ME TOHTO ese duwen Sises eh ketin kamakamala ni tuhkehn kalokoloko nanpwungen loallap riemen. (Mad. 27:35-38) Ahpw ekei aramas kamehlele me Paipel sapwung ni eh mahsanih me mie me kaunopada kahlap en Sises oh eri nekidedi nan sousou.​—Mark 15:42-46.

Ekei me sapwungki pwuhken Rongamwahu ko sohte kamehlele me aramas me kamakamalao kin mweimwei en seridi nan sousou nin duwen me kin wiawi. Ahpw irail kamehlele me mie ehu wiepe tohrohr me kin wiawihong loallap akan me kamakamala. Sounnting Ariel Sabar kawehwehda nan makasihn en Smithsonian dahme kahrehda ekei ahneki soangen madamadau wet. E koasoia: “Kalohpwula emen iei kalokolok ehu me kin wiawihong aramas akan me keieu suwed nan wasao, oh ekei me saman kan koasoia me e sapwung en medewe me mehn Rom kan pahn mweidohng aramas suwed pwukat en seridi ni wahu nin duwen me kin wiawi.” Mehn Rom kan kin men kanamenekihala douluhl loallap pwukat, kahrehda irail kin kalapw mweidohng paliwar en aramas suwed ko en langalang pohn tuhkeo pwe mahn akan en kangala. Mwurin mwo, dahme luhwehdi ni paliwar ko, irail pahn kesehdihla nan sousou ehu me diren paliwar mehla kan mi ie.

Ahpw irail kan me kin kasawih kepwehn mahs kan diarada mehkot tohrohr me pid tihn ekei mehn Suhs kan me kamakamala. Nan 1968, irail diarada tihn ohl emen me kamakamala ni mwehin Siseso. Irail diarada tih ko nan ahn peneinei en Suhs ehu arail sousou me mi karanih Serusalem. Tih ko mi nan koakon ehu. Tihn keimwen nehn aramas iang mi nan tih ko. Nihl ehu me reireiki ins 4.5 mi ni tiho oh posdiong ni kisin dinapw kis. Sabar koasoia: “Tihn keimwen neh pwoatet me kohsang nehn ohl emen me adaneki Yehochanan, sewese kadehdehda me dahme pwuhken Rongamwahwo koasoiahki Sises eh ketin nekinekdi nan sousou kakete mehlel.” E kesempwal me “tihn keimwen nehn Yehochanano wia karasaras ehu duwen mehn Rom kan ar mweidada ohl emen me lohpwuhla ni mwehin Siseso en seridi nan sousou nin duwen tiahk en mehn Suhs.”

Ahpw, miehte ekei aramas me ahneki soangsoangen madamadau kan duwen mwomwen Sises eh ketin langada ni tuhkeo pwehki dahme tihn keimwen nehn Yehochanano kasalehda. Dahme sansal iei me ekei loallap kan me kamakamala kin seridi nan sousou, ahpw kaidehn en lekdekdilahng nan sousou ehu me diren paliwar mehla kan mi ie. Eri, e pwung dahme Paipel mahsanihki duwen kahlap en Siseso eh seridi nan sousou. Mehn kadehde kan utungada dahme Paipel mahsanih.

Kesempwal sang met, Siohwa ketin kohpada me Sises pahn seridi nan ahn ohl kepwehpwe men eh sousou, oh sohte emen kak kahrehiong mahsen en Koht en sohte pweida.​—Ais. 53:9; 55:11.