Bibliaqa nerqaña ‘kay mundoj imasninpa tukukuyninpi’ chayri ‘kay mundoj tukukuyninpi’ imaschus kananta, runaspis imaynachus kanankuta (Mateo 24:3; Qheshwa Biblia). Bibliaqa chay tiempota sutichallantaj ‘tukukuy tiempo’, ‘qhepa pʼunchaykuna’ nispa (Daniel 8:19; 2 Timoteo 3:1).

 Bibliaqa nerqaña ujllapi ashkha imas pasananta, qhepa pʼunchaykunapi kausashasqanchejta yachananchejpaj (Lucas 21:7). Imatachus Biblia nisqanta qhawarina.

 Jatuchaj guerras. Jesús nerqa: “Uj nacionqa waj nacionwan maqanakonqa, uj gobiernopis waj gobiernowan maqanakonqa”, nispa (Mateo 24:7). Apocalipsis 6:4 versiculopis Jesuspa nisqanman rijchʼakullantaj, chaypi parlan uj puka caballopi lloqʼasqa kajmanta, chaytaj ninakun guerraswan. Chay guerrastaj “jallpʼamanta allin kausayta” chinkachinan karqa (Apocalipsis 6:4).

 Yarqhaykuna. Jesús nerqa “yarqhaykuna” kananta (Mateo 24:7). Apocalipsis libroqa parlan, yana caballopi lloqʼasqa kajmanta, chay caballo llojsimojtintaj ashkha lugarespi yarqhay kanan karqa (Apocalipsis 6:5, 6).

 Sinchʼi terremotos. Jesús nerqa kaynejpi jaqaynejpi “terremotos” kananta (Mateo 24:7; Lucas 21:11). Chay sinchʼi terremotosqa ni jaykʼaj jina mundo enteropi runasta sufrichinan karqa, may chhikatataj wañurachinan karqa.

 Onqoykuna. Jesús nisqanman jina, “wañuchej onqoykuna” tukuynejpi kanan karqa (Lucas 21:11).

 Wañuchinakus. Unaymantapachapis wañuchinakus karqapuni. Jinapis Jesús nerqa qhepa pʼunchaykunapi “sajra kausay” yapakusqanrayku, astawan wañuchinakus kananta (Mateo 24:12).

 Runas jallpʼata pierdechinku. Apocalipsis 11:18 nerqa runasqa ‘jallpʼata pierdechinankuta’. Chaytataj imaymanasmanta ruwananku karqa, mana sajra kausaynillankuwanchu, manaqa jallpʼanchejta imaymanasmanta chʼichichaspa.

 Runas astawan sajrayanku. Biblia nin: “Runasqa [...] malagradecidos kanqanku, wasanchajkuna kanqanku, [...] mana uj yuyayllaman chayayta munanqankuchu, wajkunamanta llullakuspa parlanqanku, munayninkuwan atipachikonqanku, manchay phiñas kanqanku, allin kajta mana munakonqankuchu, amigosninkoj contranpi sayaykonqanku, kʼullus kanqanku, mayta runaykachanqanku”, nispa (2 Timoteo 3:1-4). Qhepa pʼunchaykunapeqa chay jina mana allinmanpuni runas tukunanku karqa, chayrayku Biblia nin qhepa pʼunchaykunapi kausay mayta sajrayananta.

 Familias manaña allintachu kausakunku. Kay 2 Timoteo 3:2, 3 nisqanman jina, familiapi munakuy manaña kananchu karqa, wawaspis ‘tatasninkuta mana kasukunankuchu’ karqa.

 Diosta manaña munakunkuchu. Jesús nerqa: “Casi tukuypa munakuynin chiriyaponqa”, nispa (Mateo 24:12). Jesusqa chayta nispa, casi tukuy runas Diosta manaña munakunankuta nisharqa. 2 Timoteo 3:4 versiculopis nillarqataj, qhepa pʼunchaykunapi runas ‘Diosta munakunankumantaqa munaynillankuta ruwanankuta’.

 Diosta yupaychajman rijchʼakojkuna. 2 Timoteo 3:5 nerqa, runasqa “Diosta tukuy sonqo yupaychajkunaman” rijchʼakunallankuta, manataj kamachiykunasninman jinachu kausakunankuta.

 Bibliaj profeciasnin astawan entiendekun. Daniel libropeqa nikorqaña ‘tukukuy tiempopi’ cheqa yachay astawan ashkhayananta. Chayrayku qhepa pʼunchaykunamanta profeciaspis astawan entiendekunan karqa (Daniel 12:4).

 Jallpʼantinpi willakun. Jesús nerqa: “Diospa Gobiernonmanta sumaj willaykunapis jallpʼantinpi willakonqa”, nispa (Mateo 24:14).

 Mana kasukojkuna, asipayajkuna yapakunku. Jesús nerqa qhepa pʼunchaypi kausakushasqanchejta rikuspapis, ashkha runas mana kasukuyta munanankuta (Mateo 24:37-39). Chantapis 2 Pedro 3:3, 4 nerqa asipayajkuna, burlakojkuna rikhurimunankuta, qhepa pʼunchaykunapi imaschus pasanan karqa chay imasta juntʼakojta rikuspapis, chayta mana valechinankuta.

 Tukuynin profecías juntʼakushan. Jesusqa nerqa qhepa pʼunchaykunapi tukuy kay profecías ujllapi juntʼakunanta, manataj wakillanchu (Mateo 24:33).

 Arí. Kay mundopi imaschus pasasqan, Bibliaj nisqanpis sutʼita rikuchin, qhepa pʼunchaykunaqa 1914 watapi qallarisqanta. Chay watapitaj Primera Guerra Mundial qallarerqa. Kay mundopi imaschus pasasqantaj sutʼita rikuchin qhepa pʼunchaykunapi kausashasqanchejta. Chaymanta astawan yachanaykipaj kay videota qhawariy:

 1914 watapi Diospa Gobiernon cielopi kamachiyta qallarerqa. Chay Gobiernoqa kamachiyta qallariytawankama, Diablota demoniosnintawan cielomanta jallpʼaman wijchʼumorqa. Chaymantapacha paykunaqa kay jallpʼallapiña munayninkuta ruwayta atinku (Apocalipsis 12:7-12). Runas sajrayasqanku, mana allintachu kausakusqankupis, sutʼita rikuchin runas Diabloj atiyninpi kashasqankuta. Chayrayku ‘qhepa pʼunchaykunapi’ kausayqa “may llakiy”, ‘may sajrataj’ (2 Timoteo 3:1).

 Ashkha runasqa kausay may sajra kasqanrayku llakisqas kashanku. Paykunaqa llakikunku runas manaña ujchasqas kausakuyta atisqankumanta. Wakintaj llakikunku runas paykunapura wañuchinakuspa tukuchinakunankumanta.

 Wakin runastajrí, kausay mayta sajrayasqanmanta llakikuspapis, uj sumaj kausay kananta suyakushanku. Paykunaqa yachanku Diospa Gobiernon pisimantawan kay mundomanta problemasta chinkachinanta (Daniel 2:44; Apocalipsis 21:3, 4). Paykunaqa pacienciawan suyakushanku Diospa nisqasnin juntʼakunanta. Chaykamataj sonqochayta tarinku Jesuspa nisqanpi: “Tukukuykama aguantajrí salvasqa kanqa” (Mateo 24:13; Miqueas 7:7).