MIE me kin medewe me Koht sohte kak ketin lemei. Ahpw ekei me tohto rahnwet kin medewe de kamehlele me Koht ketin lemei. Dahme kahrehda?

Ekei me pitsang kahpwal kan en melimel, rerrer en sahpw de iloak laud ape kin idek: “Dahme kahrehda Koht ketin mweidohng soahng pwukat en wiawi? E sohte ketin nsenohki? E ketin lemei?”

Meteikan pil kin pwunodki peidek pwukat ni arail wadek Paipel. Ni arail kin wadek duwen Noha oh Nohliko, re kin medewe, ‘Dahme kahrehda Koht limpoak men ketin kemehkihla aramas ako koaros? E ketin lemei?’

Ia duwe, ke pil kin idek soangen peidek wet? De ke sehse ia duwen omw pahn sapeng irail kan me medewe ma Koht ketin lemei? Sohte lipilipil rehra, medewe duwen ehu peidek me ele kak sawas.

Pwehn kawehwe ni mengei, kitail kin kailongki tiahk lemei pwehki mie atail koahiek en ese dahme pwung oh sapwung. Ni ahl wet, kitail kin uhdahn weksang mahn akan. Sounkapikpatail ketin wiakitailda “rasehng ih.” (Senesis 1:27) Ia wehwehn met? Met wehwehki me e ketikihong kitail koahiek en kasalehda sapwellime irair kaselel kan oh sapwellime kosonned duwen tiahk kan, oh pil sapwellime madamadau ong dahme pwung oh sapwung. Nna medewehla met: Ma kitail ale atail koahiek en ese dahme pwung oh sapwung sang rehn Koht oh kin kailongki tiahk lemei, met sou kin kadehdehda me Koht pil kin ketin kalahdeki tiahk lemei?

Kitail kak kamehlele met pwehki nan Paipel, Koht ketin mahsanihong kitail: “Pwe duwen nanleng eh ileilesang sampah, ih duwen kupwurei oh wiewia kan eh ileilesang amwail kan.” (Aiseia 55:9) Ma kitail kin nda me Koht ketin lemei, kitail sou pahn ndinda mehkot me weksang dahme Paipel mahsanih, de ndinda me atail wiewia kan ileile sang sapwellime wiewia kan? E pahn wia elen loalokong en rapahkihda ire mehlel kan mwohn atail nda soahng pwukat. Mwein kitail en dehr idek ma Koht ketin lemei, ahpw kitail en idek dahme kahrehda ekei sapwellime wiewia kan kin mwomwen lemei? Pwehn sewese kitail, kitail en medewe ia uhdahn wehwehn lepin lokaia wet “lemei.”

Ni atail nda me emen lemei, kitail kin nda me kahrepen eh wiewia kan sapwung. Aramas lemei men kin perenki kilang meteikan ar lokolok de e sohte nsenohki arail kahpwal. Eri, pahpa men me kin panawih nah pwutako pwehki e perenki kamedekihala pepehm en nah pwutako kin wia aramas lemei men. Ahpw pahpa men me kin panawih nah pwutako pwehn kaweid de pere kin wia aramas mwahu men. Pwehki kitail sohte kin ahnsou koaros ese ia kahrepen meteikan kin wia dahme re wia, e kin mengei ong kitail en sohte wehwehki arail wiewia kan. Kitail wehwehki met ni meteikan ar kin kadeik kitail.

Kitail en tehkpene kahrepe riau me ekei kin medewe me Koht ketin lemei. Ehu iei sang ni atail kilang kahpwal kan en melimel, rerrer en sahpw de iloak laud ape kin wiawi rahnpwukat. Pil ehu iei sang ni atail wadek nan Paipel duwen Koht eh ketin kaloke aramas akan. Ia duwe, ire mehlel pwukat kin uhdahn kasalehda me Koht ketin lemei?