MPEN pahr 670 Mwohn Krais, wehin Asiria wiahlahr wehi me keieu kehlail nan sampah pwon. Ehu website (British Museum Blog) koasoia me eh kaunda “tepisang palikapi en Saiprus kohlahng palimese en Iran, oh erein sounpar kei, e pil kaunda Isip.” Eh poahsoan kauno Ninipe, iei kahnimw me keieu laud nin sampah. Mie mwetuwel kaselel tohto, ihmw kaselel oh laud kan, oh wasahn netikihla pwuhk kan me uhdahn laud. Mie mahlen en Ninipe mahso ni arail dihd kan me kasalehda me Nanmwarki Ashurbanipal pein kahdaneki ih “nanmwarkien sampah,” duwehte me nanmwarki en Asiria teikan kin nda. Erein eh kaunda, e mwomwen me sohte me kak kalowehdi Asiria oh Ninipe.

Ahpw ni Asiria eh mi nan eh kehlail pwon, sapwellimen Siohwa soukohpo Sepanaia kohpada: “[Siohwa] pahn ketin . . . kamwomwala Asiria. E pahn ketin wiahkihla kahnimw en Ninipe mwohn kahnimw tehn me sohte pihl ie.” Siohwa pil ketin doadoahngki soukohp Nahum en kohpada: “Kumwail kulihasang silper kan! Kumwail kulihasang kohl kan! . . . Ninipe mwomwlahr, solahr towe, e tehnlahr! . . . Aramas koaros me pahn kilang uhk pahn pweiekla. Re pahn nda, ‘Ninipe pwupwudier ohla!’” (Sep. 2:13; Nah. 2:9, 10; 3:7) Ni aramas ako ar rong kokohpo, ele irail medewe: ‘Mehlel met kakete wiawi? Mie me kak kalowehdi Asiria me kehlailo?’ E apwal en kamehlele met.

Ahpw, Asiria lohdi! Nan pahr 600 samwa Mwohn Krais, wehin Papilon oh Media kalowehdi Asiria. Kedekedeo, aramas akan sohla kousoan Ninipe oh manokehla douluhl kahnimwo! Nin duwen me ehu pwuhk (The Metropolitan Museum of Art) nan Wehin Amerika kasalehda: “Kahnimw wet seridi, oh aramas akan kin esehkihte Ninipe sang nan Paipel.” Ehu website (Biblical Archaeology Society) koasoia me nan pahr 1800 samwa, “sohte emen ese me Ninipe uhdahn mie.” Ahpw mwuhr nan 1845, Austen Henry Layard me samanih kepwehn mahs kan, tepida weirada wasa me Ninipe mi ie mahs. Dahme e diarada kasalehda me Ninipe wia kahnimw kaselel ehu mahs.

Pweidahn kokohp kan me pid Ninipe kin kakehlakahla atail kamehlele me kokohp kan en Paipel duwen imwilahn kaundahn koperment kan rahnwet pahn pil pweida.​—Dan. 2:44; Kaud. 19:15, 19-21.