ہر بندے دا کوئی نہ کوئی ناں ہوندا اے۔ تے فیر کیہہ ایہہ ضروری نئیں کہ خدا دا وی اِک ذاتی ناں ہووے؟ کسے نال دوستی کرن لئی اوہدا ناں جاننا تے اوہنوں استمال کرنا ضروری ہوندا اے۔ ایہہ گل خدا نال دوستی کرن بارے وی سچ اے۔‏

 پاک کلام چ خدا نے دَسیا:‏ یہوواہ مَیں آں۔ ایہو ای میرا ناں اے۔ (‏یسعیاہ 42:‏8‏)‏ ایہہ سچ اے کہ خدا دے بوہت سارے لقب نیں جیویں کہ ”‏خدایِ قادر (‏قدرت والا خدا)‏“‏ ،’‏ کائنات دا مالک‘‏ تے ”‏خالق“‏ پر خدا نے اپنے بندیاں نُوں ایہہ اعزاز دِتا اے کہ اوہ اوہدا ذاتی ناں لے کے اوہدے نال گل کرن۔—‏پیدایش 17:‏1؛‏ اعمال 4:‏24؛‏ 1-‏پطرس 4:‏19‏۔‏

 بائبل دے بوہت سارے ترجمیاں چ خروج 6:‏3 چ خدا دا ذاتی ناں موجود اے۔ ایس ایت چ خدا نے کہیا:‏مَیں ابراہام تے اِضحاق تے یعقوب نُوں قادرِمطلق خدا دے طور تے نظر آیا پر اپنے یہوواہ ناں توں اوہناں تے ظاہر نہ ہویا۔‏

 پنجابی زبان چ خدا دا ناں عام طور تے ”‏یہوواہ “‏ لکھیا جاندا اے تے ایہہ کافی عرصے توں استمال ہو رہیا اے۔ بائبل دا پہلا حصہ (‏یاں پُرانا عہدنامہ)‏ زیادہ‌تر عبرانی زبان چ لکھیا گیا سی۔ عبرانی زبان چ خدا دے ناں دے چار ہجے ایہہ نیں:‏ יהוה۔ ایہناں ہجیاں نُوں پنجابی زبان چ ایس طرحاں لکھیا جاندا اے:‏ ی-‏ہ-‏و-‏ہ۔‏