Ni atail kin wadek duwen poadopoad en kepikipik kan nan pwuhken Senesis nan Paipel, kitail sukuhlki me Koht kehkehlingkihong tepin aramas, Adam: “Ke kak tungoale wahntuhke koaros me mi nan mwetuwelet, ahpw ihte wahntuhkehn kehsehki aramas dahme mwahu oh dahme suwed me ke sohte pahn tungoale, ma ke pahn tungoale, ke pahn mehkihla rahnohte.” (Senesis 2:16, 17) Ire wet kasalehda ni sansal me ma Adam peikiong sapwellimen Koht kehkehliko, e sohte pahn mehla ahpw e pahn wie momourte nan mwetuwel en Ihden.

Ahpw, e kansensuwed me e sohte pilada en peik oh mour kohkohlahte, Adam pilada en pohnsehsehla sapwellimen Koht kehkehliko oh e kang wahntuhke keinepwio ni eh pwoudo Ihp, eh kihong ih. (Senesis 3:1-6) Imwilahn wiewiahn sapeik wet kin mihmihte rehtail rahnwet. Wahnpoaron Pohl kawehwehda ni ahl wet: “Dihp tepidohng sampah sang rehn aramas tehmen, ahpw tialahng mehla. Eri, mehla lelohngehr aramas koaros, pwe aramas koaros dipadahr.” (Rom 5:12) “Aramas” menet iei Adam. Ahpw dihp dahieu mwo, oh dahme kahrehda e imwikihla mehla?

Dahme Adam wiao ni eh pein pilada en sapeikiong de kauwehla sapwellimen Koht kosonnedo iei dihpo. (1 Sohn 3:4) Oh kalokepen dihp iei mehla, nin duwen me Koht ketin mahsanihong Adam. Ma Adam oh kadaudoke kan kin peikiongete sapwellimen Koht kehkehlik, irail sohte pahn dipada oh mehla. Koht sohte ketin kapikada aramas ren mehla ahpw ren mour kohkohlahte.

 Sohte me pahn peikasalki me mehla “lelohngehr aramas koaros” nin duwen me Paipel kasalehda. Ahpw ia duwe, mie mehkot rehtail me kin wie momour mwurin atail kin mehla? Me tohto pahn nda ei, mie mehkot me soh sansal nan paliwaratail me kin wie momour mwurin emen eh mehla. Ahpw, met pahn duwehte ar pahn nda me Koht sohte ketin koasoi mehlel ong Adam. Ia duwen? Pwehki ma mie mehkot rehtail me kin wie momour mwurin atail kin mehla, eri mehla sohte pahn wia kalokepen dihpo, nin duwen me Koht mahsanih. Paipel mahsanih: “Koht . . . sohte kak ketin wiahda likamw.” (Ipru 6:18) Ni mehlel, Sehdan me wiahda likamw ni eh ndahng Ihp: “Kumwa sohte pahn mehla.”​—Senesis 3:4.

Met kahrehda peidek wet, ma padahk duwen me mie mehkot rehtail kin wie momour mwurin atail kin mehla likamw, eri dahme uhdahn kin wiawi ni ahnsoun mehla?

Koasoipen kapikipikda me kileldi nan pwuhken Senesis koasoia: “KAUN-O Koht eri ketikihda nesen pwehl ehu sang nanpwel oh ketin wiahkihla war ehu me mwomwen aramas. E ahpw ketikihong ni waro angin mour; ni ahnsowohte mour ahpw miehla ni paliweren aramaso.” Lepin lokaia ko “mour ahpw miehla ni paliweren aramaso” kohsang ni lepin lokaiahn Ipru ne’phesh, me wehwehki mour ehu me esiesingek.​—Senesis 2:7.

Eri Paipel kasalehda ni sansal me emenemen aramas sohte kapikipikda iangahki mour ehu me sohte pahn mehla. Ahpw emenemen kitail wia ‘aramas momour kei.’ Ihme kahrehda ma ke pahn wia roporop, ke sohte pahn diar iren Paipel ehu me doadoahngki lepin lokaia ko me mie mehkot soh sansal nan paliwar me kin wie momour mwurin emen eh mehla.

Pwehki Paipel sohte mahsanih me mie mehkot soh sansal nan paliwar me kin wie momour mwurin emen eh mehla, dahme kahrehda pelien lamalam tohto kin padahngki padahk wet? Pasapengpen peidek wet pahn sansalda sang ni atail pahn tehkpene poadopoad en mehn Isip kan mahs.

Herodotus, sounpoadopoad en Krihk men nan sounpar 400 samwa mwohn Krais, koasoia me mehn Isip ko iei tepin aramas me kin utung padahk wet me mie mehkot soh sansal nan paliwar me kin wie momour mwurin emen eh mehla. Irail mehn Papilon en mahs kan pil kin ekis kamehlele madamadau me dene mie mehkot soh sansal nan paliwar kin wie momour mwurin emen eh mehla. Ni ahnsou me Aleksander Lapalap kalowehdi Palimese nan pahr 332 Mwohn Krais, sounpadahk en Krihk kahrehiong padahk wet en kohpeseng, oh mwuhr padahk wet kohpeseng nan Wehin Krihk pwon.

Ni mwehin tepin Kristian akan, pelien lamalam en mehn Suhs riau, pwihn en Essenes oh Parisi ko, kin padahngki me mie mour ehu me kin kohsang ni paliweren aramas mehlao. Ehu dikseneri kosoaia: “Mehn Suhs ko alehdi padahko me dene mie mehkot soh sansal nan paliwar me kin wie momour mwurin emen eh mehla sang madamadau en mehn Krihk ahpw mehlel sang padahk en Plato.” (The Jewish Encyclopedia) Pil duwehte, sounpoadopoad en ni mwehin tepin Kristian ko Josephus kasalehda me padahko kohsang padahk en mehn Krihk ko a kaidehn nan Paipel. E wiahki padahk pwukat soai kei me neirail sounsoai likamw kan kin padahkihong irail.

Ni tiahk en mehn Krihk kan ar kohpeseng, irail me dene irail Kristian kei kin alehda padahk en mehn liki wet. Nin duwen me emen sounpoadoapod me adaneki Jona Lendering nda me, “Madamadau en Plato me dene mwohn atail ipwidi kitail kin momour wasa mwahu ehu ahpw met momour nan sampah ehu me sohte mwahu, kin kamengeila kapatapatpenehn padahk en Plato oh padahk en Kristian.” Eri, ih duwen padahk likamw me dene mie mehkot soh sansal nan  paliwar me kin wie momour mwurin emen eh mehla, eh tepida miehla nan mwomwohdiso kan me dene irail Kristian kei oh wiahla ehu kisehn arail padahk kesempwal.

Ni mwehin tepin Kristian ko, wahnpoaron Pohl koasoia ni sansal “me ekei aramas pahn kesehla arail pwoson ni imwin ahnsou kan; irail pahn peikiong ngehn likamw akan oh idawehn padahk en ngehn suwed kan.” (1 Timoty 4:1) Ia uwen mehlel en mahsen pwukat ar sansalda! Padahko me dene mie mehkot soh sansal nan paliwar me kin wie momour mwurin emen eh mehla wia ehu karasepen “padahk en ngehn suwed kan.” Met sohte poahsoanda sang nan Paipel, oh e tepisang ni padahk likamw en pelien lamalam oh madamadau en mehn mahs ako.

E kaperen ong kitail pwe Sises mahsanih: “Kumwail pahn dehdehki dahme mehlel, oh me mehlelo pahn kasaledengkumwailla.” (Sohn 8:32) Sang atail loalokongkihla padahk mehlel en Paipel, kitail kin saledek sang padahk kan me kin kasohwahwih Koht oh wiewia kan me kin kohsang pelien lamalam tohto kan en sampah. Patehng met, padahk mehlel en Paipel kasaledengkitailla sang tiahk en sahpw kan oh tiahk en wunahni kan me kin pidada mehla.​—Menlau kilang kakon “ Ia Irail me Melahr kan?”

Sounkapikpatail sohte kupwurki aramas en mourkihte sounpar 70 de 80 pohn sampah oh eri pousehla momour nan ehu soangen mour. Kupwure ong aramas nin tapio iei irail en mour kohkohlahte nan sampah nin duwen sapwellime seri peik kei. Kupwur kaselel wet iei kasalepen sapwellime limpoak ong aramas akan, oh sohte me pahn kak kauwehla. (Malakai 3:6) Sapwellimen Koht manaman kamwakid sounmelkahkao en kamehlelehiong kitail, ni eh koasoia: “Me pwung kan pahn koukousoan nan [“sampah,” NW] oh re pahn sapwenikihla kohkohlahte.”​—Melkahka 37:29.