کدی کدار ساڈے لئی اوہناں گلاں نُوں یاد رکھنا مشکل ہو سکدا اے جیہڑیاں اَسی پڑھنے آں۔ ایہہ ساڈے ساریاں نال ہوندا اے۔ پر کیہڑی چیز ایہناں گلاں نُوں یاد رکھن چ ساڈی مدد کر سکدی اے؟ خاص نکتیاں دی دہرائی کرن نال ساڈی مدد ہو سکدی اے۔‏

مطالعیا کردے ویلے ایہہ چنگا ہوئے گا کہ اَسی تھوڑی تھوڑی دیر بعد رُک کے خاص نکتیاں تے سوچ‌وچار کرئیے۔ کجھ ایہو جیہا ای مشورہ پولُس رسول نے اوہناں مسیحیاں نُوں دِتا جیہڑے اوہدا خط پڑھ رہے سن۔ پولُس نے کہیا:‏ سب توں خاص گل ایہہ وے۔ (‏عبرانیوں 8:‏1‏)‏ اِنج پولُس نے بھین بھراواں دی ایہہ سمجھن چ مدد کیتی کہ اوہدی گل دا مطلب کیہہ اے نالے جیہڑے نکتیاں بارے اوہ گل کر رہیا اے، اوہ آپس چ کیویں جُڑے ہوئے نیں۔‏

تُسی آخری دس منٹ اوہناں گلاں تے سوچ‌وچار کرن لئی رکھ سکدے او جیہڑیاں تُسی پڑھیاں نیں۔ جے توانوں خاص گلاں یاد نئیں آندیاں تے ذیلی عنوان نُوں فیر توں پڑھو یاں ہر پیراگراف دے پہلے جملے نُوں پڑھو۔ اِنج تُسی خاص نکتیاں نُوں یاد رکھ سکو گے۔ جے تُسی کوئی نوِیں گل سکھی اے تے اوہنوں اپنے لفظاں چ دَسن دی کوشش کرو۔ جدوں تُسی خاص نکتیاں دی دہرائی کرو گے تے تواڈے لئی ایہناں نُوں یاد رکھنا اسان ہوئے گا۔ نالے تُسی ایہہ وی ویکھ سکو گے کہ ایہہ نکتے تواڈے کم کیویں آ سکدے نیں۔‏