Bibliapi “alma” palabraqa, hebreo parlaypi néfesch palabramanta jamun, griego parlaypitaj psykjé palabramanta. Néfesch palabraqa niyta munan “kausaj” chayri “kausayniyoj”. Psykjé palabrataj niyta munan “kausaj” chayri “runa”. a Chayrayku almaqa noqallanchejtaj kanchej, nitaj noqanchej ukhupi waj runa jinachu, manallataj cuerponchejmanta tʼaqakoj espirituchu. Chayrayku wañupojtinchej, mana imapis noqanchejmanta llojsinchu. Bibliapi qhawarina imaraykuchus chayta nisqanchejta.

•   Bibliaqa Jehová Dios ñaupaj runata ruwasqanmanta nin: Adanqa “causaj alma capurka”, nispa (Génesis 2:7, Biblia Quechua de Cuzce). Bibliaqa mana ninchu, Diosqa Adanman uj almata qosqanta. Astawanpis nin, Adán “kausaj almaman tukusqanta”, nisunman “Adanpuni alma kasqanta”.

¿Alma wañuyta atinchu?

 Arí. Almaqa wañunpuni. Bibliamanta ashkha versiculostaj chayta rikuchiwanchej. Wakin versículos kaykuna kanku:

•   “Tucuy alma Diosmanta chay sutʼinchajta mana uyarejka, runacuna chaupimanta wañuchiska canka” (Hechos 3:23, Mosoj Testamento 1956).

•   “Tucuy causaj almataj jatun kochapi cajcuna wañurkancu” (Apocalipsis 16:3, Mosoj Testamento 1956).

•   Ashkha Bibliaspi Levítico 21:11 versiculopi, Números 6:6 versiculopi ima, kay palabras rikhurin: “wañusqa aya”, “aya”, “wañusqa” ima. Jinapis Biblia hebreo parlaypi qhelqakushajtin, chay lugarespi néfesch palabra rikhurerqa. Chay palabrataj, “alma” niyta munan.

Almaqa runaj kausayninwan ninakullanmantaj

 Bibliapeqa “almaqa” runaj kausayninwan ninakullanmantaj. Jobpa kausayninmanta parlaspa, Job 33:22 versiculopi hebreo parlaypi néfesch palabra oqharikorqa. Chay palabrataj “alma” niyta munan. Bibliaqa nillantaj, uj runaj kausaynin chayri alman wañuy patapi kayta atisqanta (1 Reyes 19:4, sutʼinchaynin; Salmo 35:4, sutʼinchaynin).

 “Alma” runaj kausayninwan ninakusqanta yachayqa, wakin versiculosta sumajta entiendenapaj yanapawasunman. Chaykunamanta ujqa, Génesis 35:18. Quechua de Cuzce Bibliaqa, chay versiculopi ‘Raquelpa alman llojsipushasqanta’ nin. Chaywanqa nisharqa Raquel wañupushasqanta. Chayrayku Diosmanta Qhelqasqa Biblia, waj Bibliapis chay versiculopi ninku, “Raquel wañupushasqanta”.

¿Imaraykutaj ashkha runas alma mana wañusqanta creenku?

 Ashkha iglesias chayta yachachisqankurayku. Yachakorqanchej jina, Bibliaqa mana yachachinchu wañupojtinchej almanchej kausashallasqantapuni. Chanta, ¿maymantataj chay yachachiy rikhurerqari? Chay yachacheyqa unay tiempomanta Grecia llajtapi rikhurerqa. Uj libro nin: “Bibliapi almaqa ninakun samayniyoj kajkunawan, nitaj mana rikukoj espirituwanchu. Almaqa nillataj cuerpomantapis tʼaqasqachu kashan. Ñaupa tiempomanta griegosmin creej kanku, almawan cuerpowan waj waj kasqankuta. Iglesiastaj paykunamanta chay yachachiyta japʼikunku”, nispa (Encyclopædia Britannica).

 Diosqa mana munanchu paypa yachachiynin, runaj yachachiyninwan chajrukunanta. Chaykunamanta ujqa kashan, runas alma mana wañusqanta yachachisqanku. Chayrayku Biblia nin: “Allinta qhawakuychej, pajtataj pipis presota jina apakapusunkichejman runaj yachayninwan, qhasi manakaj yachachiykunawan ima. Chaykunaqa ñaupa runaspa yachachiyninkumanta jamun”, nispa (Colosenses 2:8, Bi7).