GREGORIOWAN warmin Marilouwanqa diantinta llankʼaspapis, precursores regulares jina Manila llajtapi sirvisharqanku. Chayqa chunka wata ñaupajta karqa, 30 wata kurajniyoj kashajtinku. Precursoresllapuni kanankupajtaj mayta kallpachakusharqanku. Jinallapi, Marilouqa llankʼarqa chay bancopi llankʼayta apaykachananpaj churasqa karqa. Pay nin: “Tukuy ima patapi kausakorqayku”, nispa. Chayraykutaj, uj sumaj wasita ruwachikuyta munarqanku, qhapaj runas ruwachikunku chaynejpi, Manila llajtamanta 19 kilometrospi jina. Chay jawa, wasista ruwaj empresawan uj documentota ruwarqanku, sapa killa pagaspa chunka watapi juntʼanankupaj.

Marilou nin: “Chay llankʼayneyqa tiempoyta, kallpayta ima qhechushawarqa, cristiano ruwanasniytapis niña ñaupajta jinachu juntʼasharqani. Imatapis Jehovamanta qhechushayman jina karqa. [...] Niña tiempoy karqachu Jehovapaj astawan llankʼanaypaj”, nispa. Chaynejta, imatachus kausayninkupi ruwashasqankumanta parlarerqanku.  Gregorio nin: “Kausayniykuta tijrachiyta munarqayku, chaywanpis mana yacharqaykuchu imaynatachus chayta ruwanaykuta. Mana wawasniyoj kasqaykurayku, imaynatachus Jehovapaj astawan llankʼanaykumanta parlarerqayku, paymantataj yanapata mañakorqayku”, nispa.

Chay kutisllapitaj, maypichus pisi willajkunalla tiyan chayman ripuymanta umallirichiykunata uyarerqanku. Gregorio nin: “Jehová mañakusqaykuman kutichishasqanta repararqayku”, nispa. Paykunaqa creeyninku sinchʼi kananpaj, nitaj manchachikunankupaj Jehovamanta yanapata mañakorqanku. Ajinamanta, sumajta ajllanankupaj. Jinapis uj chʼampaypi rikukorqanku: wasimanta kinsa watataña pagasharqanku. ¿Imatá ruwankuman karqa? Marilou nin: “Ruwarqayku chay documentota sayachipojtiykoqa, tukuy pagasqaykuta pierdeykuman karqa, nitaj pisi qolqellachu karqa. Jinapis, Jehovaj munayninta juntʼaytachus chayri munaynillaykuta ruwaytachus ajllanayku kasqanta repararqayku”, nispa. Chantapis, Pablo imastachus Diospa Reinonrayku saqepusqanpi tʼukurerqanku. Chay jawa, chay documentota sayachiporqanku, llankʼayninkuta saqeporqanku, ashkha imasninkutataj venderarqanku. Chantá Palawan nisqaj uj karu llajtitanman riporqanku, Manilamanta 480 kilometrosman jina (Fili. 3:8).

Gregoriowan warminwanqa niraj ripushajtinku maychus kajllawan kausakunankupaj wakichikusharqankuña. Chaywanpis, chayman chayaspalla yacharqanku imaynachus chaypi kausay kasqantaqa. Marilou nin: “Tʼukulla qhepakorqayku. Imajtinchus mana luz kasqachu, nitaj tukuy ima patapi kanapaj jinachu kasqa. Arrozta chayachinapaj mankitaykuta corrienteman churanaykumantaqa, qʼonchapi waykʼukunaykupaj llantʼata chʼejtakunayku karqa. Imastachus llajtapi kashaspa ruwaj kani chay imasta faltacharqani”, nispa. Jinapis, imaraykuchus chayman ripusqankupi tʼukurej kanku, pisi tiemponmantaj yachakaporqanku. Marilou nin: “Kunanqa campo kʼachitu kasqanta rikuspa, chʼisisninpitaj chʼaskasta qhawarispa kusisqa kani... Astawanraj willayku chay runasta kusisqa kashasqankuta rikuspaqa. Kaypi kaspaqa kapusqallaykuwan kausakuyman ‘yachasqaña’ kayku”, nispa (Fili. 4:12).

Gregorio nin: “Kayman chayamushajtiykoqa tawa hermanoslla karqa. Paykunaqa may kusisqa kasharqanku sapa semana umallirichiyta qallarejtiy, guitarraywantaj Jehovata jatunchaj takiykunata tantakuykunapi tocajtiy”, nispa. Watanmanqa uj qotuchakuyña sayarerqa, 24 willajkunayoj. Gregorio nillanpuni: “Hermanos munakuyninkuta rikuchiwasqaykoqa  mayta kusichiwayku”, nispa. Chaypi sojta watataña sirvisqankumanta paykuna ninku: “Ashkha runasta Diospa llajtanman yaykusqankuta rikoyqa ni imawan kikinchakunchu. Ni jaykʼaj jina sonqo juntʼasqa kashayku” nispa.

Filipinaspa karu llajtitasninpeqa, pisi willajkunalla tiyan chaykunapi, kinsa waranqa hermanos jina yanapashanku. Phishqa pachaj jinataj, soltera hermanas kanku. Ujnenqa Karen sutikun.

Payqa 25 watanman rishan, Baggao nisqa llajtapitaj wiñakorqa. Sipasita kashaspaqa astawan willayta munarqa. Pay nin: “Willanapaj pisi tiempollaña kasqanta yacharqani, ashkha runastaj Reinomanta willayta uyarinanku kasqanta. Chayrayku, pisi willajkunalla tiyan, chaypi yanapakuyta munarqani”, nispa. Familianmanta wakintaj, karu llajtitaman ripunanmantaqa universidadman yaykunanta nerqanku. Karentajrí, Jehovamanta yanapata mañakorqa, karu llajtitaspi sirvishanku chay hermanoswantaj parlarerqa. Chantataj, 18 watayoj kashajtin wasinmanta 64 kilometrospi tarikoj karu llajtitaman riporqa.

Karen chayarqa chay juchʼuy qotuchakoyqa Pacífico nisqa mama qochaj kantunpi kaj orqospi willan. Pay nin: “Chay qotuchakuyman chayanallaykupaj, Baggaomanta kinsa pʼunchaytapuni chakipi rerqayku. Orqostaqa wicharerqaykutaj uraykorqaykutaj, mayustapis 30 kutis kurajta chimparqayku. [...] Bibliamanta wakin yachakojkunaqa sojta hora puriypi kanku, wasinkupitaj puñoj qhepakunay tiyan, qʼayantintaj sojta hora puriyllapitaj kutinpuni”, nispa. Chay ruwasqantaj mana qhasipajchu. Pay kusiywan nin: “Wakin kuteqa chakisniy anchata nanawan, jinapis Bibliamanta yachachispa 18 runasman ima chayarqani. Cheqamantapuni rikuni ‘Tata Diosqa kʼacha kasqanta’”, nispa (Sal. 34:8).

Sukhi sutiyoj soltera hermanaqa 40 wata kurajniyoj, Estados Unidosmantataj. Payqa Filipinasman riporqa. Kay 2011 watapi iskay pʼunchaypaj jatun tantakuyta ruwakusqanpeqa uj qhariwarmi, Mexicoman willaypi yanapakoj ripusqankumanta parlarerqanku, chaypajtaj ashkha imasninkuta venderasqanku. Sukhi nin: “Chayta uyarispaqa imatachus kausayniywan ruwashasqaypi tʼukurerqani”, nispa. Payqa familian India suyumanta kasqanrayku, panjabí qalluta rejserqa. Chaynejtataj, Filipinaspi chay qalluta parlajkunaman astawan willakunanta yachaspa, chayman riporqa. ¿Ima chʼampaykunatataj atiparqa?

Sukhi nin: “Mana yacharqanichu imasniytachus venderanayta, imasniywanchus qhepakunaytapis. Chantapis, 13 watastaña sapallay tukuy ima patapi tiyakusqaymanta, familiaywan tiyakoj riporqani,  maypichus mana sapay kashaspa jinachu karqani. Mana atinaypaj jina kajtinpis, maychus kajllawan kausakuyta yachakorqani”, nispa. ¿Ima chʼampaykunapitaj rikukorqa Filipinaspiña kashaspa? Pay nin: “Khurusta anchatapuni manchachikorqani, familiaytapis faltacharqani. Ni jaykʼaj jinataj Jehovapi atienekuyta yachakorqani. [...] Jehová niwanchej: ‘Allinta qhawariychej, chantá rikunkichej, imaynatachus noqa may chhika bendicioneswan juntʼachimusqaykichej, chayta’, nispa (Mal. 3:10). Noqataj, ajinapuni kasqanta rikuni, runas ‘¿Maykʼajtaj kutimunkiri? Astawan yachakuyta munani’ niwajtinku. Jehovata rejsinankupaj runasta yanapaspaqa kusisqa kani, sonqo juntʼasqataj. [...] Kayman jampuytaqa mana atillarqanichu. Kaypiña kaspataj, Jehová tukuy imapi yanapawasqanta rikuni”.

Uj hermano Sime sutiyoj, pichus 40 watanman rishan, casarasqataj, Filipinasmanta Asiaj ujnin suyunman riporqa, uj sumaj pagasqa llankʼayman yaykunanpaj. Chaypi kashajtenqa qotuchakuykunata waturej hermano kallpacharisqa, jinallataj Diospa Llajtanta kamachejkunamanta ujnin hermanoj umallirichisqan. Chaynejta, Jehovata sirviyta ñaupajman churananta nerqa. Pay nin: “Mana llankʼayniyoj rikhurinayta yuyaspa ni puñuytapis atejchu kani”, nispa. Jinapis llankʼayninta saqepuspa, Filipinasman kutiporqa. Kunanqa paywan warmin Haideewan, Filipinaspa uranejninpi Davau del Sur nisqa llajtapi sirvishanku, maypichus pisi willajkunalla tiyan. Sime nin: “Imastachus saqepusqaypi tʼukurispaqa mayta kusikuni. Mana llankʼayniyoj rikhuriytaqa niña manchachikunichu, Jehovata sirviytataj ñaupajman churani. Paypaj tukuy atisqanchejta llankʼayqa may sumaj”, nispa.

Ramilowan warmin Julietwanqa 30 watasniyoj jina kashanku, precursores regularestaj kanku. Paykunaqa tiyakunku chaymanta 30 kilometrospi tarikoj qotuchakuyta yanapana kasqanta yachaspa, rinankuta nerqanku. Sapa semanataj, paramuchunpis manapis tantakuykunaman, willaymanpis motonkupi rinkupuni. Rinankupaj kuyoj puentesta, mana allin ñankunata ima pasananku kajtinpis, mana pesachikunkuchu. Ramilo nin: “Iskayniykumantaqa 11 runasman Bibliamanta yachachishayku. Chayta ruwanaykupaj kallpachakunayku kajtinpis, sonqo juntʼasqa kayku”, nispa (1 Cor. 15:58).

Suyuykipi chayri waj suyupi maypichus pisi willajkunalla tiyan, chaypi imaynatachus yanapakuyta atisqaykita yachayta munaspaqa, qotuchakuykunata waturej hermanowan parlariwaj, chantapis leeriwaj “¿Macedoniaman yanapariq riwaqchu?” nisqa yachaqanata Reinomanta Willayninchikpi 2011 agosto.