یہوواہ خدا شروع توں ای چاہندا اے کہ گھر دے سارے جی رَل کے عبادت کرن۔‏ رَل کے عبادت کرن نال گھر دے جیاں دا خدا نال تے اِک دُوجے نال رشتہ مضبوط ہوندا اے۔‏ (‏اِستثنا 6:‏6،‏ 7‏)‏ ایسے لئی یہوواہ دے گواہ ہر ہفتے خاندانی عبادت لئی وقت کڈھ دے نیں۔‏ ایس دوران گھر دے جی سکون بھرے ماحول وچ اپنیاں ضرورتاں بارے گل بات کردے تے پاک کلام وچوں رہنمائی لیندے نیں۔‏ کلّے رہن والے لوک وی بائبل وچوں اپنی پسند دے کسے موضوع تے غور کرن لئی وقت کڈھ سکدے نیں۔‏ ایس طرحاں خدا نال اوہناں دی دوستی مضبوط ہووے گی۔‏

یہوواہ خدا نال اپنی دوستی مضبوط کرن لئی‏۔‏ بائبل وچ لکھیا اے کہ خدا دے نیڑے جاؤ تے اوہ تواڈے نیڑے آۓ گا۔‏ (‏یعقوب 4:‏8‏)‏ پاک کلام وچوں یہوواہ خدا دیاں صفتاں تے اوہدے کماں بارے سکھ کے اَسی اوہنوں ہور چنگی طرحاں جان سکنے آں۔‏ خاندانی عبادت شروع کرن دا اِک سوکھا طریقہ ایہہ وے کہ تُسی رَل کے پاک کلام نُوں پڑھو۔‏ ایہدے لئی تُسی ‏”‏مسیحی زندگی تے خدمت“‏ دے قاعدے مطابق بائبل پڑھ سکدے او۔‏ گھر دے سارے جی وارو واری کجھ ایتاں پڑھ کے دس سکدے نیں کہ اوہناں نے کیہہ کجھ سکھیا اے۔‏

گھر دے جیاں نال رشتہ مضبوط کرن لئی۔‏ کٹھے خاندانی عبادت کرن نال میاں بیوی دا پیار گُوڑھا ہوندا اے،‏ نالے ماں پیو تے بچے اِک دُوجے دے ہور نیڑے آؤندے نیں۔‏ ایہہ اِک ایسا موقع ہونا چاہیدا اے کہ ساریاں نُوں مزہ آوے تے اوہ ہر ہفتے بےصبری نال ایہدا انتظار کرن۔‏ ماں پیو اپنے بچیاں دی عمر تے ضرورتاں مطابق موضوع چُن سکدے نیں۔‏ ایہدے لئی ‏”‏مینارِنگہبانی“‏ تے ‏”‏جاگو“‏ رسالے یاں ساڈی ویب‌سائٹ jw.org نُوں ویکھو۔‏ تُسی اپنے بچیاں نال سکول وچ آؤن والیاں مشکلاں بارے گل بات کر سکدے او تاکہ اوہ ایہناں دا سامنا کر سکن۔‏ تُسی ‎( JW Broadcastingtv.mt1130.com‎) تے کوئی پروگرام وی ویکھ سکدے او تے فیر اوہدے بارے گل بات کر سکدے او۔‏ خاندانی عبادت دا مزہ دُونا کرن لئی تُسی عبادتاں تے گائے جان والے گیتاں دی تیاری کر سکدے او تے ایہدے بعد کجھ کھان پِین دا انتظام وی کر سکدے او۔‏

ہر ہفتے خاندانی عبادت دے ذریعے گھر دے سارے جی یہوواہ خدا بارے بوہت کجھ سکھ سکدے نیں۔‏ ایس طرحاں اوہناں نُوں خوشی مِلدی اے تے یہوواہ خدا وَلوں ڈھیراں برکتاں وی مِلدیاں نیں۔‏—‏زبور 1:‏1-‏3‏۔‏

• اَسی ہر ہفتے خاندانی عبادت لئی وقت کیوں کڈھنے آں؟‏

• ماں پیو خاندانی عبادت نُوں دلچسپ کیویں بنا سکدے نیں؟‏