حد چ رہ کے شراب پینا گُناہ نئیں اے پاک کلام چ دَسیا گیا اے کہ مے خدا وَلّوں اِک تحفہ اے جیہڑی انسان دے دل نُوں خوش کردی اے۔ (‏زبور 104:‏14، 15؛‏ واعظ 3:‏13؛‏ 9:‏7‏)‏ ایہدے چ ایہہ وی دَسیا گیا اے کہ مے نُوں دَوائی دے طور تے وی استمال کیتا جا سکدا اے۔—‏1-‏تیمُتھیُس 5:‏23‏۔‏

 جدوں یسوع زمین تے سی تے اوہ وی مے پیندا سی۔ (‏متی 26:‏29؛‏ لُوقا 7:‏34‏)‏ یسوع مسیح دے مشہور معجزیاں وچوں اِک ایہہ سی کہ اوہنے اِک شادی دے موقعے تے پانی نُوں مے بنا دِتا۔—‏یوحنا 2:‏1-‏10‏۔‏

حدوں ودھ شراب پین دے نقصان

 بھانویں کہ پاک کلام چ شراب پین بارے کجھ چنگیاں گلاں دَسیاں گئیاں نیں پر ایہدے چ حدوں ودھ شراب پین تے شراب دے نشے چ ٹن ہون توں سختی نال منع کیتا گیا اے۔ ایس لئی جے اِک مسیحی شراب پین دا فیصلہ کردا اے تے اوہنوں حد چ رہ کے شراب پینی چاہی دی اے۔ (‏1-‏تیمُتھیُس 3:‏8؛‏ طِطُس 2:‏2، 3‏)‏ پاک کلام چ حدوں ودھ شراب پین دے کئی نقصان دَسے گئے نیں۔‏

•   حدوں ودھ شراب پین دی وجہ توں اِک انسان دی سوچن سمجھن تے صحی فیصلے کرن دی صلاحیت کمزور پے جاندی اے۔ (‏امثال 23:‏29-‏35‏)‏ جیہڑا بندہ نشے چ ٹن ہوندا اے اوہ پاک کلام دی ایس ہدیت تے عمل نئیں کر سکدا:‏ اپنے جسم نُوں اِک ایہو جہی قربانی دے طور تے پیش کرو جیہڑی زندہ، پاک تے خدا نُوں پسند اے، یعنی اپنی سوچن سمجھن دی صلاحیت نُوں استمال کر کے مُقدس خدمت کرو۔—‏رومیوں 12:‏1‏۔‏

•   حدوں ودھ شراب پین دی وجہ توں اِک بندے دے ہوش قائم نئیں رہندے تے اوہنوں چنگے بُرے دی سمجھ وی نئیں رہندی۔ ایہدے نال نال صحی کم کرن دا اوہدا عزم وی کمزور پے جاندا اے۔—‏ہوسیع 4:‏11؛‏ اِفسیوں 5:‏18‏۔‏

•   حدوں ودھ شراب پین نال اِک شخص نُوں غریبی تے صحت دے وڈے مسئلیاں دا سامنا کرنا پے سکدا اے۔—‏امثال 23:‏21،‏ 31، 32‏۔‏

•   حدوں ودھ شراب پین تے ایہدے نشے چ ٹن ہون توں خدا ناراض ہوندا اے۔—‏امثال 23:‏20؛‏ گلتیوں 5:‏19-‏21‏۔‏

حدوں ودھ شراب پین دا کیہہ مطلب اے؟‏

 جدوں اِک بندے دے شراب پین دی وجہ توں اوہنوں یاں دُوجیاں نُوں نقصان پونچن دا خطرہ ہوئے تے ایہدا مطلب اے کے اوہنے حدوں ودھ شراب پی لئی اے۔ پاک کلام دے مطابق اِک بندے دے بے‌ہوش ہو جان نال ایہہ ظاہر نئیں ہوندا کہ اوہ شراب دے نشے چ ٹن ہو گیا اے۔ اصل چ ایس گل دا اندازہ اوہدیاں کجھ حرکتاں توں لایا جا سکدا اے۔ جیویں کہ بھٹک جانا، ڈولنا، لڑائی جھگڑا کرنا یاں پٹھیاں سدھیاں گلاں کرنا۔ (‏ایوب 12:‏25؛‏ زبور 107:‏27؛‏ امثال 23:‏29، 30،‏ 33‏)‏ جیہڑے لوک شراب دے نشے چ ٹن ہون توں بچن دی کوشش کردے نیں، اوہناں دے دل وی حدوں ودھ شراب پین دی وجہ توں دَب سکدے نیں تے اوہناں نُوں بڑا نقصان ہو سکدا اے۔—‏لُوقا 21:‏34، 35‏۔‏

اِک بندے نُوں کدوں شراب بالکل نئیں پینی چاہی دی؟‏

 پاک کلام چ کجھ ایہو جہی صورتحال بارے دَسیا گیا اے جدے چ اِک بندے نُوں بالکل شراب نئیں پینی چاہی دی۔‏

•   جے اوہدے شراب پین دی وجہ توں دُوجیاں نُوں ٹھوکر لگدی اے۔—‏رومیوں 14:‏21‏۔‏

•   جے اوہدے ملک چ شراب پینا منع اے۔—‏رومیوں 13:‏1‏۔‏

•   جے اوہنوں شراب پیندے ویلے اپنا ہتھ روکنا مشکل لگدا اے۔ جیہڑے لوکاں نُوں شراب پین دی عادت سی تے جیہڑے شراب دا نشہ کردے سن اوہناں نُوں شراب بالکل نئیں پینی چاہی دی۔—‏متی 5:‏29، 30‏۔‏