Proverbios 6:1-35
6 Wawáy, sichus runa masiykej garanten kashanki chayqa,+sichus tratota ruwaspa mana rejsisqa runaj makinta qʼapirinkiña chayqa,+
2 sichus chʼipasqa rikhurinki palabraykita qospa chayqa,sichus parlasqaykiwan wataykuchikunki chayqa,+
3 wawáy, runa masiykej makinman urmasqaykiraykukayta ruway kacharichikunaykipaj:
Rispa runa masiykiman kʼumuykakamuy, mayta rogakamuy trato ruwasqaykichej amaña valenanpaj.+
4 Chayta ruwanaykikamaqa amapuni puñuychu,amapuni puñuywan atipachikuychu.
5 Kacharichikuy imaynatachus tarukaqa japʼisqankumantaña kacharichikun ajinata,imaynatachus pʼisqopis, pʼisqosta japʼejpa makinmantaña kacharichikun ajinata.
6 Qanrí qhella runa, rispa chhakata* qhawarimuy.+
Imatachus ruwasqanta allinta qhawarispa yachayniyojman tukuy.
7 Chhakajtaqa mana comandanten kanchu, nitaj autoridadnin, nitaj kamachejninpis kanchu.
8 Jinapis qʼoñi tiempopi mikhunanta wakichin,+cosecha tiempopi mikhunanta tantan.
9 Qhella, ¿ima horaskamataj winkullankipuniri?*
¿Ima horataj puñusqaykimanta jatarinkiri?
10 Qanqa nishanki: “Uj chhikitantawan puñurikusaj, uj chhikitantawan winkurikusaj,makisniy marqʼarisqa tumpitatawan samarikusaj”, nispa.+
11 Ajinapi wajchayayqa ujllata suwa jina taripasonqa,mana imayoj kaytaj sumaj armasqa runa jina taripasonqa.+
12 Mana imapaj valej sajra runaqa llulleriosta parlaspa kayman jaqayman purin.+
13 Chay runaqa manchayta ñawinta chʼirmirimun,+ chakinta kuyuchispa señasta ruwarin, dedonwanpis manchayta señalarimun.
14 Payqa sajra sonqonwansajra imasta wakichishallanpuni,+ runastapis maqanachishallanpuni.+
15 Chayrayku paytaqa ujllata desgracia qhatirenqa.
Payqa uj rato tukuchisqa kanqa, nitaj kutirikuyta atenqañachu.+
16 Sojta imasta Jehová Diosqa chejnikun.
Qanchis imasta payqa millaypaj qhawan:
17 may maylla qhawaykachaj ñawista,+ llullakoj simita,+ mana juchayoj runata wañuchej makista,+
18 sajra imasta wakichej sonqota,+ sajra imasman kachaykukoj chakista,
19 sapa parlarispa llullakoj testigota,+hermanospurata phiñanachejtapis.+
20 Wawáy, tataykej kamachisusqanta kasukuy,mamaykej yachachisusqantapis* ama pisipaj qhawaychu.+
21 Chay imasta sonqoykipi japʼikuy,kunkaykimantaj wataykuy.
22 Chay imasqa purejtiyki pusaykachasonqanku.
Puñunaykipaj siriykojtiyki cuidasonqanku,rijchʼarejtiykitaj parlapayasonqanku.*
23 Leyqa lámpara,+yachaytaj kʼanchay,+cheqanyachej kʼamiytaj kausayman apaj ñan.+
24 Chay imasmin jarkʼasonqa chay mana allin kausayniyoj warmimanta,+qhencha warmej miskʼi parlayninmanta.+
25 Ama kʼachita kasqanta sonqoykipi munapayaychu,+coqueteaspa* qhawarisojtinpis ama sonqoykita suwachikuychu.
26 Uj runaqa khuchi warmiwan* puriykusqanrayku parti tʼantayojllaña rikhurin.+
Casada warmitaj waj runawan puriykuspa chay runata wañuyman chayachin.
27 ¿Atinmanchu runaqa nina brasasta marqʼarikuyta, mana ropanta ruphachikuspalla?+
28 ¿Atinmanchu runaqa nina brasas patata puriyta, mana chakisninta ruphachikuspalla?
29 Ajinallataj qhatirin pichus qhari masinpa warminwan puñuykojtaqa.
Qhari masinpa warminta llankharejqa manapuni castigomanta ayqenqachu.+
30 Runasqa suwata mana chejnikunkuchu,yarqhasqa kajtin mikhunanpaj suwakojtenqa.
31 Japʼichikojtintaj chay suwaqa qanchis jinastawanraj paganan kanqa.
Wasinpi kaj valorniyoj imasninta tukuyninta qopunan kanqa.+
32 Casada warmiwan juchata ruwajqa mana allin yuyayniyoj.
Chay juchata ruwajqa payllapajtaj ñakʼariyta tarikun.+
33 Chay runaqa llakiyllata tarikonqa, pʼenqaypitaj rikhurenqa.+
Pʼenqaynintaj mana qonqasqachu kanqa.+
34 Celosakuspa chay warmej qosanqa rabiamanta phatanqa.
Mana khuyarikuspa vengakonqa,+
35 manapuni ni imata japʼikuyta munanqachu.
Sonqonqa manapuni tiyaykonqachu mashkha sumaj regalota jaywajtiykipis.
Sutʼinchaykunasnin
^ Chayri “sikʼimirata”.
^ Winkuy: waj lugarespi ninku siriy.
^ Chayri “leynintapis”.
^ Chayri “yachachisonqanku”.
^ Coqueteaspa: waj lugarespi ninku lisiakuspa.
^ Khuchi warmi nispaqa parlashan qhariswan puñuykoj warmimanta, astawanqa qolqerayku.
