Me Pwulopwul kan, Dahme Kumwail Pahn Pilada en Wia nan Amwail Mour?

“Ihme I sohte kin tang, pweiengki; oh ihme I kin pei, rasehng sounpaker men me sohte kin pakepakere mwahl nan wehwe.”​—1 KOR. 9:26.

1, 2. Dahme ke anahne pwe ken pweida ni omw kin lalaudla?

 MA KE alu nipwong, ke ele men wahda dengki ehu. Dengkio pahn seweseiuk en ese ia wasa ke mi ie oh omw kahk ko. Ahpw, dengkio sohte pahn wia sawas ma ke sehse ia wasa ke pahn kohla ie. Ke anahne uhdahn ese ia wasa ke pahn kohla ie pwe ken dehr alialu mwahl.

² Ke kin mi nan irair ehu duwehte met ni omw kin lalaudla. Ke naineki dengki ehu. Ma kadeikpen loalomw ale kaiahn mwahu, met duwehte dengki ehu me kak seweseiuk en kekeid nan ahl pwung. (Rom 2:15) Dengkio anahne padiri. Paipel duwehte padiri me kak sewese kadeikpen loalomw en pilada ahl pwung ong mour. (Mel. 119:105; Lep. Pad. 3:5, 6) Ahpw pwe ken pweida nan mour, ke pil anahne ese ia wasa ke pahn lel ie. Ke anahne uhdahn ese omw mehn akadei kan me pid mour en Kristian oh kalohk.

3. Ia kamwahupen ahneki mehn akadei kan me Pohl koasoia nan 1 Korint 9:26?

³ Wahnpoaron Pohl oaralapihada kamwahupen wiahda mehn akadei kan oh nantihong lel mepwukat ni eh ntingihedi: “Ihme I sohte kin tang, pweiengki; oh ihme I kin pei, rasehng sounpaker men me sohte kin pakepakere mwahl nan wehwe.” (1 Kor. 9:26) Ma ke ahneki mehn akadei kan, ke kak tang inen. Ke pahn kereniong wiahda pilipil kesempwal kan. Ekei karasepe iei me pid duwen kaudok, doadoahk en mwohni, pwopwoud, oh ahneki peneinei. Ekei pak, mwein ke pehm me ke pahn pingkihda soangen pilipil tohto kan me ke anahne wia oh sehsehla mehnia me ken pilada. Ahpw ma ke koasoanehdi omw mour mahs oh omw pilipil kan kin poahsoankihda padahk mehlel oh kaweid kan en Mahsen en Koht, ke sohte pahn lohdiong kasongosong en keid ni ahl sapwung.​—2 Tim. 4:4, 5.

4, 5. (a) Dahme kak wiawi ma ke sohte kin wiahda omw mehn akadei kan? (b) Dahme kahrehda omw ineng en kaperenda Koht anahne kaweid uhk en wiahda omw pilipil?

⁴ Ma ke sohte kin wiahda omw mehn akadei kan, iengomw kan oh sounpadahk kan pahn padahkihong uhk en wia dahme re pehm me mwahu ong uhk. Mehlel, mehnda ma ke ahnekier mehn akadei kan, ekei pahn kihong uhk arail madamadau. Ni omw rongorong arail kaweid kan, idek rehmw, ‘Mehn akadei kan me re ndaiong ie pahn sewese ien tamataman ei Sounkapikada nindokon ei wie pwulopwulte de pahn kerompwa ien wia met?’​—Wadek Eklesiasdes 12:1.

⁵ Dahme kahrehda omw ineng en kaperenda Koht anahne kaweid omw pilipil kan nan mour? Ehu kahrepe iei me Siohwa ketikihong kitail soahng mwahu koaros me kitail kin ahneki. (Seims 1:17) Mehlel, aramas koaros anahne kalahngan ong Siohwa. (Kaud. 4:11) Pwe ken kasalehda omw kalahngan, mie ahl me mwahu sang ken tamataman Siohwa ni omw wiahda omw mehn akadei kan? Kitail pahn koasoiapene ia mehn akadei kan me katapan en wiahda oh dahme ke anahne wia pwe ken lelohng mepwukat.

 Ia Mehn Akadei kan me Ke Kak Wiahda?

6. Mehn akadei kesempwal dahieu me ke kak wiahda? Dahme kahrehda?

⁶ Nin duwen atail koasoiapeneier nan iren onop en mwoweo, mehn akadei me keieu kesempwal me ke kak wiahda iei en kadehde me ke uhdahn kamehlele mehlelpen dahme Paipel mahsanih. (Rom 12:2; 2 Kor. 13:5) Ele iengomw kan kamehlele padahk me dene aramas kohsang mwengki de pil soangsoangen padahk likamw en pelien lamalam kan pwe meteikan kin padahkihong irail me iei me re anahne kamehlele. Ahpw, ke sohte anahne kamehlele mehkot pwehki meteikan ar men ken kamehlele. Tamataman, Siohwa kupwurki ken papah ih sang ni omw lamalam unsek. (Wadek Madiu 22:36, 37.) Paipel mahsanih: “Pwoson iei kamehlele mehkan me kitail kin kasik de koapworopworki, mehn kadehdepen mehkan me sansal mendahki kitail sohte kak kilangki mesatail.” (Ipru 11:1, NW) Ei, Samatail nanleng kupwurki ken kakairada atail pwoson me poahsoankihda padahk mehlel kan nan Paipel.

7, 8. (a) Ia mehn akadei kan me ke kak lel ni ahnsou mwotomwot me pahn seweseiuk en kakehlaka omw pwoson? (b) Dahme pahn wiawihong uhk ni omw pahn lel omw mehn akadei kan?

⁷ Pwe ken kakehlaka omw pwoson, ke sou wiahda ekei mehn akadei kan me ke kak lel ni erein ahnsou mwotomwot? Ehu mehn akadei me ke kak wiahda iei kapakap ehuehu rahn. Pwe ken koasoia oaritik kan nan omw kapakap oh sohte ndindahte soahng tehieu, ke kak tamataman de ntingihedi wiewia kan me pwarada erein rahno me ke men koasoia nan omw kapakap. Ke anahne koasoia kaidehn ihte kahpwal kan me ke lelohng ahpw pil mehkan me ke perenkihda. (Pil. 4:6) Pil ehu mehn akadei iei wadek Paipel ehuehu rahn. Ke ese me ma ke wadekala tehn Paipel pahieu ehuehu rahn, ke pahn kanekehla Paipel pwon erein sounpar ehu? * Melkahka 1:1, 2 mahsanih: “Meid pai aramas akan me . . . kin perenki peikiong Kosonned en KAUN-O, oh medemedewe nan kapehdihr  [“wadek ni ngihl tikitik,” NW] nin rahn oh nipwong.”

⁸ Kesiluh en omw mehn akadei me ke kak lel ni erein ahnsou mwotomwot iei en kaunopada pasapeng ehu ong ehuehu mihting en mwomwohdiso. Mwein keieu ke men wadekete omw pasapeng kan de iren Paipel ehu. Mwuhr, ke kak wiahda mehn akadei en sapeng ni pein omw lokaia. Ehuehu ahnsou me ke pasapeng, ke kin wiahiong Siohwa omw meirong en kaping. (Ipru 13:15) Ni omw pahn lel ekei mehn akadei pwukat, omw koapworopworki me ke kak kapwaiada omw koasoandi kan pahn laudla, oh ni ahnsowohte omw kalahngan ong Siohwa pahn pil laudla oh ke kakehr wiahda mehn akadei kan me ke anahne ahnsou laud pwe ken kapwaiada.

9. Ma ke saikinte wia sounkalohk men, ia mehn akadei kan me ke kak wiahda?

⁹ Ia mehn akadei kan me ke anahne ahnsou laud pwe ken kak kapwaiada? Ma ke saikinte tepida iang kalohki rongamwahwo, omw mehn akadei me ke anahne ahnsou laud pwe ken kapwaiada iei en kak wiahla sounkalohk men. Ni omw pahn lel mehn akadei mwahu wet, ke pahn kin men kaukaule oh pil koahiekla nan kalohk oh sohte men uhdi mehnda ma pil sounpwong ehu. Ke pahn pil men sukuhlki en doadoahngki Paipel nan kalohk. Ni omw wia met, ke pahn diarada me omw perenki kalohk pahn laudla. Eri ke pahn kak kalaudehla omw ahnsoun kalohk en ihmw lel ihmw de pil nantihong en wia onop en Paipel. Nin duwen emen sounkalohk me saikinte papidaisla, mie mehn akadei me mwahusang omw pahn kakehr iang papidais oh wialahr emen Sounkadehdehn Siohwa me inoudahr oh papidaisla?

10, 11. Ia mehn akadei kan me irail pwulopwul kan me papidaislahr kak wiahda?

¹⁰ Ma ke wialahr emen ladu en Siohwa me papidaislahr, iet akan ekei mehn akadei me ke anahne ahnsou laud pwe ken kapwaiada. Mwein ke men ekei pak kohla kalohk wasa kan me kalohk sohte kalapw wiawi. Ele ke pil pilada en doadoahngki omw kehl oh roson pwe ken wia pioneer de sawaspen pioneer. Irail meh nen kei me kin perenki wia pioneer pahn ndaiong uhk me omw doadoahngki laud omw ahnsou ong papah Siohwa iei ehu ahl kaselel en tamataman Sounwiepomw nin doken omw wie pwulopwulte. Ke kak kapwaiada mehn akadei pwukat ni omw kin koukousoante rehn omw pahpa oh nohno. Omw mwomwohdiso pahn pil paiekihda omw kin lel omw mehn akadei pwukat.

¹¹ Omw mehn akadei teikan kak kahrehda ken kohla sawas likin omw mwomwohdiso. Karasepe, ke kak koasoanehdi en papah nan ehu sahpw me anahne sawas laud. Ele ke men sewese doadoahk en kauwada Wasahn Kaudok de ihmw kan me ohpis en Sounkadehdehn Siohwa kan kin doadoahngki nan sahpw teikan. Ele ke kakete doadoahk nan Pedel de wiahla emen misineri. Ahpw, omw mehn akadei kesempwal me ke keieu anahne wiahda mwohn omw kak koasoanehdi mehn akadei pwukat iei en papidaisla. Ma ke saikinte papidaisla, eri medemedewe ia duwen omw pahn kapwaiada mehn akadei wet.

Lel Omw Mehn Akadei en Papidais

12. Ia kahrepe kan me ekei kin papidaisla? Dahme kahrehda kahrepe pwukat sohte mwahu?

¹² Ia duwen omw kak kawehwehda kahrepen papidaisla? Ekei kin ele medewe me met pahn perehsang irail en lohdi nan dihp. Pil ekei ele kin pehm me irail anahne papidaisla pwehki iengerail kan ar papidaislahr. Me pwulopwul teikan ele men kaperenda arail pahpa oh nohno kan. Ahpw, papidais sohte pahn irehiukedi sang wia mehkot me ke men wia ni rir, de ke anahne papidaisla pwe meteikan me idingkihong uhk. Ke anahne papidaisla ni ahnsou me ke wehwehkier ia wehwehn wiahla emen Sounkadehdehn Siohwa, oh ke kamehlele me ke kak oh pil perenki wia pwukoa wet.​—Ekl. 5:4, 5.

13. Dahme kahrehda ke anahne papidaisla?

¹³ Ehu kahrepen papidaisla iei me Sises kehkehlingkihong sapwellime tohnpadahk kan me ren ‘padahkihong tohn wehi kan koaros; pwe re en wiahla sapwellime tohnpadahk: papidaisihirailla.’ E pil ketin wiahda mehn kahlemeng mwahu ni eh ketin papidaisla. (Wadek Madiu 28:19, 20; Mark 1:9.) Patehng met, papidais iei kahk kesempwal ehu ong irail akan me men komourala. Mwurin wahnpoaron Piter koasoia duwen Noha eh wiahda warihmwo me komourala ih oh  eh peneinei sang Nohliko, e koasoia: “Me kin pahrekiong met me pil ahnsouwet kin komourkumwailla, iei papidais, . . . sang ni iasadahn Sises Krais.” (1 Pit. 3:20, 21, NW) Met sohte wehwehki me papidais kin wiahte elen komourala ma ke lelohng kahpwal. Ahpw, ke papidaisla pwehki omw limpoak ong Siohwa oh ke men papah ih sang ni kapehdomw unsek, mour unsek, omw lamalam koaros unsek oh omw kehl unsek.​—Mark 12:29, 30.

14. Dahme kahrehda ekei ele kin pweiek sang papidaisla? Dahme kamehlelehiong uhk me ke kak papidaisla?

¹⁴ Mwein ekei pahn pweiek en papidaisla pwehki ar perki re de kakete piskensang mwomwohdiso. Ihme ke kin perki met? Ma ei, a soangen per wet kak wia kamwahu ong uhk. E wehwehki me ke ese kesempwalpen pwukoa me pid wia emen Sounkadehdehn Siohwa. Mie pil ehu kahrepe tohrohr? Mwein ke saikinte uhdahn kamehlele me mourki sapwellimen Koht koasoandi kan iei mour me keieu mwahu. Ma ih duwen, omw kin medewehla duwen imwilahn irail kan me pohnsehsehla koasoandi kan en Paipel kak seweseiuk ken wiahda omw pilipil. Ahpw ni pali teio, e kakete me ke poakohng sapwellimen Koht koasoandi kan ahpw ke sohte liki pein uhk en kapwaiada mepwukat. Met kakete kasalehda me ke kin aktikitik. Paipel mahsanih me mohngiong en aramas koaros me soh unsek kin kalapw pitihdi pein kitail. (Ser. 17:9) Ahpw ke kak pweida ma ke kin kaukaule ‘kapwaiada sapwellimen Koht kosonned kan.’ (Wadek Melkahka 119:9.) Sohte lipilipil soangen kahrepe kan me ke pweiengki en papidaisla, ke anahne powehdi soahng pwukat. *

15, 16. Ia duwen omw kak ese ma ke kakehr papidaisla?

¹⁵ Ahpw ia duwen omw kak ese ma ke onopadahr ong papidaisla? Ehu ahl iei en idek rehmw soangen peidek pwukat: ‘I kak kawehwehiong meteikan padahk mengei kan en Paipel? I kin iang kalohk ni ahnsou me ei pahpa oh nohno sohte kin iang? I kin nantihong iang towehda mihting koaros? I kak tamanda ahnsou me I pelianda kasongosong sang iengei kan? I pahn pousehlahte papah Siohwa mehnda ma ei pahpa oh nohno de kompoakepahi kan uhdihsang papah ih? I kin kasalehiong Siohwa nan ei kapakap ia uwen kesempwal en ei nanpwungmwahu reh? Oh I inoukihongehr Siohwa ei mour ni mehlel nan ei kapakap?’

¹⁶ Papidais kin wekidala mour en aramas, oh e wia pilipil kesempwal ehu. Ia duwe, ke koahieklahr oh kakohng medewe kahk kesempwal wet? En koahiekla sohte kin poahsoankihdahte omw kin kadek padahk de wia pasapeng mwahu kan erein mihting kan. E kin pidada omw kak wiahda pilipil kan me poahsoankihda omw wehwehki kaweid kan en Paipel. (Wadek Ipru 5:14.) Ma ke mi nan soangen ahnsou nan omw mour en wiahda pilipil wet, eri dahme mi mwohmw iei kapai me keieu kesempwal en papah Siohwa sang ni mohngiong unsek oh mourki mour ehu  me kasalehda me ke uhdahn inoukihong ih omw mour.

17. Dahme pahn seweseiuk en dadaurete pahn kahpwal kan me pahn kakete pwarada mwurin omw papidaisla?

¹⁷ Mwurinte omw papidaisla, ele ke kin ngoangki papah Koht. Ahpw mwurin ahnsou kis ke pahn lelohng kahpwal kan me pahn song omw kin dadaur oh pwoson. (2 Tim. 3:12) Ke dehr pehm me ke anahne kelehpw powehdi kahpwal pwukat. Rapahki kaweid en omw pahpa oh nohno. Peki sawas sang rehn irail kan nan mwomwohdiso me koahiek oh arail nanpwungmwahu rehn Koht kin kehlail. Kompoakepahnki irail kan me pahn seweseiuk. Ke dehr manokehla me Siohwa kin ketin apwalih uhk, oh e pahn ketikihong uhk kehl me anahn ni omw pahn lelohng irair sohte lipilipil kan.​—1 Pit. 5:6, 7.

Ia Duwen Omw Kak Lel Omw Mehn Akadei kan?

18, 19. Ia duwen omw kak paiekihda omw kasawih dahme keieu kesempwal me ke anahne wia?

¹⁸ Ia duwe, e mwomwen me ke solahr ahneki ahnsou me itar ong dahme ke men wia oh pil dahme ke anahne wia mendahki ma kahrepe kan mwahu? Ma ei, ke anahne kasawih dahme keieu kesempwal me ke anahne wia. Pwehn karasahda: Ale pekid pilastik ehu oh audehiong takai loale. Kowe eri pil audehiong pihk nan pekido. Met mie pekid ehu me diren takai oh pihk loale. Nna, ale pekido kowe wudekihdi ahpw dehr kesehla takai ko de pihk ko. Met, uhd audehkihda mahs pekido pihk, mwuhr, song en kihong takai ko loalen pekido. E pahn mie dewen takai ko? Ele soh, met pwehki omw audehkihda mahs pekido pihk.

¹⁹ Ke kin lelohng soangen kahpwal wette ni omw pahn kin doadoahngki omw ahnsou. Ma ke mwohneki soahng kan me duwehte ahnsoun mwemweit, ke sohte pahn ahneki ahnsou nan omw mour ong soahng kesempwal kan, me iei wiewia kan me pidada omw papah Koht. Ma ke pahn idawehn kaweid en Paipel wet en “pilada dahme keieu mwahu [“kesempwal,” NW],” ke pahn ahneki ahnsoun papah Koht oh pil ahnsoun mwemweit.​—Pil. 1:10.

20. Ma ke kin pwunodada oh peikasalda ni omw nantihong lel omw mehn akadei kan, dahme ke anahne wia?

²⁰ Ni omw nantihong lel omw mehn akadei kan, iangahki papidaisla, ele mie pak me ke kin pwunodada oh peikasalda. Ni ahnsou me met kin wiawiong uhk, “mweidohng KAUN-O omw kahpwal akan, eri e pahn ketin doareiukala.” (Mel. 55:22) Ahnsou wet, ke ahneki ahnsou mwahu en iang wia doadoahk me keieu kaperen oh kesempwal nan poadopoad en aramas, me iei doadoahk en kalohk oh padahk me kin wiawi nan sampah pwon. (Wiewia 1:8) Ke kak pilada en sohte iang wia doadoahk wet. De ke kak iang kedirepwki doadoahk kaperen wet. Dehr pweiek en doadoahngki omw koahiek kan ong papah Koht oh utung sapwellime Wehi. Ke sohte pahn koluhkihla omw kin papah “Sounwiepomw nindokon omw wie pwulopwulte.”​—Ekl. 12:1.

[Nting tikitik me mi pahs]

Ia Duwen Omw Pahn Sapeng?

• Dahme kahrehda ke anahne wiahda mehn akadei kan?

• Ia ekei mehn akadei kan me katapan en kapwaiada?

• Dahme kin pidada omw lel mehn akadei en papidaisla?

• Ia duwen omw kin kasawih dahme keieu kesempwal me ke anahne wia eh kin seweseiuk en lel omw mehn akadei kan?

[Peidek kan ong Onop]

[Kilel nan pali 20]

Mie omw mehn akadei en wadek Paipel ehuehu rahn?

[Kilel nan pali 22]

Dahme pahn seweseiuk en lel mehn akadei en papidaisla?

[Kilel nan pali 23]

Dahme ke sukuhlki sang karasaras wet?