اِفسیوں دے ناں خط 4:1-32
4 ایس لئی مَیں جیہڑا مالک دی خاطر قید آں، تواڈی مِنت کرنا واں کہ تُسی اپنے چالچلن توں ظاہر کرو کہ تُسی اوس بلاوے دے لائق او جیہڑا توانوں ملیا اے
2 یعنی پوری خاکساری، نرمی تے صبر نال پیش آؤ تے پیار دی وجہ توں اِک دُوجے دی برداشت کرو۔
3 پاک روح دے ذریعے تواڈے چ صلح دا بندھن قائم ہویا اے۔ ایس لئی اپنا ایکا مضبوط رکھن دی پوری کوشش کرو۔
4 اِک ای جسم اے، اِک ای پاک روح اے، امید وی اِک ای اے جدے لئی توانوں بلایا گیا اے۔
5 اِک ای مالک اے، اِک ای ایمان اے، اِک ای بپتسمہ اے
6 تے ساریاں دا خدا تے باپ وی اِک ای اے جیہڑا ساریاں تے اِختیار رکھدا اے، ساریاں دے ذریعے کم کردا اے تے جدی پاک روح ساریاں تے اثر کردی اے۔
7 خدا نے ساڈے ساریاں تے عظیم رحمت کیتی تے مسیح دے ذریعے ساڈے ساریاں چ ایہہ نعمت وَنڈی۔
8 ایس لئی پاک کلام چ لکھیا اے: ”جدوں اوہ اُتے گیا تے اوہنے قیدیاں نُوں رِہا کروایا تے اپنے لوکاں* نُوں ایہہ آدمی نعمتاں دے طور تے بخشے۔“
9 ایس گل دا کیہہ مطلب اے کہ ”اوہ اُتے گیا؟“ ایہہ کہ پہلاں اوہ تھلے اُتریا سی یعنی زمین تے آیا سی۔
10 جیہڑا تھلے اُتریا سی، اوہی اسماناں توں وی اُتے گیا تاکہ اوہ ساریاں گلاں نُوں پورا کرے۔
11 اوہنے کلیسیا نُوں کجھ آدمی رسولاں دے طور تے، کجھ نبیاں دے طور تے، کجھ مُناداں* دے طور تے، کجھ چرواہیاں تے اُستاداں دے طور تے دِتے
12 تاکہ اوہ مُقدس لوکاں دی تربیت کرن،* خدمت کرن تے کلیسیا نُوں مضبوط کرن جیہڑی مسیح دا جسم اے۔
13 اوہ اوہدوں تک اِنج کردے رہن گے جدوں تک اَسی سارے ایمان چ اِک مُٹھ نئیں ہو جاندے، خدا دے پُتر بارے صحی علم حاصل نئیں کر لیندے تے پوری طرحاں پُختہ نئیں ہو جاندے یعنی مسیح دے پورے قد کاٹھ تک نئیں پونچ جاندے۔
14 ایس لئی ہُن سانوں بچے نئیں بنے رہنا چاہی دا تے جیویں اِک کشتی سمندر وچ لہراں دی وجہ توں ایدھر اودھر ڈولدی اے، اونویں سانوں چالباز تے مکار لوکاں دی دھوکھا دین والی تلیم دی وجہ توں ایدھر اودھر نئیں ڈولنا چاہی دا۔
15 پر آؤ اَسی سچ بولیئے تے پیار ظاہر کردے رہیے۔ اِنج اَسی اپنے سربراہ* یعنی مسیح دے تابع رہ کے ہر معاملے چ پُختہ بن دے جانواں گے۔
16 اَسی سارے اِک جسم دے فرق فرق حصیاں وانگوں آں تے مسیح ایس جسم دا سِر اے۔ اوہدے ذریعے جسم دے سارے حصے ترتیب نال جُڑے ہوئے نیں تے ہر جوڑ دی مدد نال مِل کے کم کردے نیں۔ جدوں ہر حصہ چنگی طرحاں کم کردا اے تے جسم ودھدا پُھلدا اے تے پیار دی وجہ توں ہور مضبوط ہوندا جاندا اے۔
17 ایس لئی مَیں توانوں مالک دے ناں تے تاکید کرنا واں کہ تُسی دُنیا دے لوکاں وانگوں چلنا چھڈ دَوو جیہڑے اپنی فضول سوچ دے مطابق چلدے نیں۔
18 اوہناں دی عقل اُتے نھیرا چھایا ہویا اے تے اوہ اوس زندگی توں بوہت دُور نیں جیہڑی خدا وَلّوں مِلدی اے کیونکہ اوہ خدا نُوں جاننا ای نئیں چاہندے تے اوہناں دے دل سُن ہو گئے نیں۔
19 اوہ بےشرمی دِیاں ساریاں حداں پار کر گئے نیں تے بےحیائی نال غلط کم* کرن چ لگے رہندے نیں تے بڑے شوق* نال ہر طرحاں دا گندا کم کردے رہندے نیں۔
20 پر تُسی جان دے او کہ مسیح ایہو جیہا نئیں اے
21 سگوں اوہدے چ سچائی وَسدی اے۔ جے تُسی اوہدیاں گلاں سُنیاں ہوندیاں تے اوہدے کولوں سکھیا ہوندا تے توانوں ایہہ سب کجھ پتہ ہوندا۔
22 توانوں سکھایا گیا سی کہ تُسی اپنی پرانی شخصیت* نُوں لا کے سُٹ دَوو جیہڑی تواڈے پرانے چالچلن دے مطابق اے تے دھوکھا دین والیاں خواہشاں دی وجہ توں وِگڑدی جا رہی اے۔
23 تُسی اپنی سوچ نُوں نواں بناندے رہوو
24 تے اوس نوِیں شخصیت نُوں پا لوو جیہڑی خدا دی مرضی دے مطابق بنی اے تے جدی بنیاد سچی وفاداری تے نیکی اے۔
25 ہُن تُسی دھوکھا فریب دینا چھڈ دِتا اے، ایس لئی تُسی سارے اِک دُوجے نال سچ بولو کیونکہ اَسی سارے اِکو ای جسم دے حصے آں۔
26 جدوں توانوں غصہ آئے تے گُناہ نہ کرو سگوں سورج ڈُبن توں پہلاں اپنا غصہ تُھک دَوو
27 تے اِبلیس نُوں موقع نہ دَوو۔
28 جیہڑا چوری کردا اے، اوہ چوری کرنا چھڈ دَوے تے سخت محنت کرے تے اپنے ہتھیں ایمانداری نال کمائی کرے تاکہ اوہ ضرورتمنداں دی مدد کر سکے۔
29 تواڈے مُونہوں کوئی بھیڑی* گل نہ نکلے سگوں ضرورت دے مطابق اوہی گل نکلے جنہوں سُن کے دُوجیاں دا حوصلہ ودھے تے اوہناں نُوں فائدہ ہووے۔
30 نالے خدا دی پاک روح نُوں دُکھی نہ کرو جدے نال تواڈے تے اوس دن لئی مُہر لائی گئی اے جدوں توانوں فدیے دے ذریعے چھٹکارا ملے گا۔
31 ہر طرحاں دا ویر، غصہ، قہر، چیخ چیاڑا تے گالیگلوچ کرنا چھڈ دَوو تے کسے وی طرحاں دا بھیڑا کم نہ کرو۔
32 ایہدی بجائے اِک دُوجے نال مہربانی تے بڑی ہمدردی نال پیش آؤ تے دِلوں اِک دُوجے نُوں معاف کرو بالکل اُنج ای جیویں خدا نے مسیح دے ذریعے توانوں دِلوں معاف کیتا اے۔
فٹ نوٹ
^ یعنی کلیسیا۔
^ یاں، ”خوشخبری دی مُنادی کرن والیاں۔“
^ یاں، ”درستی کرن، صحی راہ تے چلن چ مدد کرن۔“
^ یونانی چ: ”جسم دے سِر۔“
^ یاں، ”بےشرم چال چلن۔“ یونانی چ: ”اسیلگیا۔“ ”لفظاں دی وضاحت“ نُوں ویکھو۔
^ یونانی چ: ”لالچ۔“
^ یعنی سوچ تے عادتاں۔
^ یونانی چ: ”گلی سڑی۔“
