Bibliapeqa mana kanchu uj ley, niraj nacekoj wawitata wañuchiy jucha kasqanta nejqa. Jinapis ashkha versículos, imaynatachus Dios kausayta qhawasqanmanta parlan. Chaytaj sut’ita entiendechiwanchej, imaynatachus Diosninchej niraj nacekoj wawitaj kausayninta qhawasqanta.

 Kausaytaqa Dios qowanchej (Génesis 9:6; Salmo 36:9). Payqa tukuy kausayniyojkunata jatunpaj qhawan, niraj nacekoj wawitaspa kausayninkutapis. Chayrayku matrizllapiraj kaj wawitata wañuchejkunaqa, runa wañuchis kanku.

 Diosqa israelitasman kayta kamacherqa: “Sichus iskay runas maqanakushaspa uj onqoj warmita japʼirparichinkuman, chay warmitaj manaraj nacechikunanpi wawitanta nacechikunman, nitaj chay warmi chayri wawitan wañunmanchu chayqa, pichus juchayoj kajqa paganan tiyan mashkhatachus chay warmej qosan mañanqa chayta, jueces nisqankuman jina. Sitajchus chay warmi chayri wawitan wañunman chayqa, chay wañuchej runaqa wañuchisqallataj kanqa” (Éxodo 21:22, 23, sutʼinchaynin). a

•  ¿Maykʼajmantapachataj Dios uj wawitata runata jinaña qhawan?

•  ¿Dios perdonanmanchu wawitankuta orqhochikojkunata, chayri imata tomaspa wawitankuta wijchʼurpajkunata?

•  Mamaj chayri wawitaj kausaynin wañuy patapi kajtin, ¿allinchu kanman niraj nacekoj wawitata wañuchina?

 Mamanpa wijsanpi rikhurisqanmantapacha. Diosqa uj warmi onqoj rikhurisqanmantapacha, wawitanta runata jinaña qhawan. Bibliapi niwanchej, wijsallapiraj kaj wawitapis, nacesqa wawitapis paypajqa kikin kasqankuta. Wakin versiculosta qhawarina.

•   Rey Davidqa Dios yuyaychasqanrayku payman nerqa: “Ñawisniykeqa rikuwarqankuña mamaypa wijsanpi rikhurishajtiy”, nispa (Salmo 139:16). Diosqa David niraj nacekushajtinpis, payta uj runata jinaña qhawarqa.

•   Diosqa Jeremías niraj nacekushajtinpis, payta profetan kananpaj ajllarqaña. Chayrayku Jeremiasman nerqa: “Niraj mamaykej wijsanpi ruwashasojtiy ñapis rejserqaykiña. Niraj nacekushajtiyki ñapis ajllakorqaykiña. Qanta churarqayki nacionespa profetan kanaykipaj”, nispa (Jeremías 1:5).

•   Lucas evangeliota qhelqajqa, wijsallapiraj kaj wawitamanta, nacesqa wawitamantawan parlarqa. Iskayninkupajtaj kikin palabrata griego parlaypi oqharerqa. Lucastaj médico karqa (Lucas 1:41; 2:12, 16).

 Arí. Diosqa perdonayta atinman. Ichá pillapis niraj Diosta rejsishaspa wawitanta orqhochikorqa, chayri imatapis tomaspa wijchʼurparqa. Jinapis kunan entiendenña niraj nacekoj wawitata wañuchiy jucha kasqanta. Chay ruwasqanmanta tukuy sonqo arrepientekun chayqa, Jehová Diosqa payta perdonayta atinman. Imaraykuchus Biblia nin: “Jehová Diosqa khuyakoj Dios, kʼacha sonqoyojtaj [...]. Imaynatachus inti llojsimuy ladoqa may jina karupi kashan inti yaykuy ladomanta, ajinata Diosqa pantasqasninchejta noqanchejmanta may jina karuman churan” (Salmo 103:8-12). b Jehová Diosqa juchankumanta tukuy sonqo pesachikojkunata perdonan. Chayrayku niraj nacekoj wawitata wañuchejkunatapis perdonayta atin (Salmo 86:5).

 Mana allinchu. Imaraykuchus Biblia nisqanman jinaqa, niraj nacekoj wawitapis Diospajqa uj runa jinaña. Chayrayku doctor wawita malsito nacekunanta nejtinpis, chayri mamanpaj mana allinchu kananta nejtinpis, chay wawitata wañucheyqa juchapuni.

 Ichá wakin kutisqa, uj warmi wawitanta nacechikushajtin, paywan wawitanwan wañuy patapi rikhurinkuman. Doctortaj ninman ujnillanta salvayta atisqanta. Chay kutispeqa, chay wawitaj tatanwan mamanwan ajllananku tiyan pichus kausananta. Jinapis chay jina casosqa maypi jinalla tiyan.