‏”‏میں بائبل پڑھن دی کوشش تے کرنی آں پر میں سوچنی آں کہ ایہہ اینی موٹی کتاب اے، ایہنوں پڑھنا میرے وَس دی گل نئیں۔“‏—‏بریانہ‏، عمر 15 سال

 کیہہ تُسی وی اِنج محسوس کردے اوہ؟ جے ہاں، تے ایہہ مضمون تواڈی مدد کر سکدا اے۔‏

•  بائبل پڑھنا فائدےمند کیوں اے؟‏

•  مینوں بائبل کیویں پڑھنی چاہی دی اے؟‏

•  ایہدے بارے دُوجے نوجواناں دا کیہہ خیال اے؟‏

 کیہہ بائبل پڑھن دے خیال توں ای توانوں بوریت محسوس ہون لگ پیندی اے؟ جے تواڈا جواب ہاں اے تے ایہدی وجہ شاید ایہہ وے کہ تُسی بائبل نُوں اِک ایہو جہی کتاب سمجھدے اوہ جیہڑی بوہت موٹی اے، جدی لکھائی بوہت چھوٹی اے تے جدے چ کوئی تصویراں وی نئیں۔ایس لئی شاید توانوں کوئی فلم وغیرہ ویکھنا زیادہ چنگا لگے۔‏

 ذرا سوچو:‏ جے توانوں قیمتی موتیاں نال بھریا کوئی پرانا صندوق لبھے تے کیہہ تواڈا دل نئیں کرے گا کہ تُسی اوہنوں کھول کے ویکھو کہ اوہدے اندر کیہہ اے۔‏

 بائبل وی اِک ایہو جئے صندوق وانگوں اے۔ ایہدے چوں توانوں قیمتی ہیرے موتیاں وانگوں سمجھ‌داری دِیاں گلاں تے چنگے مشورے مِلن گے جنہاں دی مدد نال تُسی:‏

•   چنگے فیصلے کر سکو گے۔‏

•   اپنے ماں پیو نال پیار نال رہ سکو گے۔‏

•   چنگے دوست بنا سکو گے۔‏

•   پریشانیاں نال نبڑ سکو گے۔‏

 پر اینی پرانی کتاب اَج وی فائدے مند کیویں ہو سکدی اے؟ ایہدی وجہ ایہہ وے کہ پاک صحیفیاں وچ جو کجھ وی لکھیا اے اوہ خدا دے اِلہام توں اے۔ ‏(‏2-‏تیمُتھیُس 3:‏16‏)‏ ایہدا مطلب ایہہ وے کہ بائبل چ لکھیاں ہدیتاں کائنات دی سب توں سمجھ‌دار ہستی وَلّوں نیں۔‏

 اِک طریقہ ایہہ وے کہ تُسی ایہنوں شروع توں لے کے آخر تک پڑھو۔‏ ایس طرحاں تُسی ایہہ جان پاؤ گے کہ بائبل دا پیغام کیہہ اے۔ تُسی بائبل نُوں پڑھن دے بوہت سارے طریقے ازما سکدے او۔ ذرا ایہناں دو طریقیاں تے غور کرو:‏

•    تُسی بائبل دِیاں 66 کتاباں نُوں اوسے ترتیب نال پڑھ سکدے اوہ جیس ترتیب نال اوہ لکھیاں گئیاں نیں یعنی پیدائش توں لے کے مکاشفہ تک۔‏

•    تُسی بائبل چ لکھے واقعے اوسے ترتیب نال پڑھ سکدے او جیس ترتیب نال او ہوئے سن۔‏

 مشورہ:‏ کتاب ‏”‏کتابِ‌مُقدس کی تحقیق کے لیے گائیڈ“‏ چوں حصہ ‏”‏یسوع کی زندگی کے اہم واقعات“‏ نُوں ویکھو۔ایہدے چ زمین تے یسوع دی زندگی دے اہم واقعے اوسے ترتیب نال لکھے گئے نیں جیویں اوہ ہوئے سن۔‏

 دُوجا طریقہ ایہہ وے کہ تُسی کوئی ایہو جیہا واقعہ پڑھو جیہڑا اوس مشکل چ تواڈے کم آ سکدا اے جدا توانوں سامنا ہو رہیا اے۔‏ مثال لئی:‏

•    کیہہ تُسی اِک ایہو جہے بندے نال دوستی کرنا چاہندے اوہ جدے تے تُسی بھروسا کر سکو؟ ایہدے لئی توانوں بائبل چوں داؤد تے یونتن دی کہانی پڑھنی چاہی دی اے۔ (‏1-‏سموئیل 18-‏20 باب)‏ یہدے چ تُسی ویکھ سکو گے کہ داؤد چ کیہڑیاں خوبیاں سن جنہاں دی وجہ توں یونتن نے اوہدے نال دوستی کیتی ہونی اے۔‏

•    کیہہ تُسی ازمیشاں دا سامنا کرن لئی اپنے آپ نُوں مضبوط کرنا چاہندے او؟‏ ایہدے لئی تُسی یوسف دی زندگی تے غور کرو کہ اوہنے ازمیشاں دا سامنا کیویں کیتا۔(‏پیدائش 39 باب)‏ تے فیر اُردو زبان چ ساڈی ویب‌سائٹ jw.org تے ‏”‏پاک کلام کی ڈرامائی ریکارڈنگ‏“‏ ‏”‏یہوواہ یوسف کے لیے محبت اور رحم ظاہر کرتا رہا‏“‏ نُوں سنوُ تے غور کرو کہ یوسف نُوں ازمیشاں دا سامنا کرن دی طاقت کتھوں ملی۔‏

•    کیہہ تُسی ایہہ جاننا چاہندے او کہ دُعا چ کِنّی طاقت اے؟‏ تے فیر نحمیاہ دے واقعے تے غور کرو۔ (‏نحمیاہ 2 باب)‏ تے ڈرامہ ‏”‏نحمیاہ:‏ یہوواہ وَلّوں مِلن والی خوشی تواڈی پناہ اے–‏حصہ 1 تے حصہ 2‏“‏ نُوں ویکھو۔ فیر اوہناں گلاں تے غور کرو جنہاں توں پتہ چلدا اے کہ نحمیاہ نُوں اوہدی دُعاواں دا جواب ملیا سی۔‏

 مشورہ:‏ تُسی بائبل کسے ایہو جہی جگہ تے پڑھو جِتھے شور نہ ہوئے، اِنج تواڈا پورا دھیان ایہدے تے رہوے گا۔‏

 تیجا طریقہ ایہہ وے کہ تُسی کجھ ایتاں یاں زبور چُنو تے اوہناں نُوں پڑھو تے فیر ایس گل تے غور کرو کہ جو کجھ تُسی پڑھیا اے اوہدے تے تُسی کیویں عمل کر سکدے او۔‏ پڑھن دے بعد اپنے آپ کولوں کجھ ایہو جہے سوال پچھو:‏

•    یہوواہ خدا نے ایہہ گل بائبل چ کیوں لکھوائی اے؟‏

•    ایہدے توں میں یہوواہ خدا بارے تے اوہدے کم کرن دے طریقے بارے کیہہ سکھنا واں؟‏

•    میں ایہناں گلاں تے کیویں عمل کر سکنا واں؟‏

 مشورہ:‏ بائبل پڑھن دا منصوبہ بناؤ۔ جدوں تُسی بائبل پڑھنا شروع کردے اوہ تے تُسی اوہ تریخ لکھ لیا کرو۔ ایہدے لئی ‏”‏بائبل پڑھنے کے لئے شیڈول“‏ نُوں استمال کرو۔ ایہہ شیڈول اُردو زبان چ ساڈی ویب‌سائٹ jw.org تے ملے گا۔‏