NAN Paipel, sounapwalih men kin pwukoahki apwalih ihmw de sapwen emen. Lepin lokaiahn Ipru oh Krihs me kawehwehdi “sounapwalih” kin ekei pak dokedoke sounapwalih de kaun en ihmw ehu.

Ni Sosep, nein Seikop pwutak, eh wia ladu men nan Isip, Sosep wiahla sounapwalih men me kin apwalih mehkan koaros nan imwen eh soumaso. Ni mehlel, eh soumas en Isipo “kihong mehkoaros Sosep en kin apwahpwalih.” (Sen. 39:2-6) Mwuhr, ni Sosep eh wiahla kaun lapalap men nan Isip, e idihada sounapwalih men en apwalih mehkan koaros nan imweo.​—Sen. 44:4.

Ni mwehin Siseso, aramas akan me mie sapwarail kin kalapw kousoan nan kahnimw kan me dohsang sapwarail me re koadoahkihada. Eri aramas pwukat me mie sapwarail kin idihada sounapwalih kan pwehn apwalih doadoahk en tohndoadoahk kan me kin koadoahke sahpw pwukat ehuehu rahn.

Ihs me ahneki koahiek en wia pwukoahn sounapwalih? Sounnting en Rom men ni mwehin tepin Kristian kan me adaneki Columella, nda me lidu men me idihdida pwehn wia kaun, de sounapwalih, anahne wia “emen me alehdier kasukuhl pwe en wia doadoahko ni koahiek.” E pahn wia aramas emen me pahn “tehk mwahu me tohndoadoahk kan kin wia doadoahk ahpw en dehr lemei.” E pil nda me dahme keieu kesempwal ong sounpapaho iei en “dehr medewe me e ese soahng koaros, oh me ahnsou koaros en kin men sukuhlki soahng kapw kan.”

Mahsen en Koht doadoahngki karasaras en sounapwalih men oh eh doadoahk pwehn karasahda ekei doadoahk kan me kin wiawi nan mwomwohdiso en Kristian. Karasepe, wahnpoaron Piter kangoange Kristian kan ren doadoahngki koahiek me Koht ketikihong irail “en papahki emenemen nin duwen sounapwalih mwahu en sapwellimen Koht kadek sapan.”​—1 Pit. 4:10.

Pein Sises ketin doadoahngki karasaras en sounapwalih men nan karasaraso me kileldi nan Luk 16:1-8. Patehng met, nan kokohp ehu me pid kilelepen eh ketier nin duwen Nanmwarki men, Sises ketin kamehlelehiong sapwellime tohnpadahk kan me e pahn ketin idihada “ladu lelepek oh loalokong” de ‘sounapwalih lelepeko.’ Pwukoa keieu kesempwal me sounapwaliho pahn wia iei en kaukaule kihda padahk mehlel me rasehng mwenge ong sapwellimen Krais tohnpadahk kan erein imwin rahn akan. (Mad. 24:45-47; Luk 12:42) Kitail kin kalahnganki me kitail kak ale sawasepen Paipel kan me sounapwalih lelepeko kin kaunopada pwehn mie ong wasa koaros nin sampah.