REPEKA kilengwei pohn sahpwo ni mwetehn soutik eh kipehdier wasao. Mwurin arail seiseiloangkier wihk kei, e ahnlahr mwomwen mwekimwekid en kamel me e dakedakeo. Sahpw me e tikida ie, Aran, uhdahn dohla douluhl, mpen mwail epwiki kei palimesenpaliepeng en sahpwo. Ele e solahr pahn pwurehng kilang eh peneinei. Mwein e kin medemedewe laud dahme pahn wiawihong ih ahnsou keren ahpw mehlel ni eh kerenlahngehr wasa me e kohkohla ie.

Pwihn me seiseiloako dauliher pali laud en sapwen Kenan oh met re seiseiloak wasa me apwal nan sapwen Nekep. (Senesis 24:62) Mie sihpw kan me Repeka kilangada wasao. Pwelen sahpwo ele sohte mwahu oh nohn madekeng en wia mwetuwel, ahpw e diren reh ong sihpw kan en mwengemwenge ie. Ohl maho me kahre ih ese wasao. Ohlo ngoangkilahr eh pahn usehiong eh soumaso rohng mwahu me Repeka pahn wiahla ahn Aisek pwoud! Repeka ele medemedewe ia pahn mwomwen eh mour nan sahpwet. Soangen ohl dahmen Aisek me e pahn pwoudikio? Saikinte pak ehu ira pehsepene! Ia duwe, ohlo pahn peren ni eh pahn kilang ih? Oh ia eh pepehm ong ohlo?

Soangen kapwopwoud me koasoandi sang pahpa nohno ele wia mehkot kapwuriamwei ong sahpw tohto nan sampah rahnpwukat. Ahpw nan ekei sahpw, soangen koasoandi pwukat kalapw wiawi. Sohte lipilipil wasa ke kohsang ie, ele ke pahn pwungki me Repeka kohkohlahng wasa kis me e sehse. Lih menet ni mehlel wia lih emen me uhdahn eimah oh pwoson. Kitail anahne irair riau pwukat ni ahnsou me mie wekidekla kan nan atail mour. Patehng en Repeka eh pwoson, e pil ahneki irair kaselel oh tohrohr teikan.

Wekidekla laud me wiahiong en Repeka eh mour mwein tepida ni ahl ehu me e ahn. E tikida Aran de karanih Aran me iei ehu kahnimw nan Mesopodamia. Eh pahpa oh nohno weksang pali laud en aramas akan nan Aran. Re sohte kin kaudokiong koht en maram me ede Sin. Ahpw, Koht me re kin kaudokiong iei Siohwa.​—Senesis 24:50.

Repeka tikida oh wiahla peinakapw kaselel men, ahpw eh lingan sohte sangete ni mwomwe. E pwahtiet oh kin pil kolokol eh tiahk mwakelekel. Eh peneinei kepwehpwe pwe mie neirail lidu kan, ahpw Repeka sohte kin mwomwen me e tikida duwehte nein soupeidi seri keneinei. E tikida ese doadoahk laud. Duwehte lih tohto nan eh ahnsou, Repeka pwukoahki doadoahk laud toutou kei, iangahki idipil ong eh peneinei. Mwohn soutikpene, e kin kapaikada sah en pihl pohn pwopwe oh inenlahng ni pwarero.​—Senesis 24:11, 15, 16.

Ehu soutiko, mwurin eh idipada nah saho, ohl mah men tangodohng reh pwehn koasoiong. E ndaiong: “Menlau kihdo mahs nimei kis pihlen sang nan noumw sahen.” Ia uwen karakarahk oh wahu en pekipek wet! Repeka kak kilang me ohl menet seiloak sang wasa doh. Ih eri mwadangete kihdihsang pohn pwopwe saho kanimpilehki ohlo, kaidehn kisinte pihl ahpw kanimpilehki ohlo pihl lemwulemwur pwehn medla. E tehkada me mie nein ohlo pelin kamel ehk me ireirek limwah oh dahl en nimpil ong mahn akan saikinte audaudkihda pihl. E pil kak kilang me ohlo mwasamwasahn, oh Repeka men kasalehda kadek laud. Ih eri nda: “I pahn pil kanimpile noumw kamel kan, irail koaros lao medla.”​—Senesis 24:17-19.

Tehk me Repeka sohte ndahte me e pahn kanimpile kamel ehk ko ahpw e pahn kihong pihl pwe ren nim lao re medla. Ma kamel emen men nimpilda, e kak nimala daulih kalon en pihl 25. Ma kamel ehk ko pwon men nimpil, eri Repeka pahn anahne doadoahk laud. Ahpw nin duwen me wiawio, e sansal me kamel ko  sohte uhdahn men nimpil. * Ahpw ia duwe, Repeka ese met ni ahnsou me e nda e pahn kanimpile mahn ako? Soh. E men oh pil ngoangki doadoahk laud pwehn kasalehda kadek ong mehn liki mah menet. Ohlo pwungki dahme Repeka nda. Ohlo eri mwasamwasahn ahn serepeino kin pwurepwure pwarero, idipada oh wudekihdi audepen nah saho nan deupen pihl ko oh kin pwurepwurehng wia met.​—Senesis 24:20, 21.

Kahlemeng en Repeka kin uhdahn sair oh kamwakid kitail rahnpwukat. Kitail mour nan ahnsou ehu me roporop kin mwomwen kaunda kitail. Nin duwen me kokohpdahr, aramas akan kin “inengieng pein arail peren,” oh sohte men sewese meteikan. (2 Timoty 3:1-5) Kristian kan me kin rapahki ren peiong madamadau en roporop pahn pweida ma re medemedewehte dahme Paipel kasalehda duwen peinakapw men mahso me pwahtiet pwurepwure idipil nan pwarero.

Repeka ese me ohl maho kin mwasamwasahn eh doadoahko. Ahn ohlo mwasamwasahn kaidehn mehkot suwed ahpw e kilikilang mehkot me kapwuriamwei oh e perenki dahme e kilango. Ni en Repeka eh kanekehla eh doadoahko, ohlo kisekisehki luwou oh rihng kesempwal. Ohlo eri idek reh: “Nein ihs kowe, ihs omw pahpa? Menlau ndadohng ie mahs. Mie wasa ni imwen omw pahpao me ngehi oh nei mahn akan kak pweidi ie pwohnget?” Ni eh padahkihong ohlo ihs eh peneinei, met kalaudehla en ohlo eh peren. Ele ni eh ngoangki, e pil kapatahiong: “Reh oh tahpwte reht, kenen mahn akan, oh mie wasa me kumwail kak pweidi ie,” met wia lamalam kadek ehu pwehki meteikan iang ohl maho nan seiloako. Ih eri tiengla mwohn ohlo mwadangalahng ni imwen eh nohno pwehn padahkihong mehkoaros me wiawiher.​—Senesis 24:22-28, 32.

E sansal me Repeka tikida ese kadek ong aramas. Met wia ehu irair kesempwal me solahr kalapw wiawi rahnpwukat oh ehu kahrepe kitail en kahlemengih pwoson en peinakapw kadek menet. Pwoson Koht en kin kahrehiong kitail en kasalehda kadek. Siohwa kin ketin kadek, pwehki e kin ketin sapan ong aramas koaros, oh e ketin kupwurki sapwellime tohnkaudok kan en idawehn ih ni ahl wet. Ni atail kin  kasalehda kadek pil ong irail kan me ele sohte pahn kasapahl kalahngan ong kitail, kitail kin kaperenda Samatail nanleng.​—Madiu 5:44-46; 1 Piter 4:9.

Ihs ohl maho ni pwarero? Ih nein Eipraam ladu, Eipraam rien ahn Repeka pahpa kahlap. Kahrehda re kasamwo ih ong nan imwen Petuel, ahn Repeka pahpa. Ele eden ladu menet iei Elieser. * Re kihong kene mwenge, ahpw e sohte pahn mwenge lao e kasalehiong irail kahrepen eh kohkihdo wasao. (Senesis 24:31-33) Ele kitail kak medewehla mwomwen eh ngoangki koasoiahda dahme e ahpwtehn kilang me wiawio eh wia mehn kadehde manaman me eh Koht, Siohwa, kin ketin kapaiada ih nan pwukoa wet. Ia duwen?

Medewehla Elieser eh koasoiaiong ahn Repeka pahpa, Petuel oh pil rien Repeka ohl Lapan, dahme wiawio oh ira rongorong kanahieng. E padahkihong ira me Siohwa ketin kapaiada laud Eipraam nan Kenan oh me Eipraam oh Sara naineki pwutak emen ede Aisek me pahn sohsohki soahng koaros. Eipraam kihong pwukoa kesempwal ehu ong ladu menet iei en rapahkihda en nah pwutak Aisek eh pwoud sang rehn kiseh kan nan Aran.​—Senesis 24:34-38.

Eipraam men Elieser en inoukihong ih me e sohte pahn pilada emen en Aisek eh pwoud sang rehn lih akan nan Kenan. Dahme kahrehda? Pwehki mehn Kenan kan sohte kin wauneki de kaudokiong Siohwa Koht. Eipraam ese me ahnsou keren Siohwa kupwurki kaloke aramas ko pwehki ar wiewia suwed kan. Eipraam sohte mwahuki nah pwutak kompoak Aisek en patehng aramas pwuko oh ar tiahk samin kan. E pil ese me eh tungoal pwutak ahneki pwukoa kesempwal ehu nan pweidahn sapwellimen Koht inou kan.​—Senesis 15:16; 17:19; 24:2-4.

Elieser pil doulahte padahkihong irail me ni ahnsou me e lella ni pwarero limwahn Aran, e kapakap ong Siohwa Koht. E patohwanohng Siohwa en ketin pilada peinakapw emen en wia ahn Aisek pwoud. Ia duwen? Elieser peki rehn Koht en ketin kamehlelehiong ih me peinakapw me E kupwurki en wia ahn Aisek pwoud pahn kohdohng ni pwarero. Ni eh pahn peki rehn peinakapwo nime pihl, serepeino pahn perenki kanimpile kaidehn Elieser kelehpw ahpw pil nah kamel ko. (Senesis 24:12-14) Oh ihs me kohdo oh wia duwehte eh pekipeko? Repeka! Medewehla ia pahn en Repeka eh pepehm ma e peien rong koasoi me Elieser koasoiaiong tohn eh peneinei ko!

Ahn Elieser koasoi uhdahn kamwakid Petuel oh Lapan. Ira nda: “Irair wet eh sang ni kupwuren KAUN-O.” Nin duwen tiahk, irail koasoanehdi inou en kapwopwoud nanpwungen Repeka oh Aisek. (Senesis 24:50-54) Ia duwe, met wehwehki me sohte ahn Repeka pwuhng nan koasoandi wet?

Wihk kei mwohn mwo Elieser kasalehda ire wet rehn Eipraam ni eh idek: “A dahme pahn wiawi, ma serepeino sohte men iang patohdo?” Eipraam ndaiong: “Eri, ma ke kapwaiada met, ke pahn saledeksang omw inowo.” (Senesis 24:39, 41) Pil kesempwal en peinakapwo eh pwuhng ong koasoandio nan imwen Petuel. Uwen en Elieser eh uhdahn perenkihda pweidahn eh doadoahko me kahrehda mandahn rahno e kohla pekihda ma e kak wahda Repeka pwurala Kenan rahnohte. Ahpw peneineio men Repeka en ekis mihmi rehrail rahn eisek. Mwuhr, irail eri pwungkipene oh nda: “Kitail ekerodo serepeinen oh idek reh nsene.”​—Senesis 24:57.

Met iei ehu ahnsou me e pahn wia wekidekla laud ehu nan en Repeka eh mour. Dahme e pahn nda? Ia duwe, e pahn peki rehn eh pahpao oh rie pwutako ren poakehla oh dehr mweidohng ih en seiloaklahng sahpw ehu me e sehse? De e pahn wiahki pwais kaselel ehu en iang kisehn mwekid ehu me sansal me Siohwa ketin kaukaweid? Ni ahnsou me e sapengala irail, e kasalehda eh pepehm ong wekidekla karuwaru me ele kapwuriamwei me pahn wiawihong eh mour. Ihte me e nda: “Ei, I pahn iangada.”​—Senesis 24:58.

Ia uwen kaselel en irair mwahu me e ahneki! Rahn pwukat, atail tiahk kan me pid kapwopwoud ele weksang mahs, ahpw kitail kak sukuhlki laud mehkot sang Repeka. Dahme keieu kesempwal reh iei kaidehn dahme e mwahuki ahpw dahme eh Koht Siohwa kupwurki. Me pid kapwopwoud rahnpwukat, Mahsen en Koht kin pil kihda kaweid me keieu mwahu, me pid ihs me emen en pilada pwoudiki oh ia duwen en wia ohl oh lih pwopwoud mwahu. (2 Korint 6:14, 15; Episos  5:28-33) E pahn mwahuwong kitail en alasang ahn Repeka mehn kahlemeng mwahu oh song wia soahng kan me pahrekiong kupwuren Koht.

Ahn Petuel peneinei kapaiada oh kamwurala neirail seri kompoak Repeka. Ih oh Depora, me kin apwahpwalih ih sangete ni eh tikitik iangahki nah pwihnen serepein kan iang Elieser oh nah ohl ako mwesel kohkohla. (Senesis 24:59-61; 35:8) Sohte pwand, re dohlahsanger Aran. Seiloak reirei ehu me re pahn wia, mpen mwail 500 (800 km) oh ele irail wie seiseiloangki wihk siluh. Seiloak wet sohte kansenamwahu. Mehlel me Repeka kin kilang kamel tohto nan eh mour, ahpw met sohte wehwehki me e ahn dake kamel. Koasoipen eh peneinei nan Paipel kasalehda me irail sounsilepen sihpw kei ah kaidehn soun netinet kan me kin dake kamel seiseiloakseli. (Senesis 29:10) Irail me sahn dake kamel kin kalapw kaulimki ar soansuwed mendahte ma re pil dake kisin ahnsou mwotomwotte!

Mendahki met, Repeka kin kilangwohngete mwowe, songosong en sukuhlki uwen eh kak koaros sang Elieser duwen Aisek oh eh peneinei. Medewehla ohl maho kin koasoakoasoiong ih limwahn kisiniei ehu ni pwong kan duwen sapwellimen Siohwa inou ong kompoakepah Eipraam. Koht pahn ketin idihada emen sang kadaudok en Eipraam me pahn kihda kapai kan ong tohnsampah pwon. Nna medewehla uwen wahu me Repeka ahneki ni eh wehwehkihda me sapwellimen Siohwa inou pahn pweida rehn ohl me e pahn kereniong pwoudiki, Aisek oh pil sang ih!​—Senesis 22:15-18.

Eri e lelehr ahnsou me kitail koasoiapene nin tapio. Pwihn me seiseiloako leledohr sapwen Nekep oh wasa soutikpeneier, Repeka kilangada ohl emen alialu nan mohso. Ohlo mwomwen madamadau laudki mehkot. Kitail wadek: “E ahpw keredihsang pohn dakepeo,” mwein e sohte awih mahno en kelepwikihdi, ih eri ahpw idek rehn me kahluwa iraillo: “Ihs ohl meno me kohkohdohng kitail nan mohso?” (Senesis 24:62-65) Ni eh esehda me Aisek mwo, e alehte eh koaduhpwel, koaduhpwalihdi meseo. (Senesis 24:62-65) Dahme kahrehda? Met kin wia kilelepen eh wauneki ohl me e pahn pwoudikihda. Soangen wahu wet ele ong ekei rahnpwukat pahn wia tiahk en mahsie. Ahpw ni mehlel, ohl oh pil lih akan ele kak sukuhlkihsang en Repeka eh aktikitik, pwe ihs rehtail me sohte anahne soangen irair kaselel wet?

Aisek me ele sounpar 40, kin wie pahtouki mehlahn eh nohno, Sara, me melahr sounpar siluh mwomwe. Kitail kak medewe me Aisek kin wia ohl emen me kin nsenoh oh pehmitik. Ia uwen eh wia kapai ehu ong ohl menet en pwoudiki lih emen me kin pwerisek, kadek, oh aktikitik! Ia mwomwara ahnsou re pehsepene? Paipel mahsanih: “Aisek poakepoakehla mehlel Repeka.”​—Senesis 24:67; 26:8.

Kitail pil kak mwadang en poakepoake Repeka mendahki e dauliher sounpar 3,900 samwalahro. E sou kaselel ahn lih menet eh eimah, pwerisek, kadek, oh aktikitik? Me mwahu ong kitail koaros, me pwulopwul oh mah, ohl oh lih, pwopwoud de kiripw, en kahlemengih eh pwoson!