“Sohte lipilipil dahme ke mwahuki, ndahlahte, I pahn perenki wia.” Ele ke pahn pweiek en nda lokaia pwukat ong emen me ke sehse de ke ahpwtehn tuhwong. Ahpw, ke sohte pahn apwalki ndaiong kompoakepahmw keren men. Kompoakepah keren kan kin perenki wiahda dahme kompoakparail kan kin peki ren wia.

Paipel kasalehda me Siohwa kin kalapw ketin wiahda dahme e mwahngih pahn kaperenda sapwellime tohnkaudok kan. Karasepe, Nanmwarki Depit, me ahneki nanpwungmwahu keren rehn Koht, nda: “Ia uwen tohtohn soahng kapwuriamwei kan me komw ketin wiahiong kiht . . . re uhdahn pahn tohtohsang me I kak kasalehda!” (Melkahka 40:5) Laudsang met, Siohwa pil kin ketin wiahda dahme mwahu ong irail kan me saikinte esehla ih, ‘e pil ketikihong irail mwenge, oh pil audehkihda nan mohngiongirail kan peren.’​—Wiewia 14:17.

Pwehki Siohwa ketin kupwurki wiahda dahme kin kaperenda meteikan, eri e pwung en kasik me irail kan me men kompoakepahnkihla Koht pahn pil wia dahme pahn kahrehiong ih en ketin “pereperen.” (Lepin Padahk 27:11) Ahpw dahme ke kak wia pwehn kaperenda Koht? Paipel sapengki: “Kumwail dehr manokehla wiewia mwahu kan oh amwail sawaspene, pwe ih soangen meirong pwukat me Koht kin ketin kupwurperenki.” (Ipru 13:16) Ia duwe, met wehwehki me ihte me anahn pwehn kaperenda Siohwa iei en wiewia dahme mwahu oh sewese meteikan?

Paipel mahsanih: “Sohte me kak kenikenla pahn kupwur en Koht ma sohte eh pwoson.” (Ipru 11:6) Eri, e kesempwal en ese me mwurin “Eipraam pwosonlahr Koht,” Koht eri kamwarehki “Kompoakepahi Eipraam.” (Seims 2:23) Sises Krais pil ketin kasalehda me ma kitail men ale sapwellimen Koht kapai kan, kitail anahne “pwoson Koht.” (Sohn 14:1) Ia duwen omw kak ahneki soangen pwoson me Koht ketin kupwurki sang irail kan me e ketin kainangihedo reh? Ke kak tepida wia met sang ni omw kin kaukaule onopki Mahsen en Koht, Paipel. Ni omw wia met, ‘Koht en ketin audehkinuhkada kupwure’ oh ke pahn sukuhlki ia duwen omw pahn “wiewia dahme e kin ketin kupwurperenki.” Eri, ni omw pousehlahte kalaudehla omw esehla Siohwa oh doadoahngki dahme ke sukuhlki duwen sapwellime koasoandi pwung kan, omw pwoson ih pahn kekeirda oh e pahn uhdahn ketin karanihuhkala.​—Kolose 1:9, 10.