OARALAP | IHS SOUNKADEHDEHN SIOHWA KAN?
Dahme Kahrehda Se Kin Kalohk?
Ele me kin keieu kasalehda at weksang meteikan iei at kin wia doadoahk en kalohk ihmw lel ihmw, nan wehi pokon oh sohte lipilipil wasa me aramas akan mi ie. Dahme kahrehda se kin wia met?
Sounkadehdehn Siohwa kan kin kalohk pwehn kalinganahla Koht oh kasansalehda duwen mwareo. (Melkahka 96:2, 3) Se pil kin men peikiong Krais Sises, me ketin kehkehlingkihong kitail: “Kumwail eri kohwei wasa koaros oh padahkihong tohn wehi kan koaros; pwe re en wiahla nei tohnpadahk: . . . oh kehkehlingkihong irail re en peikiong mehkoaros me I koasoanediong kumwail.”—Madiu 28:19, 20.
Patehng met, se kin poakohng mehn mpat kan. (Madiu 22:39) Ei mehlel, se ese me aramas tohto mie pein arail pelien lamalam oh me kaidehn koaros kin perenki rong duwen at padahk kan. Ahpw, se kamehlele me padahk kan en Paipel kin doarehla aramas. Ihme kahrehda se kin “wonoweite ni padahk oh kawehwe Rongamwahu duwen Sises,” duwehte dahme tepin Kristian ko kin wia.—Wiewia 5:41, 42.
Emen me kin onopki duwen kousoanpenehn aramas akan (sociologist), Antonio Cova Maduro, ntingihedi duwen Sounkadehdehn Siohwa kan ar kin nanti laud doadoahngki soahng koaros me re ahneki . . . , pwe Mahsen en Koht en kak lella nin sampah pwon.”—Doaropwehn nuhs El Universal, Venezuela
Pali laud en irail kan me kin wadek nait pwuhk kan kaidehn Sounkadehdehn Siohwa kan. Oh aramas rar rar kei me kin onop Paipel reht kin iang pelien lamalam teikan. Ahpw re kin kalahnganki me Sounkadehdehn Siohwa kan kin mwemweitla rehrail.
Mwein mie omw iren kalelapak teikan duwen Sounkadehdehn Siohwa kan. Se luke komwi en ale pasapeng kan sang ni omw
-
Idek rehn emen Sounkadehdehn Siohwa.
-
Kohla nan nait website, www.mt1130.com.
-
Towehda at mihting kan me sohte isepe oh me ritidahng wehi pokon.
