“Diospa palabranqa kausashan, atiyniyojtaj. Puraj filoyoj espadamantapis aswan filoraj. Chay palabraqa runaj ukhunkamapuni chayan, rikuchintaj imayna sonqoyojpunichus kasqanta, imayna runamantajchus rijchʼakusqanta. Tullusmantapis chilinasta tʼaqan. Sutʼimantaj orqhoyta atin sonqoj yuyasqanta, imajtinchus ajinata yuyasqantapis” (Hebreos 4:12, Diospa Palabran).

 “Diospa Palabranqa kawsayniyoj, atiyniyojtaj; puraj filoyoj espadamanta aswan filo. Chay Palabraqa runaj sonqon ukhukamapuni chayan. Jinallataj yuyasqanta, sonqompi imatachus munasqantapis sutʼita rikuchin allinchus, manachus kasqanta” (Hebreos 4:12, Diosmanta Qhelqasqa).

 Dios imatachus runasman niyta munasqanqa Bibliapi kashan. Chaytaj sutʼiman orqhoyta atin imatapunichus yuyasqanchejta, imaraykuchus imatapis ruwayta munasqanchejta. Chantapis yanapallawanchejtaj aswan sumaj runas kanapaj.

 “Diospa palabranqa kausashan”. Kay versiculopi ‘Diospa palabran’ nispaqa, Bibliapi kaj Diospa nisqasninmanta chayri munayninmanta parlashan. a Diospa munayninmanta ujnenqa, kasukoj runas kay jallpʼapi allinta, ujchasqastaj wiñaypaj kausakunanku (Génesis 1:28; Salmo 37:29; Apocalipsis 21:3, 4).

 ¿Ima niytá munan “Diospa palabranqa kausashan” nispa? Diospa palabran chayri Diospa munaynenqa, chayta japʼikojkunaj sonqonkuta cambian, paykunaman uj suyakuyta qon, imapajchus kausasqankutataj reparachin (Deuteronomio 30:14; 32:47). Diospa palabranqa kausashan, imaraykuchus kausaj Diosqa munaynin juntʼakunanpaj trabajashallanpuni (Juan 5:17). Diosqa mana runas jinachu. Runasqa imatapis ruwasaj ninku, chantataj chayta qonqapunku chayri mana juntʼayta atinankuta reparakunku (Números 23:19). Diosqa nin: “Simiymanta llojsej palabrapis. Mana noqaman kutimonqachu mana ruwakuspaqa”, nispa (Isaías 55:10, 11).

 ‘Diospa palabranqa atiyniyoj’. ‘Atiyniyoj’ palabraqa traducikullanmantaj “atiywan imatapis ruwan”, “mana qhasillachu” nispa, chayri “tukuy ima juntʼananta juntʼanpuni” nispa. Chayrayku Jehová b Diospa tukuy ima nisqanqa juntʼakunpuni (Salmo 135:6; Isaías 46:10). Diosqa munayninta juntʼayta atin, imasta ruwanantachus mana yuyanchejchu chay imasta ruwaspa (Efesios 3:20). c

 Diospa palabranqa ‘atiynillayojtaj’, imaraykuchus chay palabrata jatunpaj qhawajkunata yanapan imaynachus kasqankuta, kausayninkutapis cambianankupaj. Paykunaqa Diospa yachachiykunasninta sonqonkupi japʼikunku, chayraykutaj Diospa palabran nisqanman jina yuyanku, kausanku, chayman jinataj imatapis ruwayta munanku (Romanos 12:2; Efesios 4:24). Ajinamanta Diospa palabranqa yanapashallantaj pikunachus Diospa palabranta “palabranta jinapuni” japʼikojkunata (1 Tesalonicenses 2:13).

 “Diospa palabranqa [...] puraj filoyoj espadamantapis aswan filoraj”. Diospa palabran mayqen espadamantapis aswan filo kasqanta nikun, imaraykuchus sonqo ukhukama chayayta atin, nisunman imayna runapunichus kasqanchejta reparachiyta atiwanchej. Chaytataj mana ruwayta atinmanchu runaj yachachisqanqa. Chaytapunitaj Hebreos 4:12 versículo qhepan partepi sutʼinchan.

 “Diospa palabranqa [...] runaj ukhunkamapuni chayan, rikuchintaj imayna sonqoyojpunichus kasqanta, imayna runamantajchus rijchʼakusqanta. Tullusmantapis chilinasta tʼaqan”. “Diospa palabranqa” uj espada jina chilinaskama chayri tuetanokama chayan, nisunman imatapunichus yuyasqanchejkama, imaynapunichus kasqanchejkamataj. Jehovaj yachachiykunasnenqa imastachus wajkuna mana rikuyta atinkuchu chay imasta sutʼiman orqhon, nisunman imayna runapunichus kasqanchejta. Chaytaj yanapawanchej aswan allin runaman tukunapaj. Chayqa noqanchejta kusichiwanchej, Ruwawajninchej Diostapis kusichillantaj.

 “Diospa palabranqa [sutʼiman] orqhoyta atin sonqoj yuyasqanta, imajtinchus ajinata yuyasqantapis”. Uj runa Diospa palabranta uyariytawan imatachus ruwasqanwan rikuchin imatapunichus yuyasqanta, imaraykuchus imatapis ruwasqanta ima. Sichus uj runa Diospa palabranta uyarispa japʼikun, chayman jinataj kausakunanpaj cambian chayqa, rikuchin kʼumuykukoj sonqo kasqanta, yachakuytapuni munasqanta, Ruwawajninchej Diostataj kusichiyta munasqanta. Sitajchus uj runa Diospa palabranpi pantaykunata maskʼan chayqa, rikuchin mana allin sonqoyoj kasqanta, jatunchakoj kasqanta, payllapaj imatapis munasqanta ima. Chay jina runaqa ichapis chayta ruwanman Diospa chejnisqan imasta ruwayta munaspalla (Jeremías 17:9; Romanos 1:24-27).

 Uj libroqa nin: “Diospa palabran sonqonchej ukhukamapuni chayan”, nispa. Diosqa sonqonchejpi tukuy ima kajta qhawayta atin, nitaj imapis kanchu Diospa palabran mana sutʼiman orqhoyta atinanpaj jinaqa. Hebreos 4:13 nin: “Tukuy imapis qhatarasqa kashan, sutʼipachataj, pimanchus cuentata qonanchej kashan chaypa qhawayninpeqa”, nispa.

 Hebreosman Cartaqa Dios yuyaychasqanman jina qhelqakorqa. Chay cartataqa apóstol Pablo qhelqarqa 61 wata chayta. Chay cartataj Jerusalenpi, Judeapi tiyakoj judío cristianospaj qhelqasqa karqa.

 Pabloqa Hebreos 3, 4 capitulospi qhelqarqa ñaupa tiempomanta israelitas mana allintachu ruwasqankumanta, paykunamantataj cristianos yachakunanku kasqanmanta, ama paykuna jina ruwanankupaj (Hebreos 3:8-12; 4:11). Jehovaqa israelitasman nerqa esclavos kasqankumanta kacharichinanta, Sumaj Jallpʼamantaj pusananta, chaypi mana manchachikuspa tiyakunankupaj (Deuteronomio 12:9, 10). Jinapis Egiptomanta llojsimorqanku chay israelitasqa kutin kutita rikucherqanku Diospa nisqasninpi mana creesqankuta, Diospa kamachiykunasninta mana kasukuymantaj yachaykukorqanku. Chayrayku paykunaqa mana ‘Dioswan khuska samarikorqankuchu’, nisunman Dioswan mana allinpichu karqanku, ajinapitaj chʼin jallpʼapi wañorqanku. Chay israelitaspa wawasninku Sumaj Jallpʼaman yaykojtinkupis, paykunaqa tatasninku jinallataj sapa kuti Jehovata mana kasukorqankuchu. Chayrayku tiempowanqa may llakiypi rikukorqanku (Nehemías 9:29, 30; Salmo 95:9-11; Lucas 13:34, 35).

 Pabloqa nerqa israelitas mana allinta ruwasqankumanta yachakunanchejta, ama paykuna jina ruwanapaj. Noqanchejqa israelitasmanta nisqa Dioswan khuska samarikusunchej, chaypajtaj Diospa palabranta kasukunanchej tiyan, imatachus ruwasaj nisqanpitaj sinchʼita creenanchej tiyan (Hebreos 4:1-3, 11).

 Hebreosman Carta imasmantachus parlashasqanta yachanaykipaj kay videota qhawariy.