Dahme Pwung oh Sapwung: Kaweid me Kak Sawas
Medewehla irair en mour pahieu me aramas rar kei sukuhlki me kaweid en Paipel kan kak sawas oh pil likilik.
1. Pwopwoud
Aramas akan ahneki soangsoangen madamadau duwen pwopwoud oh dahme kin anahn pwe pwopwoud ehu en kak nsenamwahu.
PAIPEL MAHSANIH: “Emenemen kumwail uhdahn pahn kin poakohng eh pwoud lih duwehte eh kin poakohng pein ih, oh ni pali teio, lih pwopwoud men uhdahn pahn kin wauneki laud eh pwoud.”—Episos 5:33.
MET WEHWEHKI: Koht me ketin wiahda koasoandi en pwopwoud, eri e ketin mwahngih dahme anahn pwe pwopwoud ehu en kak nsenamwahu. (Mark 10:6-9) Ma ohlo de liho kin nsenohki eh pwoud laudsang pein ih, ira koaros pahn nsenamwahu. Ohl emen me kin poakohng eh pwoud pahn kasalehda eh limpoak sang eh wiewia oh mwomwen eh kin apwalih. Oh lih emen me kin wauneki eh pwoud pahn kasalehda eh wahu sang ni eh koasoi oh wiewia kan.
KAWEID EN PAIPEL ME KAK SAWAS: Quang oh Thi, sang Vietnam kamehlele me ira sohla kak ahneki nsenamwahu nan ara pwopwoud. Quang sohte kin kadek. E nda: “I sohte nsenohki en Thi pepehm oh I kin kalapw kasarowehdi.” Thi men ira en mweipeseng. E nda: “I pehm me I sohla kak likih de wauneki ei pwoudo.”
Kedekedeo Quang oh Thi esehda dahme Paipel padahngki oh ia duwen ara pahn kapwaiada Episos 5:33 nan ara pwopwoud. Quang nda: “Iretikitik wet sewese ie en kilang me I anahne kin kadek oh kamehlelehiong Thi me I poakepoake oh pahn apwalih eh anahn akan koaros. Ni ei kin wia met, e kin poakohng oh waunekin ie.” Oh Thi nda, “Ni ei kin kapwaiada Episos 5:33 oh wauneki ei pwoudo, ei pwoudo kin poakohng ie, pere ie oh I kin nsenamwahu.”
Pwehn kalaudehla omw wehwehki duwen pwopwoud, wadek Awake! No. 2 2018, oaralap “12 Secrets of Successful Families” nan jw.org.
2. Omw Wiewia ong Meteikan
Aramas kin kalapw wiakauwe meteikan pwehki ar keinek, wehi, mwomwarail, pelien lamalam de ihs me re mwahuki.
PAIPEL MAHSANIH: “Wauneki soangen aramas koaros.”—1 Piter 2:17.
MET WEHWEHKI: Paipel sohte kin padahkihong kitail en kailongki aramas sang ehu keinek de ehu wehi, de aramas me kin wia tiahk en ohl mwahuki ohl de lih mwahuki lih. Ahpw, e kin kangoange kitail en wauneki aramas koaros, sohte lipilipil mehnia keinek de wehi me re kohsang ie de ma re kepwehpwe de semwehmwe. (Wiewia 10:34) Mehnda ma kitail kin sapwungki dahme meteikan kamehlele de mwomwen ar mwekid, kitail pil kak kadekohng oh waunekin irail.—Madiu 7:12.
KAWEID EN PAIPEL ME KAK SAWAS: Mie me ndaiong Daniel en kin wiahki aramas akan sang Asia aramas keper kei ong eh wehi. E kailongkihla koaros me kohsang Asia oh e kin kalapw kauwe irail mwohn aramas. Daniel nda: “I medewe me I kin utung ei wehi. I pil sohte medewe me ei madamadau oh wiewia kan me sapwung.”
Kedekedeo Daniel esehda dahme Paipel padahngki. Daniel nda: “I anahne wekidala douluhl ei madamadau. I anahne ahneki sapwellimen Koht madamadau, me iei kitail koaros duwepenehte sohte lipilipil ia wasa kitail kohsang ie.” Daniel kawehwehda ia eh pepehm met ni eh kin tuhwong aramas akan. E nda: “I sohla kin medewe ia wasa re kohsang ie. Met I poakepoake soangen aramas koaros oh mie kompoakepahi keren kan nan sampah pwon.”
Pwehn kalaudehla omw wehwehki, wadek Awake! No. 3 2020, oaralap “Is There a Cure for Prejudice?” nan jw.org.
3. Mwohni
Aramas tohto kin nantihong kepwehpwehla pwe ren kak nsenamwahu oh ahneki mour mwahu ni ahnsou kohkohdo.
PAIPEL MAHSANIH: “Erpit kin wia mehn perehre duwehte mwohni eh kin wia mehn perehre, ahpw kamwahupen loalokong iei met: Erpit kin doare mouren aramas.”—Eklesiasdes 7:12, NW.
MET WEHWEHKI: Kitail anahne mwohni ahpw e sohte kak pwainda atail nsenamwahu oh mour ni ahnsou kohkohdo. (Lepin Padahk 18:11; 23:4, 5) Ahpw, nsenamwahu mehlel oh mour mwahu ni ahnsou kohkohdo kin kohsang atail kapwaiada erpit sang Koht me mi nan Paipel.—1 Timoty 6:17-19.
KAWEID EN PAIPEL ME KAK SAWAS: Cardo, ohl emen nan Indonesia kin nantihong kepwehpwehla. E nda: “I ahneki soahng koaros me pali moron en aramas men ahneki. I kak seiloak, pwainda kepwe pweilaud kan, sidohsa oh ihmw kan.” Ahpw nekila nah mwohni. Cardo nda: “Mie me pitihiehdi, oh mwohni ko me I doadoahk laudki erein sounpar ko koaros sohrala ni marepteieu. I doadoahk laud sounpar tohto pwe I en kepwehpwehla, ahpw I mwoarosala pwehki sohla ahi mehkot oh I pehm sohla katepei.”
Cardo eri tepida kapwaiada kaweid en Paipel duwen mwohni. E sohla kin nantihong kepwehpwehla ahpw e pilada en ahneki mour me sohte kedirepwki kepwe kan. E nda: “I pehm me met I uhdahn kepwehpwe pwehki I ahneki nanpwungmwahu rehn Koht. I kak meir mwahu nipwong koaros oh I uhdahn nsenamwahu.”
Pwehn kalaudehla omw wehwehki dahme Paipel mahsaniheki duwen mwohni, wadek oaralap “Sukuhl Laud oh Mwohni Kak Kihong Uhk Mour Mwahu?” nan Kahn Iroir No. 3 2021, nan jw.org.
4. Wia Nsenen Pwopwoud
Aramas akan ahneki soangsoangen madamadau ong dahme pwung ong wia nsenen pwopwoud.
PAIPEL MAHSANIH: “Liksang tiahk samin me pid wia nsenen pwopwoud. Emenemen kumwail anahne ese ia duwen eh pahn kaunda pein paliwere ni sarawi oh wahu, ahpw kaidehn ni ineng kehlail en wia nsenen pwopwoud ni mehwo duwehte aramas akan me sohte kin ese Koht.”—1 Deselonika 4:3-5.
MET WEHWEHKI: Paipel koasoanehdi uwen laud en atail pahn kasalehda atail ineng en wia nsenen pwopwoud. Lepin lokaiao “tiahk samin me pid wia nsenen pwopwoud” kin pidada kamwahl, netiki paliwar, aramas riemen me wendipene ni ara sohte pwopwoud, ohl mwahuki ohl oh lih mwahuki lih oh eng rehn mahn akan. (1 Korint 6:9, 10) Wia nsenen pwopwoud iei kisakis ehu sang Koht, e ketin kupwurki met en wiawihte nanpwungen ohl oh lih me pwopwoud.—Lepin Padahk 5:18, 19.
KAWEID EN PAIPEL ME KAK SAWAS: Lih emen nan Australia me adaneki Kylie nda: “I sohte pwopwoud, I medewe me ma I wia nsenen pwopwoud, I pahn pehm me mie me poakepoake ie oh I pahn nsenamwahu. Ahpw dahme wiawihong ie weksang met. I nsensuwedla oh medekla.”
Mwuhr, Kylie esehda oh kapwaiada dahme Paipel padahngki duwen wia nsenen pwopwoud. E nda: “I kak kilang me sapwellimen Koht koasoandi kan kileldi nan Paipel pwehn pereiehsang medek. Met I nsenamwahu oh mie me poakohng ie pwehki ei kin wia soahng kan me Siohwa ketin kupwurki kitail en wia. Ni ei kin kapwaiada kaweid en Paipel kan, I kak pitsang soangen medek tohto!”
Pwehn kalaudehla omw wehwehki, menlau wadek oaralap “What Does the Bible Say About Living Together Without Marriage?” nan jw.org.
Sounkapikpatail kin ketin sewese kitail en ese dahme pwung oh sapwung. E sohte kin mengei en peikiong sapwellime kaweid kan, ahpw mie katepen nannanti. Kitail kak kamehlele me met pahn sewese kitail en nsenamwahu ahnsou werei.
