Waut jesajcht woat: Jehova siene Zeijen doonen nich Wienachten fieren, wiels dee nich aun Jesus jleewen.

 Woo daut es: Wie sent Christen. Wie jleewen, daut eena bloos derch Jesus Christus kaun jerat woaren (Aposteljeschicht 4:12).

 Waut jesajcht woat: Jie brinjen Famieljes uteneen, wiels jie nich Wienachten fieren.

 Woo daut es: De Famielje es ons sea wichtich, un wie brucken de Bibel, om Famieljes to halpen, veeent to bliewen.

 Waut jesajcht woat: Jie loten junt de scheene Wienachten derchgonen, wua aules soo frädlich es un aule soo friejäwrich sent un aundre goots doonen wellen.

 Woo daut es: Wie bemieejen ons jieda Dach, friejäwrich to sennen un met aundre Fräd to haben (Spricha 11:25; Reema 12:18). Wan wie biejlikj onse Toopkomes haben ooda prädjen, doo wie daut soo, aus Jesus säd: “Jie haben daut emsonst jekjräajen, jäft daut uk emsonst wieda” (Matäus 10:8, De Plautdietsche Bibel). Wie wiesen de Menschen uk, daut bloos Gott sien Rikj werkjlich fa Fräd oppe Ieed sorjen woat (Matäus 10:7).

•   Jesus jeef siene Nofolja daut Jeboot, aun sienen Doot to denkjen, nich aun siene Jeburt (Lukas 22:19-20).

•   Jesus siene Apostel un siene Jinja ieeschtemma fieeden nich Wienachten. De New Catholic Encyclopedia sajcht: “Met Wienachten fieren funk daut mau aune 243 [e.o.T.] aun”; daut wia mea aus hundat Joa nodäm daut de latsta Apostel jestorwen wia.

•   Daut jeft kjeenen Bewies doafäa, daut Jesus aum 25. Dezamba jebuaren es; de Dotem von Jesus siene Jeburt es nich en de Bibel.

•   Wie sent ons secha, daut Gott aun Wienachten kjeenen Jefaulen haft, wiels daut von de Heiden äare Sitten un Jewanheiten häakjemt (2. Korinta 6:17).

 Väle fieren Wienachten, wan dee uk weeten, daut daut von de Heiden häakjemt un nich von de Bibel. Veleicht sajen soone Menschen: “Wuarom sullen Christen sikj jäajen de Mierheit stalen? Wuarom sull eena doa soo neiw met sennen?”

 De Bibel rot ons too, selfst notodenkjen un onse Venunft to brucken (Reema 12:1-2, Neue-Welt-Übersetzung). Dee lieet ons, de Woarheit wieet to achten (Johanes 4:23-24). Daut es nich, daut wie doa nuscht om romjäwen, woo aundre äwa ons denkjen, oba wie wellen ons aun biblische Gruntsauzen hoolen, aus aundre daut nu fa goot aunseenen ooda nich.

 Wan wie selfst uk nich Wienachten fieren wellen, hool wie aundre doa oba nich von auf. Wie weeten, jieda eena haft daut Rajcht, en dise Sach selfst to entscheiden.