Soun dake oahs pahmeno ele mwomwen ehusoahng de kamasepwehk, ahpw re sohte wia met. Dahme kahrehda? Pwehki Paipel oh soahng kan me wiawi nan poadopoad sewese kitail en kak kasawihda ni sansal dahme emenemen soun dake oahs ko kin kasalehda. Oh mendahki arail dake oahs ko kin kasalehda kahpwal nin sampah, met pil kak wehwehki rohng mwahu ong komwi oh omw peneinei. Ia duwen? Keieu, kitail pahn tehkpene wehwehn emenemen soun dake oahs ko.

Kasansalo tepida ni ahl wet: “I ahpw kilangada oahs pwetepwet men. Me dakeo weuwa kesik ketieu pwoat oh nihn ehu kohieng. E ahpw mwesel kohkohla, kolahng kalowehdi eh imwintihti kan.”—Kaudiahl 6:2.

Ihs me soun dake oahs pwetepweto? Pwuhken Kaudiahl kasalehda ihs ih. Mwuhr e kasansalehda ih nin duwen “Mahsen en Koht.” (Kaudiahl 19:11-13) Lengileng wet, Mahseno, kin dokedoke Sises Krais, pwehki eh kin ketin wia sapwellimen Koht sounkair. (Sohn 1:1, 14) Pil patehng met, e kin mwarenki “Nanmwarkien nanmwarki kan oh Kaunen kaun akan” oh pil e kin mwarenki “Loalopwoat oh Mehlel.” (Kaudiahl 19:16) E sansal me e sapwellimanki manaman en wia nanmwarkien karis en sounpei, oh e sohte kin ketin doadoahngki sapwellime manaman ni ahl me suwed de limeidihd. Ahpw, mie peidek kan me kin pwarada.

Ihs me ketikihong Sises manaman en kalowehdi? (Kaudiahl 6:2) Soukohp Daniel kilangada Mesaia “emen me likamwete aramas” nan kasansal ehu, oh e alehdi “manaman en kaunda wasa, wahu” sang rehn “me sapwellimanki mour poatopoato,” Siohwa Koht. a (Daniel 7:13, 14) Eri, Koht Wasa Lapalahpie me ketikihong Sises manaman oh pwuhng en kakaun oh wia kadeik. Oahs pwetepweto wia kilel ehu me konehng ong mahwen me sapwellimen Koht Ohlo pahn ketin wia ni pwung, pwehki Paipel kin kalapw doadoahngki poh pwetepwet en wia kilelepen pwung.​—Kaudiahl 3:4; 7:9, 13, 14.

Iahd me soun dake oahs pwukat tepida dake wererail oahs kan? Tehk me soun dake oahs keieuo Sises, tepida tang ni ahnsou me e ketin alehdi nihn ehu. (Kaudiahl 6:2) Iahd me Sises ketin alehdi nihn ehu nanleng nin duwen Nanmwarki men? E sohte alehdi ni ahnsou me e ketin pwuradahla nanleng mwurin eh pwoula. Paipel kasalehda me mie ahnsou ehu me e pahn anahne ketin awihki mahs. (Ipru 10:12, 13) Sises ketikihong sapwellime tohnpadahk ko kilel ehu me pahn kasalehda kaimwiseklahn ahnsou me e pahn anahne ketin awih oh tepidahn sapwellime kaunda nanleng. E mahsanih me ni ahnsou me eh kaunda pahn tepida, irair en sampah wet uhdahn pahn suwedla. E pahn mie mahwen, lehk lapalap, oh soumwahu lusulus. (Madiu 24:3, 7; Luk 21:10, 11) Ni ahnsowohte me Mahwen Keieu en Sampah tepida nan pahr 1914, e tepida sansalda me tohnsampah lelehr nan ahnsowo, ahnsou apwal ehu pohn sampah me Paipel kin kahdaneki “imwin rahn akan.”​—2 Timoty 3:1-5.

Ahpw dahme kahrehda kitail kin kilang irair suwed kan a kaidehn irair mwahu kan, sangete ahnsou me Sises ketin alehdier sapwellime nihn nan pahr 1914? Pwehki ahnsowo Sises ketin tepida kakaun nanleng, a kaidehn nin sampah. Ahnsowo mahwen ehu wiawi nanleng, oh nanmwarki kapwo Sises, me pil kin mwarenki Maikel, kesehdihdo Sehdan oh nah ngehn suwed kan nin sampah. (Kaudiahl 12:7-9, 12) Ni eh mihmihier nin sampah, Sehdan kin uhdahn lingeringer sangete ahnsowo pwehki e ese me eh ahnsou mwotomwotalahr. Ni mehlel, ni ahnsou keren Koht pahn ketin kapwaiada kupwureo ni eh pahn ketin kalowehdi Sehdan nin sampah wet. (Madiu 6:10) Met, kitail pahn tehkpene ia duwen soun dake oahs silimeno ar sewese kadehdehda me kitail wie momour erein ahnsou apwal ni “imwin rahn akan.” Weksang soun dake oahs keieuo me kin uhdahn wehwehkiong emen me momour, soun dake oahs  silimeno me kohdo mwuri kin karasahiong irair kan me kohpesengehr nan sampah pwon.

“I ahpw pil kilangada oahs emen, me weitahta. Manaman kohieng me dakeo, pwe en kamwakid mahwen nin sampah pwe aramas akan en pakamakampene nanpwungahr. Kedlahs reirei pwoat pil kohieng.”​—Kaudiahl 6:4.

Soun dakeo kin wehwehki mahwen. Tehk me e sohte kihsang popohl nan ekeite wehi ahpw nan sampah pwon. Nan pahr 1914, ehdin nan poadopoad me mahwen laud ehu wiawi nan sampah pwon. Mwurin mwo mahwen keriaun sampah pil wiawi, me uhdahn kauwehla laud soahng tohto sang mahwen keieuo. Ekei kapatahdi uwen tohtohn mehlahn aramas akan sang mahwen oh dipwisoun mahwen kan sangete nan pahr 1914, me aramas tohtohsang sapw (100 million) me mehla. Patehng met, aramas tohto teikan pil lokolongki ohla laud kan.

Ia duwe, atail ahnsou uhdahn direkihla mahwen? Ehdin nan poadopoad me aramas ahneki koahiek en kemehla aramas koaros nan sampah. Pil pwihn me dene re kin kolokol onepek mwahu, me duwehte United Nations, sohte kak kauhdi soun dake oahs weitahtao.

“I ahpw kilangada oahs toantoal men. Me dakeo kolokol mehn tenek ehu. I pil rongada ngihl ehu me peidihdo sang nanpwungen menmour pahmeno, me nda, ‘Paunen pilawa [“wihd,” NW] riau mihmi ni uwen pweinen doadoahk en rahn ehu, a paunen parli weneu mihmi ni uwen pweinen doadoahk en rahn ehu. Ahpw kaleke ke kauwehla tuhke olip kan oh mwetuwel en wain kan!’”​—Kaudiahl 6:5, 6.

Soun dakeo kin wehwehki lehk lapalap. Kitail kilang wasaht kilel en tikitiklahn mwenge me kahrehda uwen paunen wihd riau (1.08 L) pahn mihmi ni uwen pweinen doadoahk en rahn ehu, ni mwehin tepin Kristian kan! (Madiu 20:2) Uwen pweineo kak pwainda paun siluh (3.24 L) en parli, nan ahnsowo wahn pilawa kin tikitiksang wihd. Ia duwen met eh kak kamwengehda peneinei laud ehu? Aramas akan kin ale kehkehlik en kin kasohtikih kenerail mwengehn ehuehu rahn, duwehte lehn olip oh wain me irail kin kalapw doadoahngki ahnsowo.

Ia duwe, sangete nan pahr 1914, kitail kilangehr mehn kadehde me soun dake oahs toantoal menet wie mwekimwekid? Ei! Mpen aramas isidep (70 million) mehkihla lehk lapalap erein pahr 1901 lel 2000. Emen kaun kapatahda me “aramas welisapw lime rar (805 million) emen sang nanpwungen meh duwemen nan sampah pwon, sohte kin itar kanarail mwenge nan pahr 2012-14.” Pil ehu ripoht koasoia: “Duhpek kin kemehla aramas sounpar koaros laudsang AIDS, malaria oh limengimeng.” Mendahki doadoahk laud tohto kin wiawi pwehn kamwengehda aramas duhpek kan, soun dake oahs toantoalo kin pousehlahte wie tangatang.

“I ahpw kilangada oahs pehsehs men. Me dakeo adaneki Mehla, oh wasahn me melahr akan me idawehn. Manaman en kaunda wasa kohiengehr pwe ira en kin kaunda pahkis ehu en tohn sampah, pil manaman en kemehkihla aramas mahwen, lehk lapalap, soumwahu, oh mahn lawalo kan en sampah.”​—Kaudiahl 6:8.

Kapahmen en soun dake oahso kin wehwehki mehla me kohsang soumwahu oh soahng teikan me kin kahrehda. Mwurinte nan pahr 1914, Spanish flu kemehla aramas dep kei (tens of millions). Ele aramas lime sapw (500 million) kin alehdi soumwahwo, emen sang nanpwungen meh 3 me kin iangada soumwahwo!

Ahpw kaidehn Spanish flu te me kemehla aramas tohto. Irail semen kan kapatahda me aramas sapw kei (hundreds of millions) mehkihla soangen kilitepw ieu me doar erein pahr 1901 lel 2000. Leledo rahnwet, aramas rar kei kin mehla pwehki AIDS, limengimeng, oh malaria, mendahki doadoahk laud kan eh kin wiawi ni palien wini kan.

Imwilahn met kin duduwehte, mehla kin wiawi pwehki mahwen, lehk lapalap, de kahpwal teikan. Mehlahn aramas akan sohte kin uhdi, oh mwomwen sohte koapworopwor.

Ahnsou apwal pwukat me kin wiawi pahn kereniong imwisekla. Tamataman met: Sises ketin “mwesel kohkohla” pwehn kalowehdi sapwellime imwintihti nan pahr 1914, e ketin kesehdihdo Sehdan nin sampah, ahpw Sises saikinte ketin kanekehla kalowehdi sapwellime imwintihti kan. (Kaudiahl 6:2; 12:9, 12) Ni ahnsou keren, nan Armakedon, Sises pahn ketikihsang en Sehdan manaman oh pahn kasohrehla aramas akan me kin utung Tepil. (Kaudiahl 20:1-3) Sises sohte pahn ketin kasohrehlahte soun dake oahs silimeno ahpw e pahn ketin kamwahwihala soahng kan me irail kauwelahr. Ia duwen? Tehk dahme Paipel inoukihda.

Mahwen pahn sohrala ahpw popohl me pahn uhd kaunda. Siohwa pahn “ketin katokehdi mahwen wasa koaros nin sampah; e kin ketin katimpeseng arep kan, oh kauwehla kesik ketieu kan.” (Melkahka 46:9) A ong aramas me poakohng popohl re “pahn sapwenikihla sahpwo oh re pahn paiamwahu oh popohl.”​—Melkahka 37:11.

Lehk lapalap pahn sohrala ahpw e pahn uhd diren mwenge. “Reken wahn pilawa en kin wiewiawihte nan wehiet; wahnsahpw en kin kipehdi dohl akan.”​—Melkahka 72:16.

Kahpwal kan oh mehla pahn sohrala, koaros pahn nsenamwahuki roson unsek oh mour soutuk. Koht “pahn kin ketin limwihasang pilen masarail koaros. Mehla solahr pahn wiawi, solahr mwahiei, solahr nsensuwed, solahr medek. Soahng mering kan sohralahr.”​—Kaudiahl 21:4.

Ni ahnsou me Sises ketiket nin sampah, e ketin kasalehda mwomwen ni ahnsou kohkohdo pahn sapwellime kaunda. E ketin wiahda popohl, wiahda manaman kapwuriamwei pwehn kamwenge aramas kid kei, kamwahwihala me soumwahu, oh pil ketin kaiasada me melahr kan.​—Madiu 12:15; 14:19-21; 26:52; Sohn 11:43, 44.

Sounkadehdehn Siohwa kan pahn perenki kasalehiong uhk nan noumw Paipel ia duwen omw kak onopada ni ahnsou me soun dake oahs ko pahn uhdi. Ke pahn perenki kalaudehla omw sukuhlki duwen met?