MEDEWEHLA me ke kompoakepahnki emen me ke uhdahn wauneki, ahpw e wiahda mehkot me ke sohte wehwehki. Ekei kauwe oh kadeik eh wiewiao oh kahrepe kan, oh kin nda me kompoakepahmwo lemei. Ke pahn mwadang en pwungki dahme re nda, de ke pahn awih oh rong dahme kompoakepahmwo pahn nda? Ma e sohte mi mwo pwehn kawehwehda dahme wiawi, ke pahn kanengamah oh sohte mwadang kadeikada ih?

Ele ke men ese laudsang met mwohn omw pahn sapeng. Mwein ke pahn idek, ‘Ia uwen laud en ahi ese kompoakepahi menet, oh kahrepe dah kan me I waunekihki ih?’ Me mwahu. Ahpw ia duwe, kitail sou pil kak doadoahngkihte elen madamadau wet ong peidek duwen ma Koht kin ketin lemei?

Ele e apwal en wehwehki ekei wiewia kan me Koht ketin wiahda, de ke sohte wehwehki dahme e ketin mweidohng en wiawi. Mie aramas tohto me pahn ndaiong uhk me Koht kin ketin lemei oh pil pahn kangoange iuk ken kadeik kahrepen sapwellime wiewia kan duwehte ar kin wia. Ke pahn medemedewehte soahng mwahu kan duwen Koht lao ke kalaudehla omw ese ire teikan? Pasapengo ele pahn poahsoankihda ia uwen laud en omw ese ih. Idek rehmw, ‘Ia duwen Koht eh ketin wia kompoakepah mwahu men ong ie?’

Ma omw mour kin apwal, ele ke kakete nda me Koht sohte wia kompoakepahmw men. Ahpw uhdi oh medewe. Ia duwe, Koht me ketin kahrehda kahpwal kan nan omw mour, de e ketin kahrehda soahng mwahu kan en mie? Nin duwen kitail eseier, Sehdan iei me “kaunen sampah wet,” kaidehn Siohwa. (Sohn 12:31) Eri, Sehdan iei me kin kahrehda nsensuwed laud oh wiewia sapahrek kan nin sampah wet. Oh ke sou pil pwungki me atail soh unsek oh irair kan me kitail sohte kasik iei me kin kahrehda pali laud en atail kahpwal kan?

Ni pali teio, dahme Koht pil ketin kahrehda en mie? Medewehla dahme Paipel mahsanih: Koht iei “me ketin kapikada nanleng oh sampah”; me wiepen lime kan me iangahki paliwaratail wiawihda “inenen mwahu mehlel”; oh me Siohwa iei me “ketikihong mour oh esingek oh soahng teikan ong aramas akan koaros.” (Melkahka 124:8; 139:14; Wiewia 17:25) Ia wehwehn mepwukat koaros?

Met wehwehki me kitail pweipwandkihong Sounkapikpatail atail esingek oh mour. (Wiewia 17:28) E kin wehwehki me kisakis en mour, lingan en sampah me kapilkitailpene, nsenamwahu me kohsang limpoak oh kompoakpatail kan, atail kak neme, doahke, rong oh ned, soahng pwukat koaros iei kisakis kei sang rehn Koht. (Seims 1:17) Ke sou pwungki me kapai pwukat kahrehiong Koht en ketin wia Kompoakepah men me warohng atail wahu oh likilik?

Mehlel, ele e apwal ken likih Koht. Mwein ke leme me ke saikinte esehla ih mwahu pwe ken likih. Met kak wiawi. Nan ire mwotomwot pwukat, kitail sohte kak koasoiahda kahrepe kan koaros me ekei kin nda me Koht kin ketin lemei. Ahpw e sou kesempwal kitail en nantihong esehla mwahu Koht? * Se kamehlele me ni omw wia met, ke pahn esehla dahme mehlel duwen Koht. Ia duwe, e ketin lemei? Uhdahn soh: “Koht iei limpoak.”​—1 Sohn 4:8.