FAMILIAYKIMANTA pillapis wañuporqa chayqa, kikillantatajchá sientekorqanki. Imajtinchus ichá llakikorqanki, sapayakorqanki, nitaj ni imata ruwayta aterqankichu. Chantapis ichá rabiakorqanki, qan juchayoj kasqaykita yuyarqanki, manchachikorqanki, qhasillatañataj kausashasqaykita yuyarqanki.

Familianchejmanta pillapis wañupojtenqa paymanta mayta llakikusqanchejrayku waqanchej. Jinapis, ¿imallapis yanapawasunmanchu mana anchata llakikunapaj?

Llakiykunasniyki mana chinkananta yuyashanki chaypis, kay yuyaychaykuna sumajta yanapasunkiman:

WAQARIKUY

Mana tukuychu kikin llakiykunasniyoj kanchej, nillataj kikin tiempotachu llakisqa kanchej. Jinapis llakiypi kashaspa waqarikoyqa yanapawasunman. Vanessa nin: “Llakisqa kashaspa waqarikullarqani, ajinamanta llakiyniyta pasachinaypaj”, nispa. Sofiaj hermananpis wañupullarqataj. Pay nin: “Chay llakiypi kashaspaqa mayta manchachikorqani, llakikorqani, sonqoypis mayta nanawarqa. Chay llakeyqa heridaykitapis jampinaykipaj tʼojpiykuwaj jina karqa. Uj heridata jampinapaj tʼojpejtinchejqa mayta nanakun, jinapis jampinanchejpuni tiyan allinta sanoyananpaj”, nispa.

LLAKIYNIYKITA WILLARIKUY

Llakiypi kashaspaqa sapallayki kayta munanki. Jinapis sapallayki llakiyniykita atipayta munanki  chayqa mana atinkichu. Jaredqa 17 watasniyoj. Payqa tatan wañupojtin imaynachus kasqanmanta nin: “Llakiypi kashaspa imastachus parlasqaytaqa ichá ni pí entiendewarqachu, jinapis llakiyniymanta wajkunawan parlariyqa yanapawaj mana anchata llakikunaypaj”, nispa. Ñaupaj yachaqanapi Jhanethmanta parlarerqanchej. Pay nin: “Wajkunawan llakiyniymanta parlareyqa mayta sonqochawarqa. Repararqanitaj wajkuna entiendewasqankuta, niñataj sapaychu sientekorqani”, nispa.

YANAPACHIKUY

Uj doctora nin: “Wakin runasqa familiankumanta pillapis wañupojtin familiaresninkuwan, amigosninkuwan yanapachikunku. Chayraykutaj llakiyninkuta aguantayta atillanku”, nispa. Qanpis amigosniykita niwaj yanapasunankuta. Ichá paykunaqa yanapayta munasunku, pero mana yachankuchu imaynamantachus yanapasunankuta (Proverbios 17:17).

DIOSMAN ASTAWAN QAYLLAYKUY

Tina nin: “Qosay cancerwan wañupojtin, niña pipipis confiayta aterqanichu. Diosllamanña llakiyniyta willakorqani. Sapa día rijchʼariytawan Diosmanta mañakoj kani chay día yanapanawanpaj. Diostaj ashkha imaynasmanta yanapawarqa”, nispa. Tarsha 22 watasniyoj kashajtin maman wañuporqa. Chaymanta yuyarikuspa pay nin: “Bibliata sapa día leeyqa mayta sonqochawarqa. Allin imaspipuni piensanaypajtaj yanapawarqa”, nispa.

KAUSARIMUY KANANPI PIENSARIY

Tina nin: “Qosay wañupusqantawan kausarimunanpi piensaspapis mana sonqochakorqanichu. Chay ratoqa astawan yuyarqani qosallaypi, wawasniy tatankuta necesitasqallankupitaj. Jinapis kunanqa tawa wataña pasan, qosay kausarimunanpitaj creenipuni. Chaypi piensareyqa astawan kallpachawan. Qosaywan aswan qhepaman watejmanta tinkukapunaypi piensarispaqa mayta kusikuni, sonqo tiyasqataj kani”, nispa.

Ichá ajina llakiypi kaspaqa, ni imaynamanta sonqochakuyta atillanchejchu. Jinapis Vanessa imatachus nisqanqa sonqochasunkiman. Pay nin: “Chay ratoqa ni jaykʼaj llakiyniykimanta llojsinaykita yuyanki, jinapis días pasasqanman jinaqa aswan allin sientekunki”, nispa.

Ichá ni imawan llakiyniykita qonqayta atillankichu, jinapis kusisqa kausakuyta atiwaj. Diospa yanapanwanqa, amigosniykiwan khuska kusisqa kausakuwaj, uj sumaj kausaytataj suyakuyta atiwaj. Tumpamantawan Diosqa wañusqasta kausarichimonqa. Imaraykuchus payqa munan watejmanta familiaresninchejwan tinkukapunanchejta, niñataj paykunamanta llakikunanchejta.