Dahme Kin Koasoanehdi Omw Mour ni Ahnsou Kohkohdo?
Aramas tohto kamehlele me soahng kan me re sohte kak kilang iei me kin kamwakid ar mour en ni ahnsou kohkohdo. Soangen madamadau pwukat kin kamwakid irail en wia soahng kan me re medewe pahn wadohng irail paiamwahu de kamwahwihala ar mour ni ahnsou kohkohdo. Ekei soahng pwukat kileldi pah.
DAHME ARAMAS TOHTO KAMEHLELE
KASAWIH USU: Ekei aramas kin kamehlele me wasa me usu kan kin mi ie ahnsou me re ipwidi kin koasoanedier ar mour en ni ahnsou kohkohdo. Re kin idek rehn sounkasawih usu kan ren diarada dahme pahn wiawihong irail oh dahme re kak wia pwehn liksang kahpwalo de ren kak pweida.
WADEK LEPIN KAHS: Ekei kin kamehlele me ma re ale kaweid sang me kin wadek lepin kahs kan re kak esehda kahrepen soahng kan kin wiawihong irail oh dahme re anahne wia. Oh ni ar diarada kahrepeo, irail kakehr soikala mehkot me kakete kauweirailla, diarada dahme kak kamwahwihala kahpwalo oh pweida.
KAUDOKIONG PENEINEI ME MELAHR AKAN: Meteikan kin kamehlelehte me re anahne kawauwih arail peneinei kan me melahr de soangsoangen koht kan pwe ren kak alehdi pereparail oh kapai. Van * me kin nan Vietnam, koasoia, “I kamehlele me ma I pahn kawauwih ei peneinei kan me melahr, ngehi oh nei seri kan pahn ahneki mour mwahu ni ahnsou wet oh ni ahnsou kohkohdo.”
PWUREHNG IPWIDI NAN EHU PALIWAR TOHROHR: Me tohto kin kamehlele me ni aramas emen eh kin mehla e kin pwurehng ipwidi oh me dene met kin wiewiawi. Re kamehlele me soahng mwahu de suwed me kin wiawi ni ahnsou wet iei imwilahn dahme re wia mahso.
Mendahki me tohto kose me re sohte kamehlele soahng pwukat, re kin wiahte soahng kan me duwehte wadek lain nan pehn aramas, kosetipw oh doadoahngki tehn kahs kan. Re medewe me mweinele wiewia pwukat kak sewese irail en ese mwomwen ar mour ni ahnsou kohkohdo.
WIEWIA PWUKAT UHDAHN KIN SEWESE ARAMAS?
Irail akan me kin koapworopworki soangen madamadau oh wiewia pwukat diaradahr mour mwahu ni ahnsou wet oh ni ahnsou kohkohdo?
Medewe dahme wiawihong Hào me kin mi nan Vietnam. E kin kalapw tehk kawehwehpen kasawih usu, wadek lepin kahs oh kin kaudokiong eh peneinei kan me melahr pwe ren kaweid ih. Ia duwe, e pweida? Hào koasoia, “Ei pesineso sohte pweida, I mihla nan pweipwand, ahneki kahpwal en peneinei oh uhdahn mwoarusala.”
Qiuming sang Taiwan, pil kamehlele kawehwehpen kasawih usu, pwurehng ipwidi nan ehu paliwar tohrohr, me mour en aramas kin koasoandier, wadek lepin kahs oh kaudokiong peneinei me melahr kan. Mwurin eh kasawih mepwukat ni keneinei, e koasoia: “I esehda me soangen padahk oh tiahk pwukat sohte kin pwungpene oh I kin pwonopwonki. I diarada me kawehwehpen kasawih usu kan sohte kin kokohpda ni pwung. A me pid duwen pwurehng ipwidi nan ehu paliwar tohrohr, ma ke sohte tamataman omw mouren mahso, a ia duwen omw kak wekila oh wia me mwahu nan omw mour en mwurin met?”
“I esehda me soangen padahk oh tiahk pwukat sohte kin pwungpene oh I kin pwonopwonki.”—QIUMING, TAIWAN
Duwehte dahme Hào, Qiuming oh aramas tohto esehda, atail mour ni ahnsou kohkohdo sohte kin wiawi sang ni dahme koasoandier, keseupen usu kan, peneinei me melahr akan de pwurehng ipwidi nan ehu paliwar tohrohr. Met wehwehki me kitail sohte kak kamwahwihala atail mour ni ahnsou kohkohdo?
Me tohto medewe me en uhdahn ahneki mour mwahu ni ahnsou kohkohdo re anahne nantihong sukuhl laud oh kepwehpwehla. Dahme wiawihong ekei aramas me wiahda soangen pilipilo?
^ par. 6 Nan ire wet oh mehn mwuri kan ekei eden aramas akan weksang uhdahn adarail.
^ par. 16 Mahsen wet dierek nan Paipel, nan Kalesia 6:7. Madamadau wet ndand rehn mehn Eisia kan, me duwehte Padokedi melon kan, ke pahn ale melon; padokedi pihns kan, ke pahn ale pihns.
You May Also Like
KAHN IROIR
Kasawih Usu oh Kosetipw—Kin Kasalehda Ahnsou Kohkohdo?
Ke kak likih wiepen kokohp pwukat?
KAHN IROIR
Dahme Paipel Mahsanihki Duwen Mour oh Mehla
Ia duwe, mie kisehn paliwaratail kin wie momourte mwurin atail mehla? Mie mehkot kin momourte mwurin atail mehla? Ia irail me melahr akan?
