“KAUN-O Koht eri ketikihdiong aramaso nan mwetuwel en Ihden pwe en kin apwahpwalih oh sinsile. E ahpw mahsanihong, ‘Ke kak tungoale wahntuhke koaros me mi nan mwetuwelet, ahpw ihte wahntuhkehn kehsehki aramas dahme mwahu oh dahme suwed me ke sohte pahn tungoale, ma ke pahn tungoale, ke pahn mehkihla rahnohte.’”​—Senesis 2:15-17.

Koht ketikihdiong tepin aramaso, Adam, nan mwetuwel en Ihden, paradais ehu nin sampah me diren soangsoangen mahn oh tuhke kaselel kan. Mie soangen tuhke kan me Adam kak kang wahrail ahnsou koaros. Ahpw Siohwa Koht ketin kasalehda ni sansal duwen tuhke pwoat oh mahsanihong Adam en dehr kang wa. Koht ketin kehkehlikihong Adam me ma e kang wahn tuhkeo, e pahn mehla.

Ia duwe, Adam wehwehki kehkehlik wet? E ese dahkot mehla pwehki e kin kilang mahn akan ar kin mehla. Ma Adam kapikipikda pwehn mehla ehu rahn, eri sohte pahn mie katepen sapwellimen Koht kehkehliko. Adam wehwehki me ma e peikiong Koht oh sohte kang wahn tuhkeo, e pahn mour kohkohlahte, de e sohte pahn mehla.

Ekei kamehlele me wahntuhkeo kin karasaraskihong wia nsenen pwopwoud, ahpw met sohte kak mehlel. Met pwehki Siohwa ketin kupwurki Adam oh eh pwoudo, Ihp, ira en ‘kaparaparala pwe kadaudokara kan pahn kousoanla wasa koaros nin sampah oh kaunda mehkoaros.’ (Senesis 1:28) Eri kehkehliko kin dokedoke uhdahn tuhke pwoat. Siohwa ketin kahdaneki wahntuhkeo “wahntuhkehn kehsehki aramas dahme mwahu oh dahme suwed” pwehki tuhkeo kin wia kilelepen sapwellime pwuhng en koasoanehdi dahme mwahu de suwed ong aramas. Sang ni eh sohte pahn kang wahntuhkeo, Adam pahn kasalehda kaidehn ihte eh peik ahpw pil eh kalahnganki Sounkapikpeo me ketin kapaiahkihda ih soahng mwahu koaros.

“E [Koht] ahpw pil mahsanihong ohlo, ‘Pwehki omw . . . tungoalehda wahntuhke me I keinepwihsang uhko, . . . ke pahn doadoahk oh kakerehdi pwudowomw, pwe ke en koadoahkihada wahn pwelen sampah, ke lao pwurehng wiepwella, me ke wiawihda sang ie. Pwe ke wiawihda sang pwehl oh ke pahn pwurehng wiepwella.’”​—Senesis 3:17, 19.

 Adam kang wahntuhkeo me Koht ketin keinepwihsang. Wiewiahn sapeik wet uhdahn laud. Adam uhwongada Koht, mwekid ehu me uhdahn suwed oh kapwuriamwei me kasalehda eh sohte kalahnganki soahng mwahu koaros me Koht ketin wiahda ong ih. Sang ni eh kang wahntuhkeo, Adam soikala Siohwa oh pilada en uhtohrda, me kahrehda imwila inenen suwed.

Koht ketin wiahda Adam sang “nesen pwehl ehu sang nanpwel” oh ketin mahsanihong me e pahn “pwurehng wiepwella.” Adam mehla oh sohte wie momour ni mwohmw tohrohr ehu de wasa tohrohr ehu. Ni eh mehla, e duwehla pwelpar me e wiawihda sang ie, mehkot me sohte ahneki mour.​—Senesis 2:7; Eklesiasdes 9:5, 10.

“Dihp tepidohng sampah sang rehn aramas tehmen, ahpw tialahng mehla. Eri, mehla lelohngehr aramas koaros, pwe aramas koaros dipadahr.”​—Rom 5:12.

En Adam eh sapeik, de dihp, kahrehda imwila suwed tohto. Ni eh wiahda dihp, Adam luhssang, kaidehn ihte mour ehu me kak lella sounpar 70 de 80, ahpw e pil luhssang koapworopwor en mour kohkohlahte. Laudsang met, ni Adam eh dipada, e luhssang eh irair en unsek oh ihte me e kak kadaur ong kadaudoke kan iei soh unsek.

Kitail koaros kadaudoken Adam. Kitail sohsohki sang ih paliwar ehu me sohte unsek me kin dipada oh kedekedeo mehla. Kaidehn kitail me pilada met. Pohl kawehwehda mwahu duwen kahpwal wet me kitail ahneki. E ntingihedi: “Ngehi aramas emen me pahn mehla, me netlahr pwe en wiahla lidun dihp. Uhdahn aramas paisuwed men ngehi! Ihs me pahn kapitiehla sang nan paliwar wet me kin kahluwalahng ie mehla?” Pohl eri sapengala pein eh peideko: “Kalahngan ong Koht, me kin ketin kapwaiada met rehn atail Kaun Sises Krais!”​—Rom 7:14, 24, 25.

“Sahmo ketikidohr Sapwellime Iehros pwe en wiahla sounkomourpen sampah.”​—1 Sohn 4:14.

 Siohwa Koht ketin wiahda koasoandi ehu me pahn powehdi dahme dihp kin kahrehda oh ketin kasaledekihala kitail sang kalokepen mehla soutuk. Ia duwen? E ketin poaronehdo sang nanleng sapwellime Ohlo me e ketin loalloale pwehn ipwidi nin duwen aramas unsek men, duwehte Adam. Ahpw weksang Adam, “sohte sapwung ehu mie rehn” Sises. (1 Piter 2:22) Pwehki e ketin unsek, Sises sohte ketin mi pahn kalokepen mehla oh e kak ketin mour kohkohlahte nin duwen aramas unsek men.

Ahpw Siohwa ketin mweidohng imwintihti kan ren kemehla Sises. Rahn siluh mwuri, Siohwa ketin kaiasada Sises sang mehla nin duwen ngehn emen pwe en kak pwurala nanleng ni ahnsawi. Wasao, Sises patohwanohng Koht pweinen eh mour nin duwen aramas unsek men pwehn kapwurehdo dahme Adam kasalongehla ong pein ih oh pil kadaudoke kan. Siohwa ketin kupwurki meirong wet, oh met kahrehiong irail kan me kin pwoson Sises en kak ale mour soutuk.​—Rom 3:23, 24; 1 Sohn 2:2.

Eri Sises ketin pwainda dahme Adam luhssang. Sises ketin lelohng lokolok oh pwoula pwe kitail en kak mour kohkohlahte. Paipel mahsanih: “Sises . . . ketin lokolok oh pwoula; iei sang ni kalahngan en Koht me Sises ketin pwoukihla aramas koaros.”​—Ipru 2:9.

Kisakis wet kin kasalehda laud duwen Siohwa. Sapwellime koasoandi ileile duwen pwung pahrek kahrehiong aramas soh unsek kan ren kak kawiliakapwala pein irail. Ahpw sapwellimen Koht limpoak oh kalahngan kin kamwakid ih en ketin kapwaiada dahme pein ih ketin kupwurki ni uwen pweipwei ehu me inenen laud, me iei en ketikihda sapwellime Iehros pwehn ketikihda pweinen mour unsek me Adam kasalongehla.​—Rom 5:6-8.

“Krais ketin iasadasangehr me melahr akan; kahrehda, e ketin wialahr tepin kilel en irail kan me melahr, duwen ar pahn pil iasada. Pwe duwen mehla eh tepisang aramastehmen, ih duwen iasada sang mehla eh tepido sang aramastehmen. Pwe duwen aramas koaros ar kin mehkihla ar miniminiong Adam, ih duwen koaros pahn iasadahng mour pwehki ar miniminiong Krais.”​—1 Korint 15:20-22.

Sises uhdahn ketin mour nin sampah oh pwoula. Ahpw ia duwe, mie mehn kadehde me e ketin iasada sang mehla? Ehu mehn kadehde laud nanpwungen mehn kadehde teikan iei me Sises ketin iasada oh pwarowohng aramas tohto, kaidehn ahnsou oh wasa tehieu. Ehu pak e ketin pwarowohng aramas tohtohsang meh 500. Wahnpoaron Pohl ntingihedi duwen ahnsowo nan nah kisinlikowo ong Kristian kan nan Korint, oh kasalehda me ekei sounkadehde ko momourte oh e nda me re kak kadehdehda dahme re kilang oh pil rong.​—1 Korint 15:3-8.

Kesempwal sang met, ni Pohl eh ntingihedi me Krais iei “tepin kilel” en irail me iasadahr, e kin koasokoasoia me meteikan pil pahn iasada mwuhr. Pein Sises mahsanih me ahnsou ehu pahn kohdo me “koaros me mihmi nan sousou kan” pahn “pedoisang nan arail sousou kan.”​—Sohn 5:28, 29.

“Pwe iei uwen Koht eh ketin loalloale sampah, me e ketikihdohki Sapwellime Iehros, pwe mehmen me kin pwosonla ih en dehr salongala, a en ahneki mour soutuk.”​—Sohn 3:16.

 Tepin ire kan nan Paipel koasoiahda duwen ahnsowo me mehla miehla oh Paradais eh salongala. Kaimwiseklahn ire kan nan Paipel koasoiahda duwen ahnsou me mehla pahn lohdi oh Koht pahn ketin kapwurehdo Paradais nin sampah. Eri aramas akan pahn kak ahneki mour me nsenamwahu oh pweida kohkohlahte. Kaudiahl 21:4 mahsanih: “Mehla solahr pahn wiawi.” Pwehn kasalehda ni sansal mehlelpen inou wet, iretikitik 5 mahsanih: “Mahsen pwukat me mehlel oh likilik.” Dahme Siohwa ketin inoukihda, e uhdahn kak ketin kapwaiada.

Ia duwe, ke kamehlele me “mahsen pwukat me mehlel oh likilik”? Kalaudehla omw sukuhlki duwen Sises Krais oh pwosonla ih. Ma ke wia met, ke pahn ale sapwellimen Siohwa kupwuramwahu. Ke sohte pahn ihte alehdi sapwellime kapai kaselel tohto ahnsouwet, ahpw ke pil pahn alehdi koapworopwor en mour soutuk nan Paradais nin sampah, wasa me “mehla solahr pahn wiawi, solahr mwahiei, solahr nsensuwed, solahr medek.”