba dee Kjoakj lieed nich väl ut de Schreft. Lota studieed ekj dan met de Mormonen, oba daut wia mie uk boolt enoolent, wäajens dee äare Lieren sikj nich oppe Schreft stetten.

Eenen Dach wieren Jehova siene Zeijen aun miene Däa. Ekj wort fuaz en, daut dee äare Lieren gaunz opp de Schreft stetten. Een Varsch, waut dee mie weesen, wia 1. Timotäus 2:3-4 (PB). Doa sajcht daut, daut Gott well haben, “daut aule Menschen sellen jerat woaren un de Woarheit kjanen lieren”. Ekj jleicht daut sea, daut de Zeijen säden, daut wie musten daut lieren, waut de Schreft opp iernst sajcht.

Met Jehova siene Zeijen studieren holp mie, de Woarheit ut de Schreft to lieren. Biejlikj lieed ekj, daut Gott un Jesus nich Poat sent von eene onbejriepelje Dree-Eenichkjeit. Ekj lieed, daut Jesus nich Gott es, oba eene aundre Persoon (Johanes 14:28; 1. Korinta 11:3). Dit to lieren, freid mie sea, wiels daut wia soo eefach to vestonen. Un mie stieed daut, daut ekj ea haud soo väl Tiet vekwost, om to proowen, eene faulsche Lia to vestonen!

Boolt funk ekj dan aun, no de Toopkomes von Jehova siene Zeijen to wanken. Ekj sach, woo frintlich dee wieren un waut vonne goode Menschen daut wieren. Ekj docht, daut wieren Heilje. Dee leewden sikj werkjlich unjarenaunda un daut wees mie, daut ekj dän woaren Gloowen jefungen haud (Johanes 13:35).

WOO MIE DAUT TOGOOD KJEEM: Lota leet ekj mie deepen un lieed eene sea feine Fru kjanen, waut Diane heet. See wia aus eent von Jehova siene Zeijen oppjewossen un see haud väl goodet aun sikj, waut ekj sea jleicht. Lota befried wie ons. Ekj sie Jehova sea dankboa, daut ekj soone leeftolje Fru hab, waut mie soo sea unjastett.

Diane un mie jankad daut sea, no soone Städ to trakjen, wua daut aun mea Help fäld toom de goode Norecht ut de Schreft prädjen. Aune 2010 trock wie dan no Belize, Meddel-Amerika. Hia doo wie to soone Menschen prädjen, waut sea no de Woarheit ut de Schreft hinjaraun sent un Gott leewen.

Ekj sie sea tofräd, daut ekj entlich de Woarheit äwa Gott un sien Wuat, de Bibel, weet. Ekj bruck miene gaunze Tiet em Deenst un doawäajen hab ekj aul kunt väl Menschen halpen, de Woarheit ut de Schreft to lieren. Daut jeft nuscht waut bätret aus to seenen, daut de Schreft wäm sien Läwen vebätat, soo aus dee mient uk haft. Un nu hab ekj de baste Wajch jefungen, Gott to danken, fa daut goode Läwen, waut ekj hab.

“Dee wieren sea leeftolich to mie” (MAURÍCIO ARAÚJO)

WANEA JEBUAREN: 1967

VON WOON LAUNT: BRASILIEN

WAUT EKJ EA WIA: EKJ FIEED EEN SCHWIENSCHET LÄWEN

MIENE VEGONENHEIT: Ekj woss en Avaré opp, daut es eene kjliene Staut en de Prowins São Paulo. De mieeschte Menschen, waut doa wonen, haben daut nich riew.

Mien Voda storf, aus miene Mame schwanga wia met mie. Aus kjliena Jung trock ekj mie foaken miene Mame äare Kjleeda aun, wan see nich tus wia. Ekj funk mie aun soo opptostalen aus eene Mejal un de Menschen jleewden, daut ekj Junges jleicht. Lota funk ekj aun, Sex to haben met aundre Junges un Mana.

Aus ekj rom 20 Joa wia, wankt ekj no Städen, wua se daunzen un supen deeden un mau rajcht no Kjoakjen toom seenen, aus ekj doa wäm funk, met wäm ekj kunn Sex haben – endoont aus daut Mana ooda Frues wieren. Un en de Tiet, wua doa besondre Fasten wieren, trock ekj mie soo aun aus eene Fru un daunzt oppe Gaussen mank eene Häad Menschen. Ekj wia sea bekaunt.

Mank miene Frind wieren Mana, waut Mana jleichten, Frues, waut Frues jleichten, Huaren un soone, waut von Droggs aufhenjich wieren. Eenje von dee beräden mie, daut ekj mol sull Kokaina (Crack) schmieekjen un dan wort ekj aufhenjich doavon. Eenjemol deed wie de gaunze Nacht äwa Kokaina schmieekjen. Un opp aundatsmol bleef ekj uk dän Dach äwa auleen toom schmieekjen. Ekj wort soo aufjemuckat, daut de Menschen aunfungen to sajen, daut ekj AIDS (SIDA) haud.

WOO MIEN LÄWEN SIKJ DERCH DE SCHREFT JEENDAT HAFT: Rom dee Tiet bejäajend ekj dan Jehova siene Zeijen. Dee wieren sea leeftolich to mie. Eent von de Bibelvarzhen, waut dee mie väaläsden, wia Reema 10:13 (PB). Doa sajcht daut: “Wäaemma dän Harn en sien Nomen aunroopt, woat seelich woaren”. Dis Varsch lieed mie, daut daut wichtich es, dän Harn sienen Nomen, Jehova, to brucken. Foaken, wan ekj de Nacht äwa haud Kokaina jeschmieekjt, dan muak ekj daut Fensta op un kjikjt nom Himmel un road un bäd to Jehova, daut dee mie doch sull halpen.

Ekj sorjd mie äwa miene Mame, wiels ar daut soo sea toosad, daut ekj Droggs brukt. Un doawäajen wull ekj proowen, doamet opptohieren. Boolt no daut funk ekj aun, met de Zeijen toop de Schreft to studieren. Un dee säden to mie, daut mie daut wudd halpen, opptohieren met Droggs brucken, un daut deed uk!

Aus ekj wieda de Schreft studieed, wort ekj en, daut ekj uk noch aundre Sachen en mien Läwen endren must. Fa mie wia daut besonda schwoa, opptohieren een homoseksuellet Läwen to fieren, wiels ekj daut aul von soo junk aun jedonen haud. Eent, waut mie sea holp, wia, opptohieren met miene ieeschtemmasche Frind toop to sennen un ekj jinkj uk nich mea no soone Städen, wua se daunzen un supen doonen.

Wan daut fa mie uk aules sea schwoa wia, treest mie daut oba sea to lieren, daut Jehova werkjlich om mie bekjemmat wia un daut vestonen kunn, woo sea ekj doamet kjamft (1. Johanes 3:19-20). Bat de 2002 haud ekj gaunz oppjehieet met mien homoseksuellet Läwen. En daut Joa leet ekj mie dan aus eent von Jehova siene Zeijen deepen.

WOO MIE DAUT TOGOOD KJEEM: Miene Mame freid sikj sea, daut ekj mie soo sea endad un doawäajen funk see uk aun, de Schreft to studieren. Lota haud see eenen Schlach un doawäajen es see met äare Jesuntheit schlajcht auf, oba see leeft Jehova un de Woarheit ut de Schreft.

Fa de latste acht Joa hab ekj miene gaunze Tiet jebrukt, aundre von de Schreft to lieren. Ekj mott daut toostonen, daut ekj eenjemol hab must jäajen orrajchte Wenschen kjamfen. Oba mie jeft daut Moot to weeten, daut Jehova daut freit, wan ekj jäajen dise orrajchte Wenschen kjamf un dee nich nogo.

Jehova noda to komen un soo to läwen, aus am daut jefelt, haft mie jeholpen, daut ekj mie selfst mea wieet acht. Vondoag dän Dach sie ekj een schaftja Maun.

“Ekj wia een Tonkje onen Boddem”(LUKA ŠUC)

WANEA JEBUAREN: 1975

VON WOON LAUNT: SLOWEENIEN

WAUT EKJ EA WIA: EEN SUPA

MIENE VEGONENHEIT: Ekj wia en Ljubljana, de Hauptstaut von Sloweenien jebuaren. Ekj haud eene scheene Kjintheit bat ekj vea Joa oolt wia. Dan neem mien Voda sikj daut Läwen. Un wäajen dit schlemme passieet wia, must miene Mame sea schaufen, daut see kunn daut Broot oppem Desch kjrieen fa twee haulfwaussende Junges – daut wieren ekj un mien elra Brooda.

Aus ekj 15 Joa wia, trock ekj no miene Groosmame. Ekj jleicht daut, bie ar to wonen, wiels doa dicht bie wonden väl von miene Frind. Un ekj haud doa uk mea Frieheit, aus ekj tus haud. Aus ekj 16 wia funk ekj aun, met soone Menschen toop to sennen, waut utgangs Wäakj emma drinkjen deeden. Ekj leet mie de Hoa lank waussen, trock mie endoontich aun un lota deed ekj uk schmieekjen.

Ekj proowd veschiedne Droggs, oba ekj jleicht daut dolla stoakjet drinkjen. Ieescht drunk ekj bloos een poa Jläsa Wien, oba boolt deed ekj eene Buddel opp eemol. Aun mie wia daut goanich entowoaren, woo besopen ekj wia, wäajens ekj daut sea fein vestunt plietsch to hoolen. Foaken wia daut bloos aun mie to rikjen, daut ekj jedrunken haud. Oba nich mol dan wisten de Menschen, daut ekj haud een poa Lieta Wien ooda Bea utjesopen, un daut noch met Vodka toop!

Foaken wieren ekj un miene Frind de Nacht äwa wua toom daunzen un supen. Wan ekj uk noch sooväl jedrunken haud aus dee, wia ekj oba deejanja, waut dee halpen kunn, oppe Been to bliewen. Eenen Dach deed eent von miene Frind mie domm sajen un säd, ekj wia een Tonkje onen Boddem. Daut es opp onse Sproak sea hunjsch un daut woat to soone jesajcht, waut Supa sent. Daut sad mie sea too.

Ekj funk aun, doaräwa notodenkjen, waut ekj verheipts met mien Läwen deed, un dan feeld ekj mie nuscht wieet. Daut wia fa mie soo, aus wan nuscht, waut ekj deed, waut enhilt.

WOO MIEN LÄWEN SIKJ DERCH DE SCHREFT JEENDAT HAFT: To deeselwje Tiet kunn ekj beoobachten, daut eent von miene Schoolpoatna sikj aunfunk to endren: hee wort een bätra Mensch. Daut muak mie nieschierich un ekj kroagd am toom toop eenen Koffe drinkjen. Un dee vetald mie, daut hee haud aunjefongen, met Jehova siene Zeijen toop de Schreft to studieren. Hee räd von daut, waut hee lieed, oba daut wia aula gaunz framd fa mie, wiels ekj wia kjeenmol no de Kjoakj jewankt un ekj haud uk nienich de Schreft jeläst. Ekj funk aun no de Toopkomes von Jehova siene Zeijen to wanken un met dee toop de Schreft to studieren.

En de Schreft lieed ekj välet, waut mie bat doa brocht, daut ekj wull mien Läwen endren. Biejlikj lieed ekj, daut wie nu en eene Tiet läwen, waut de Schreft “de latste Doag” nant (2. Timotäus 3:1-5, PB). Ekj lieed uk, daut Gott boolt woat de schlajchte Menschen äwatsied schaufen un daut de goode woaren kjennen fa emma en een scheenet Paradies hia oppe Ieed läwen (Psalm 37:29). Un dan jankad mie daut sea, mien Läwen to endren un uk eent von dise goode Menschen to woaren.

Ekj funk aun, miene Frind doavon to vetalen, waut ekj ut de Schreft lieed. De mieeschte hauden sikj domm äwa mie, oba daut holp mie mau rajcht. Ekj wort en, daut et nich werkjelje Frind wieren. Un mie wort daut uk dietlich, daut daut väl doamet to doonen haud, met wäm ekj toop wia, daut ekj supen deed. Dee luaden bloos de Wäakj äwa, daut dee sikj wada kunnen toop besupen.

Ekj hieed opp met dee toop to sennen. Enne Städ daut, wia ekj met miene niee Frind toop, waut Jehova siene Zeijen wieren. Daut wieren soone Menschen, waut Gott opp iernst leewden un uk proowden daut notokomen, waut sien Jesaz sajcht. Dee muaken mie sea Moot un met de Tiet kunn ekj dan von de Suparie looskomen.

WOO MIE DAUT TOGOOD KJEEM: Ekj sie Jehova dankboa, daut mie daut nich mea aun stoakjet fält toom schaftich sennen. Ekj weet nich, wua daut met mie wudd sennen hanjegonen, wan ekj soo haud wiedajemoakt. Gaunz secha hab ekj nu een väl bätret Läwen.

Fa de latste säwen Joa hab ekj kunt en daut Betel von Jehova siene Zeijen en Sloweenien deenen. Jehova to kjanen un am to deenen haft mie werkjlich eenen Senn jejäft em Läwen.