ARAMAS emen kak uhdahn nsensuwedla ni ahnsou me eh pwoudo salelepekda. Mehlel, ekei pwopwoud kan diaradahr me re kak mahkohng arail pwoudo ni eh koluhla, oh eri pwurehng kamwahwihala arail mouren pwopwoud. * Mehnda ma re pwopwoudte de solahr, irail me diarada me arail pwoudo salelepekda kin uhdahn ahneki lokolok laud. Ia duwen irail pwukat ar kak dadaur pahn arail pepehm kamedek kan?

Mendahki arail lokolok laud, me tohto me arail pwoud kamwahlih irail diarada mehn kamweit sang Paipel. Re sukuhlki me Koht kin ketin mwahngih pilen masarail oh kin ketin iang pehm arail lokolok.​—Malakai 2:13-16.

“Ni ahnsou me I kin pwunodada oh pahtoula, komw kin ketin kansenamwahwihiehla oh kapereniehda.”​—Melkahka 94:19.

Bill tamanda oh nda: “Ni ei wadek iretikitiko, I medewehla Siohwa eh ketin kansenamwahwihiehla ni limpoak, duwehte pahpa limpoak men pahn kin wia.”

“Komw kin ketin loalopwoatohng irail kan me kin loalopwoatohng komwi.”​—Melkahka 18:25.

Carmen me eh pwoudo sohte loalopwoat ong ih erein sounpwong kei koasoia: “Ei pwoudo sohte kin loalopwoat, ahpw I kak likih me Siohwa pahn ketin loalopwoat ong ie. E sohte pahn ketin kansensuwedihiehla.”

“Kumwail dehr kin pwunodki mehkot, ahpw ni mehkoaros, kumwail en peki rehn Koht sawas ni kapakap oh kapakap ni ngidingid . . . oh sapwellimen Koht popohl me inenen siksang madamadau en aramas koaros pahn pere amwail mohngiong oh amwail kehl en madamadau.”​—Pilipai 4:6, 7.

Sasha koasoia: “I kin pwurupwurehng wadek iren Paipel wet. Ni ei kin pwurupwurehng kapakap, Koht kin ketikihong ie popohl nan ei mour.”

Irail koaros me sansalda powe kin ekei pak men uhdihsang arail pahn nantihong dadaur pahn kahpwal wet. Ahpw re kin likih Siohwa Koht oh kin ale kakehlperail sang sapwellime Mahsen. Bill kawehwehda ni ahl wet: “Ei pwoson kahrehiong ei mour en mie katepe ni ahnsou me soahng koaros kin mwomwen sohrala. Mendahki I weweidwei erein ahnsou kis nan ‘rotorot mosul,’ Koht ketin ieiang ie.”​—Melkahka 23:4.