Lucas 7:1-50
7 Jesusqa chay imasta runasman parlayta tukuytawan, Capernaúm llajtaman yaykorqa.
2 Chaypitaj soldadospa ujnin capitanninpa munasqa kamachin sinchʼi onqosqa kasharqa, wañupunanpaj jinaña.+
3 Chay capitanqa Jesusmanta parlajta uyarispa, judiospa wakin kurajkunanta Jesusman kacharqa kamachinta sanoyachej jamurinanpaj.
4 Paykunataj Jesusman qayllaykuspa mayta mañakorqanku: “Payqa yanapanaykipaj jinapuni.
5 Suyunchejta munakun, sinagogatapis ruwachipuwayku”, nispa.
6 Jinapi Jesusqa paykunawan rerqa. Wasi qayllapiña kashajtinkutaj, capitanqa amigosninta Jesusman kachasqa ninankupaj: “Señor, ama wasiykamaqa jamuychu, noqaqa mana wasiyman yaykunaykipaj jinachu kani.+
7 Chayrayku mana munarqanichu qanman jamullaytapis. Uj simillata niy, kamachiytaj sanoyaponqa.
8 Noqapis kurajkunaj kamachillan kani, soldadostapis kamachini, ujninta ‘riy’ nini, rintaj, ujninta ‘jamuy’ nini, jamuntaj, esclavoytapis ‘kayta ruway’ nini, ruwantaj”, nispa.
9 Jesustaj chayta uyarispa tʼukorqa, chantá kutirikuspa qhepanta rejkunaman nerqa: “Noqa niykichej: Ni Israelpipis kay jina jatun creeyniyoj runataqa tarinichu”,+ nispa.
10 Chay kachasqa runastaj wasiman kutispa, kamachitaqa sanoyasqataña tariparqanku.+
11 Chaymanta Jesusqa Naín llajtaman risharqa, paywantaj risharqanku discipulosnin, ashkha runas ima.
12 Llajtaj punkunman qayllaykushajtintaj, uj wañusqata orqhomushasqanku. Chay wañusqaqa uj viudaj kʼata qhari wawan* kasqa.+ Ashkha runastaj chay viudawan khuska llajtamanta llojsimushasqanku.
13 Señor Jesusqa chay viudata rikuytawan mayta khuyakuspa+ nerqa: “Amaña waqaychu”,+ nispa.
14 Qayllaykuspataj aya* apanata llankharerqa, apajkunataj sayarqanku. Chantá Jesusqa nerqa: “Joven, qanta niyki: Sayariy”,+ nispa.
15 Wañusqataj tiyaykamuspa parlarerqa, Jesustaj joventaqa mamanman qoporqa.+
16 Tukuyninkutaj mayta tʼukorqanku,* Diostataj jatunchaspa nerqanku: “Uj jatun profeta noqanchej ukhupi rikhurin”,+ nispa. Chantá nillarqankutaj: “Diosqa llajtanmanta yuyarikun”,+ nispa.
17 Chay ruwasqantaj uyarikorqa tukuynin Judeapi, muyuynintinpi ima.
18 Chay tukuy imastaqa Juanman discipulosnin willarqanku.+
19 Chaymanta Juanqa iskay discipulosninta wajyachispa, Señorman kacharqa tapumunankupaj: “¿Qanchu kanki jamunan karqa chay?+ ¿Wajtachu suyasqayku?”,* nispa.
20 Paykunataj Jesuspaman chayaspa nerqanku: “Juan Bautista kachamuwayku tapusunaykupaj: ‘¿Qanchu kanki jamunan karqa chay? ¿Wajtachu suyasqayku?’, nispa”.
21 Chay ratopacha Jesusqa ashkha runasta onqoykunamanta,+ sinchʼi nanaykunamantawan sanoyacherqa, supaykunatapis runasmanta qharqorqa, ashkha ciegostapis qhawaricherqa.
22 Chantá Jesusqa Juanpa discipulosninman kuticherqa: “Rispa Juanman willamuychej rikusqaykichejta, uyarisqaykichejtawan: kunanqa ciegos rikunku,+ suchus puririnku, lepra onqoyniyojkuna sanoyachisqa kanku,* joqʼaras* uyarinku,+ wañusqas kausarimunku, wajchasmanpis sumaj willaykunata willakun.+
23 Kusisqamin noqarayku mana pantajqa”,*+ nispa.
24 Juanpa discipulosnin ripusqankutawan, Jesusqa runasman Juanmanta ajinata nerqa: “¿Imatataj chʼinnejpi qhawamorqankichej? ¿Wayraj wajtaykachasqan caña huecatachu?+
25 ¿Imata qhawajtaj llojserqankichej? ¿Sumaj ropayoj runatachu?+ Sumaj ropayoj tukuy ima patapi kausakojkunaqa reyespa wasisninkupi kashanku.
26 Chanta, ¿imata qhawajtaj llojserqankichej? ¿Uj profetatachu? Arí, payqa profetamantapis aswan kurajraj.+
27 Juanmantaqa ajina qhelqasqa kashan: ‘Noqa willajniyta kachamusaj ñaupaqeykita rinanpaj, paytaj ñaupaqeykita rispa ñanta wakichipusonqa’,+ nispa.
28 Noqaqa niykichej: Tukuy runasmanta mana ujpis Juanmanta aswan kurajqa kanchu, chaywanpis Diospa Gobiernonpi sullkʼa kajqa, paymanta aswan kuraj”,+ nispa.
29 Chayta uyarispa, tukuy llajtantin, impuestota cobrajkunapis Diosqa cheqanpuni kasqanta nerqanku, Juanwan bautizachikusqankurayku.+
30 Fariseoswan Leymanta sumajta yachajkunawantaj mana Juanwan bautizachikorqankuchu, ajinamanta pisipaj qhawarqanku imatachus Dios paykunapaj munarqa chayta.+
31 Chantá Jesús nerqa: “¿Piwantaj kay tiempomanta runasta kikinchayman? ¿Pimantaj rijchʼakunku?+
32 Paykunaqa rijchʼakunku mercado plazapi tiyashaj wawasman, chay wawasqa qhaparinakuspa ninakunku: ‘Qenata tocapuyku manataj tusunkichejchu, llakiy takiyta takipuyku manataj waqankichejchu’, nispa.
33 Ajinallatataj Juan Bautistaqa mana tʼantata mikhuspa, nitaj vinota ujyaspa jamorqa,+ qankunataj ninkichej: ‘Supayniyoj’, nispa.
34 Noqataj* mikhuspa, ujyaspataj jamuni, qankunataj niwankichej: ‘Kay runaqa anchata mikhun, vinomanta wañusqataj. Impuesterospata, juchasapaspatawan masin’,+ nispa.
35 Uj runaj yachaynintajrí cheqan kajta ruwasqanpi yachakun”.+
36 Uj fariseoqa maytapuni Jesusta nisharqa paywan mikhoj jamurinanta. Chayrayku Jesusqa fariseoj wasinman yaykuspa mikhunanpaj tiyaykukorqa.
37 Chay llajtapeqa uj juchasapa warmi karqa, payqa fariseoj wasinpi Jesús mikhushasqanta yachaspa, alabastro rumi yuritupi perfumasqa aceiteta juntʼitata apamorqa.+
38 Jesuspa chakisnin chaypi qonqoriykukuspataj waqarqa, waqayninwan chakisninta joqʼochaspataj chujchasninwan chʼakicherqa. Chantapis chakisninta muchʼaraspa perfumasqa aceitewan jichʼaykorqa.
39 Chayta rikuspa chay wajyarikoj fariseoqa sonqonpi nisharqa: “Kay runachus profeta kanman chayqa, yachanmanchá imayna juchasapa warmichus payta llankhaykushasqanta”,+ nispa.
40 Jesustajrí ajinata yuyashasqanta yachaspa nerqa: “Simón, ujta nisqayki”, nispa. Paytaj nerqa: “Yachachejníy, nillaway”, nispa.
41 Jesustaj nerqa: “Uj runaman iskay runas manu kasqanku. Ujnenqa 500 denarios* qolqe manu kasqa, ujnintaj 50 denarios.
42 Ni imaynamanta kutichipuyta atejtinkutaj, iskayninkuta tukuy sonqo perdonasqa. Chay iskay runasmanta, ¿mayqentaj astawan munakonqa chay runata?”, nispa.
43 Simontaj kuticherqa: “Pichus aswan ashkha manuyoj karqa chay runachá”, nispa. Jesustaj nerqa: “Arí, allinta kutichinki”, nispa.
44 Chay warmita qhawarispataj Simonta nerqa: “¿Rikushankichu kay warmita? Wasiykiman yaykumorqani, manataj yakullatapis jaywawarqankichu chakisniyta mayllakunaypaj. Kay warmitajrí waqayninwan chakisniyta joqʼochawan, chujchasninwantaj chʼakichiwan.
45 Qanqa mana muchʼawarqankichu, kay warmitajrí yaykumusqaymantapacha chakisniyta muchʼaspa mana saykʼunchu.
46 Ni umaymanpis aceiteta jichʼariwarqankichu, kay warmitajrí chakisniyman perfumasqa aceiteta jichʼawan.
47 Chayrayku niyki, paypa juchasnenqa may chhika kajtinpis* perdonasqa kanku,+ mayta munakuwasqanrayku. Pisita perdonasqa kajrí, pisillatataj munakun”, nispa.
48 Chantá warmita nerqa: “Juchasniyki perdonasqaña kanku”,+ nispa.
49 Paywan khuska mikhojkunataj ninakusharqanku: “¿Pitaj kay runa kasqa juchastapis perdonananpajri?”,+ nispa.
50 Jesustajrí warmita nerqa: “Creesqayki salvasunki, allillanta ripuy”,+ nispa.
Sutʼinchaykunasnin
^ Chayri “sapan qhari wawan”.
^ Chayri “cuerpo”.
^ Chayri “mayta mancharikorqanku”.
^ Suyasqayku: waj lugarespi ninku suyasajku.
^ Joqʼara: waj lugarespi ninku lojtʼu.
^ Chayri “llimphuchasqa kanku”.
^ Chayri “creenanpaj mana jarkʼayniyoj kajqa”.
^ Griego parlaypeqa nin, “Runaj Wawan”. Glosariopi runaj wawan nisqata leeriy.
^ Yanapa B14 nisqata leeriy.
^ Chayri “may jatun kajtinpis”.
