Ripoht ehu me pwarada nan ehu pwuhk (Biblical Archaeology Review) kasalehda me pwehki dahme sounkasawih kepwehn mahs kan diarada, kitail kak kamehlele me aramas “daulih 50” me kileldi nan Palien Paipel ni Lokaiahn Ipru uhdahn mie mahs. Nanpwungen aramas pwukat iei nanmwarki 14 en Suda oh Israel, duwehte nanmwarki Depit oh Esekaia me aramas tohto ese duwe, oh pil nanmwarki Menahem oh Peka me aramas sohte nohn ese. Irekidien eden aramas pwukat pil iangahki Parao meh 5 oh pil nanmwarki en Asiria, Papilon, Mohap, Persia, oh Siria meh 19. Ahpw kaidehn irail me lapalap kante me Paipel oh sounkasawih kepwehn mahs kan kilelehdi. Irail kan me aramas sohte nohn ese, duwehte samworo lapalap kan, sounkawehwe kosonned men, oh kaun lapalap teikan, pil iang kileldi.

Ripohto koasoia me me lapalap tohto nan sukuhl laud kan pwungki me aramas pwukat uhdahn mie mahs. Ni mehlel, Palien Paipel ni Lokaiahn Krihk kin koasoia duwen me lapalap tohto teikan nan poadopoad, duwehte Erod, Pontius Pailet, Daipirius, Kaiapas, oh Serkius Paulus. Mehn kadehde kan me sounkasawih kepwehn mahs kan diarada pil kin utungada me aramas pwukat uhdahn mie mahs.

Mendahte rahnwet laion kan sohla mie nan sahpw kan en Paipel, sounnting en Paipel kan ese duwen mahn menet pwehki koasoipen mahn menet sansalda daulih pak 150. Pali laud en ahnsou, Paipel kin doadoahngki mahn menet ong karasaras kan; ahpw mie ekei wasa me e mahsanih duwen aramas ar tuhwongada laion kan. Karasepe, Paipel mahsanih duwen Samson, Depit, oh Penaia ar kemehla laion. (Sounkopwung 14:5, 6; 1 Samuel 17:34, 35; 2 Samuel 23:20) Paipel pil mahsanih duwen laion kan ar kemehla aramas.​—1 Nanmwarki 13:24; 2 Nanmwarki 17:25.

Ni mwehin kawao, laion en Eisia (Panthera leo persica) kin mi nan sahpw kan me met adaneki Turkey, Krihs lella Palestine, Siria, Mesopodamia, oh nanpwungen paliepeng oh palikapi en India. Aramas akan kin masak oh wauneki mahn menet. Mahlen kan oh dipwisou kaselel kan en mahs sang sahpw pwukat kin kalapw kasalehda duwen mahn menet. Wasa me mehn Papilon kan en mahs kin keid kohla wia arail kaudok (Babylon’s Processional Way), dihd siment me mi ni keilen ahlo kin kapwatki mahlen en mahn menet.

Ripoht kasalehda me sounpei kan en mahs kin rapahki oh kemehla laion kan nan Palestine ni kaimwiseklahn pahr 1200. Mwomwen me laion kan sohla mie wasaht mwurinte pahr 1300. Ahpw, miehte me ripohtki me re kilang laion kan nan Mesopodamia oh Siria lao lel pahr 1800, oh ni tepin pahr 1900, ekei pil kilangada laion kan nan Iran oh Iraq.