Familiapi Diosta yupaychayqa salvakunapaq yanapawasun

‘TUKUY Atiyniyuq Diospa jatun pʼunchaynin maqanaku’, ¿imayna manchachikunapaqjinachus kananpi tʼukuriwaqchu? (Apo. 16:14.) Profeta Miqueasqa, chay pʼunchay jina kananta nirqa: “Orqos unuyanqanku, imaynatachus cera machʼaqa ninaman churaykojtinchej unuyan, jinata. Vallespis iskayman khallasqa kanqanku, imaynatachus ashkha yaku purispa wayqʼosta ruwan, jinata” (Miq. 1:4). ¿Imataq Jehovata mana yupaychaqkunapaq kanqa? Manchay ñakʼariy. Bibliaqa nin: “Pikunatachus Tata Dios chay pʼunchaypi wañuchenqa, chaykunaqa kay pachaj ujnin kantumanta ujnin kantukama mastʼalla kanqanku”, nispa (Jer. 25:33).

Chayta yachaspa tatasqa, —pikunamantachus wakin tatasqa sapallanku wawasninkuta uywachkanku— kayta tapurikunanku tiyan: “Armagedón chayamuptin, ¿yuyaysituyuqña kaq wawasniy salvakunqankuchu?”. Jehovawan allinpi kachkanqanku chayqa, Biblia nisqanmanjina salvakunqanku (Mat. 24:21).

Familianchikwan Jehovata yupaychanapaq tiempochakuna

Tatas, wawasniykichikta ‘Diospa kʼamiyninpi kasuchikuspa uywanaykichikpaq’ tukuy imata ruwaychik (Efe. 6:4 Qheshwa Biblia). Chantapis, wawasniykichikwan Bibliata ukhunchanaykichik may allin kasqanta ama qunqaychikchu. Qutuchakuymanta waynuchus, sipaskuna ima, Filipos llaqtamanta cristianosjina kanankuta munanchik. Paykuna Jehovata tukuy sunqu kasukusqankurayku, Pablo jinata nirqa: “Munacuskasníy, casucuj puni canquichej, mana ñaupakellaypichu sinoka cunan astawanrajmin mana chaypi cashajtiypis. Ajinallatataj manchachicuspa qharcatitispataj salvacionniyquichejpi cabalacuychej”, nispa (Fili. 2:12 Mosoj Testamentoj).

Wawasniyki mana paykunawan kachkaptiyki, ¿Jehovata kasukunkuchu? Yachaywasipirí, ¿imayna kanku? Qamwan chayri sapallanku kachkaspa, Jehovata kasukunallankupaqpuni, ¿imaynatá yachachiwaq?

Familiapi Diosta yupaychay wawasniykip iñiyninta sumaqta kallpachananpaqqa, kimsa ruwaykunata qhawarina.

Familiapi Diosta yupaychallaychikpuni

Biblia qillqakuchkaptin Job 1:6 pʼitipiqa, “juk pʼunchay” rimayta, Diospa wawasnin paypa ñawpaqinman maychus tiemponpi waqyarisqa kasqankuta rikuchin. Qampis kikinta ruwallawaqtaq. Familiapi Diosta Yupaychanapaq Chʼisipaq, juk pʼunchayta, juk horata ima, akllay, chaytataq juntʼay. Chantapis, wak pʼunchaytawan akllay, jinamanta wak ruway rikhuriptinpis juntʼanaykichikpaqpuni.

Chaywanpis, allinta qhawarikuy tiempo pasaptinpis, familiapi Diosta yupaychanallaykichikpaqpuni. Satanasqa, wawasniykita mayta urmachiyta munan, chayrayku paykunata allinta yanapanayki tiyan (1 Ped. 5:8). Familiapi Bibliata ukhunchanaykichikmanta, teleta qhawaq chayri wak imasta ruwaq churakuwaqchik chayqa, Satanaswan atipachikunkichikña (Efe. 5:15, 16; 6:12; Fili. 1:10).

Yachachiyqa familiata yanapananpaqjina kachun

Familiapi Diosta yupaychachkaptiykichikqa, ama yachachiykunallatachu sutʼinchaychik, imaynamantachus kawsayniykichikpi yanapasunaykichiktawan rikuchiychik. Qam, ¿imaynatá chayta ruwawaq? Ichapis wakin kutipiqa, wawasniyki ima chʼampaykunapichus rikukunankumanta rikuchiwaq. Chantapis willayman rinankupaq wakichiwaq. Waynasqa, imatapis allintapuni ruwayta munanku.  Chayrayku Diosmanta runaman willachkaspa imaynatachus juk tapuyman kutichinankuta, juk chʼampayta atipanankuta ima yachaspaqa, allin wakichisqas sientekunqanku (2 Tim. 2:15).

Chantapis wawasniyki mana allin kaqta ruwanapaq tanqasqa kachkaptinku, imatachus ruwanankuta yachanankupaq, wakichiy. Kay Waynaspata sipaskunapta tapukuyninku (iskay kaq) librop 15 yachaqanan allin yanapa kanman. Chantapis, “Saqra ruwayman tanqachkasuptinku kayta ruwawaq” nisqapi (132, 133 paginaspi) allin yuyaychaykuna tarikun. Astawanqa, waynata chayri sipasta, ima chʼampayllapipis rikukuspa imatachus ruwananpi tʼukurinanta yuyarichin. Kay 133 paginap tukukuyninpiqa, kay rikhurin: “Qillqasqaykimanjina, pipichus atienekunki paywan, chayri familiaykimanta jukninwan imaynatachus ruwayta munasqaykita rikuchiy”. Arí, kayta familiapi Bibliata ukhunchachkaspa ruwayqa, may allin kanman.

Chantapis wawasniykita, Familiapi Diosta Yupaychanapaq Chʼisipi, Diospaq astawan llamkʼayta munanankupaq yachachiyta atinkiman. Chaypaqtaq, kay Waynaspata sipaskunapta tapukuyninku (iskay kaq) librop, 38 yachaqanapi, “¿Imatá kawsayniywan ruwasaq?”, nisqa yachachiywan yanapachikuwaq. Chayta ukhunchachkaspaqa, wawasniykita, Jehovata yupaychananku aswan allin kasqanta entiendenankupaq yanapay. Chantapis, paykuna precursor kayta, Betel wasiman llamkʼaq riyta, Escuela de Entrenamiento Ministerial nisqaman riyta ima, munanankupaq tanqay.

Chaywanpis wakin tatasqa, imachus wawasninku aswan qhipaman kanankupi anchata yuyasqankurayku, imatachus ruwachkasqankutaña qunqanku. Wawasman, Betelman llamkʼaq riymanta, misioneros kaymanta ima, parlayqa may allin. Chaywanpis chaykunata juntʼanankupaq anchata tanqaptiyki, paykunaqa, qʼinaqakunkuman (Col. 3:21). Imatachus ruwasqankumantaña, allinta ruwasqankuta niy; amataq imatachus manaraq ruwachkasqankupi, anchata yuyaychu. Chantapis paykunaqa, Jehovata munakusqankurayku paypaq llamkʼayta munanku tiyan, mana qamta kusichisunankuraykuchu (Mat. 22:37). Jehovap ruwasqasninta jatunpaq qhawayta yachachiy, Payta munakusqankuraykutaq, imatapis ruwanankuta saqiy.

Familia kusiyta tarinanpaqjina kachun

Familiapi Diosta Yupaychay, familiantinta kallpachananpaqqa, kusiyta tarinankupaqjina kanan tiyan. ¿Imaynatá chayta ruwawaq? Ichapis, familiaykiwan, juk dramata uyariwaqchik, chayri Diospa llaqtan urqhusqan videota qhawawaqchik, ukhunchariwaqchik ima. Chantapis, Bibliata khuska ñawiriwaqchik, sapa jukmantaq, mayniqtachus ñawirinanta kamachiwaq.

Familianchikwan yachakunapaq, Torremanta Qhawaq revistapi, ¡Despertad! revistapi ima, allin yachachiykuna tiyan. Sutʼincharinapaq, ¡Despertad! revistamanta 31 paginapiqa, “¿Qué respondería usted?” nisqa, rikhurin.  Chantapis, tukuypaq urqhusqa Torremanta Qhawaq revistapi, “Waynaspaq sipaskunapaq” nisqa yachaqanata tarinki, chaypiqa waynuchusta Bibliata astawan ukhunchanankupaq tanqan. Chantá, “Wawasta yachachinapaq”, nisqa yachaqanata tarillankitaq.

Wawasniyki maqtʼitus kaptinkuqa, kay ¡Despertad! revistamanta “Los jóvenes preguntan”, nisqa yachaqanata, chayri kay Waynaspata sipaskunapta tapukuyninku (iskay kaq librota), ukhunchariwaqchik. Chay librota ukhunchachkaspaqa, sapa yachaqanap tukukuyninpi “Qhawasqaykimanjina” nisqa, rikhuriq recuadrota yuyariychik. Chayqa, tatas wawasninkuwan parlarinankupaq wakichikun.

Familiapi Bibliamanta yachakuchkaptiykichikqa, ama wawasniykita tukuy imata tapuykuychu. Chantapis, ama wawasniykita “Tʼukurisqaykimanjina” nisqa, chiqapi qillqasqankuta ñawirinankupaq tanqaychu, nitaq chay librop wak chiqaspi qillqasqankutapis. Chay libroqa, 3 paginanpi tatasman jinata nin: “Wawasniykichik imatachus yuyasqankuta kay libropi qillqanankuta munaspaqa, imatachus qillqasqankuta mana ñawirinaykichikta ninaykichik tiyan. Chayta ruwaptiykichikqa, ichá paykunallataq imatachus qillqasqankuta willasunqachik”.

Jehovaqa, wawasniykiman allinta yachachinaykipaq kallpachakusqaykita bendicenqa. Chantapis, familiapi Jehová Diosta yupaychasqaykichikqa, mayta kallpachasunqachik.

[31 paginapi recuadro]

Tukuy imaymanamanta yachachiwaq

“Ñuqaykuqa, imillitasniykuwan yachakuchkaptiyku, tantakuypaq wakichikuq kayku, paykunatataq imamantachus yachakusqaykuta dibujanankuta niq kayku. Wakin kutiqa, Bibliamanta yachachiykunata chayri imaynatachus willanaykuta rikuchiq kayku. Chantapis, mana saykʼukunankupaq astawanqa kusirikunankupaq, edadninkumanjinalla Bibliata ukhunchaq kayku.” (J. M., Estados Unidos.)

“Ñuqaykuwan Bibliamanta yachakuq warmip wawitanman, Jesuspa tiemponpi imaynatachus rollos nisqa apaykachakusqanta, yachachiyta munarqayku. Chayrayku, computadorapi tukuynin Isaías librota, mana tʼaqasniyuqta, nitaq pʼitisniyuqta qillqarqayku, hojaspi urqhuspataq, hojaspurata machʼarqayku, kantusninmantaq tubosta churarqayku, chayman maytʼunaykupaq. Chaytataq, chay wawitaman jaywarqayku. Chantá, imaynatachus Jesús Nazaret sinagogapi ruwaq, kikinta ruwananta mañarqayku. Lucas 4:16-21 pʼiti nisqanmanjina Jesusqa, ‘Isaías rollota kicharispa’, imatachus ñawiriyta munarqa chayta, tarisqanta nin (Isa. 61:1, 2). Chay wawitaqa mana kikinta ruwayta atirqachu, imaraykuchus chay rollo nisqaqa, may jatun karqa, nitaq numerosllapis karqachu. Ajinamanta, Jesús chay rollosta sumaqta apaykachasqanta repararqa. May tʼukuchkaq qhipakuspataq nirqa: ‘¡Ni pipis Jesuswan kikinchakunchu!’, nispa.” (Y. T., Japón.)

[30 paginapi dibujo/foto]

Wawasniyki saqra ruwayman tanqasqa kachkaptinku mana urmanankupaq, ñawpaqmanta wakichiy

[31 paginapi dibujo/foto]

Familiapi Diosta Yupaychanapaq Chʼisiqa, familiata kusichinan tiyan