Siohwa Koht ketin kapikada tohnleng rar rar kei mwohn eh ketin kapikada aramas. (Sohp 38:4, 7) Tohnleng pwukat ngehn kehlail kei me kin wia sapwellimen Koht doadoahk. Ekei pak Koht kin ketin poaronehdo irail nin sampah pwehn kaweid oh pere sapwellime ladu kan. (Melkahka 91:10, 11) Rahnpwukat, tohnleng kan kin sewese aramas akan en paiekihda rongamwahu me sapwellimen Sises tohnpadahk kan kin kalokalohki.​—Wadek Kaudiahl 14:6, 7.

Ia duwe, kitail anahne kapakap peki sawas sang tohnleng kan? Soh. Kapakap wia kisehn kaudok me pahn kowohng Koht kelehpw. (Kaudiahl 19:10) Pwehki tohnleng kan wia sapwellimen Koht ladu kei, re kin peikihong kaweid kan me pwildohsang rehn Koht ahpw kaidehn sang rehn aramas. Eri, kitail anahne kapakap ahnsou koaros ongete Koht ni mwaren Sises.​—Wadek Melkahka 103:20, 21; Madiu 26:53.

Duwehte aramas, tohnleng kan pil kapikipikda ahneki saledek en pilipil oh kak pilada en wia dahme pwung de sapwung. E kansensuwed me tohnleng tohto uhwongada Koht. (2 Piter 2:4) Sehdan me tepin wia met, oh tohnleng teikan pil idawehn ih oh wiahla ngehn saut kan. Nan pahr me kerendo kan, Sehdan oh ienge ngehn saut akan pisikensang nanleng oh piskendiong nin sampah wet.​—Wadek Kaudiahl 12:7-9.

Soahng suwed kan oh tiahk lemei me wie tohtohla sangete pahr 1914 kasalehda me ahnsou keren Koht pahn ketikihsang Sehdan oh ienge ngehn saut akan pwe ren sohla wia arail doadoahk. Mwuhr, Koht pahn ketin kasapahldo sampah wet en wiahla Paradais nin duwen dahme eh uhdahn ketin kupwurki sangete mahs.​—Wadek Kaudiahl 12:12; 21:3, 4.