“Wajyakamuway, noqataj kutichimusqayki. Willasqaykitaj jatuchaj imasta, mana entiendey atinasta, mana yachasqayki imasta” (Jeremías 33:3, Diospa Palabran).

 “Mañakuway, uyarisqaykitaj, willasqaykitaj jatuchaj imasta, mana yachasqayki imastataj yachachisqayki” (Jeremías 33:3, Qheshwa Biblia).

 Chayta nispaqa Dios runasta nishan paymanta mañakunankuta. Paymanta mañakojkunamantaj imachus qhepaman pasananta willan.

 “Wajyakamuway, noqataj kutichimusqayki”. “Wajyakamuway” nispaqa mana nishallanchu Diospa sutinta jatunmanta oqharispa payta wajyakuna kasqanta. Manachayqa nishallantaj paypa yanapayninta, yuyaychayninta mañakuna kasqanta (Salmo 4:1; Jeremías 29:12).

 Kay palabrasqa ñaupa israelitaspajsina qhelqakorqa. Imajtinchus paykunaqa Diosta saqerparerqanku, Babiloniamanta soldadostaj paykunawan maqanakusharqanku (Jeremías 32:1, 2). Jehovaqa a paykunata wajyarerqa watejmanta payman qayllaykunankupaj, yanapaynintataj mañakunankupaj.

 “Willasqaykitaj jatuchaj imasta, mana entiendey atinasta, mana yachasqayki imasta”. Dios imastachus sutʼinchananta nerqa chay imasqa ‘mana entiendey atinas’ (chayri mana taripay atinas) kanku, manachus Dios sutʼinchanman chayqa, runasqa ni jaykʼaj chay imasta yachasunmanchu. ‘Mana entiendey atinas’ nispa traducikun chay palabrasqa, “pakasqa imas” nispa traducikullanmantaj.

 ¿Ima “pakasqa imastataj” Dios sutʼinchanan karqa? Imaschus qhepaman pasananta, nisunman ñaupa Jerusalén llajta thuñisqa kananta, ni pi chaypi tiyakunanta, aswan qhepamantaj watejmanta sayarichisqa kananta (Jeremías 30:1-3; 33:4, 7, 8). Jinapis Diosqa nillarqataj llajtan mana chinkachisqachu kananta (Jeremías 32:36-38).

 Jehovaqa profeta Jeremiasman chayta nerqa 608 watapi, Jesús niraj jamushajtin, maypachachus rey Sedequías chunka watastaña kamachisharqa chaypacha. Jeremiasqa nerqaña Jerusalenta babilonios japʼikapunankuta, rey Sedequiastapis japʼinankuta. Rey Sedequiasmantaj Jeremiaspa willasqan mana allinchu rijchʼarqa, chayrayku Jeremiasta presocharqa (Jeremías 32:1-5; 33:1; 37:21).

 Chay imas pasashajtin Diosqa Jeremías 33:3 versiculopi nisqanta nerqa. Jinapis rey Sedequiaswan, casi tukuynin israelitaswanqa mana Jehovata wajyakorqankuchu, nitaj payta maskʼarqankuchu. Chaytaj may llakiy karqa (Jeremías 7:26; 25:4). Chaymanta uj watanmantaj Sedequiasqa manaña reychu karqa, Jerusalén thuñisqa karqa, chaypi mana wañojkunataj Babiloniaman preso apasqa karqanku (Jeremías 39:1-7).

 Jeremías 33:3 versiculoj nisqanqa yuyarichiwanchej Diosqa kunanpis yanapayta atiwasqanchejta ‘munayninta allinta rejsinapaj’, “pakasqa yachaynintapis” yachanapaj. Chaypajqa Bibliata estudiana tiyan, chayta entiendenapajtaj Diospa yanapanta mañakuna tiyan (Colosenses 1:9; 1 Corintios 2:10). Chay pakasqa yachayninmanta ujnenqa kashan, Dios imatachus qhepaman ruwasaj nisqan (Apocalipsis 21:3, 4).

 Jeremías libro imasmantachus parlashasqanta yachanaykipaj kay videota qhawariy.