UJ WAJCHA viudaqa kʼata wawitanta may kusiywan ojllaykun, nitaj creeyta atinchu kausashasqanta, imajtinchus chay ñaupajsitullata wañusqa kasharqa. Kunantaj wawitanqa kausarispa watejmanta asirikushan. Chay viudaqa may kusisqapuni kashan, imajtinchus payta watukoj runa jinata nin: “Qhaway, wawaykeqa kawsashan”, nispa.

Chay wawita kausarichisqa kasqanqa 3.000 watas ñaupajta jina karqa, qhelqasqataj kashan 1 Reyes 17 capitulopi. Chay watukoj runaqa Diospa profetan Elías karqa, wawitaj mamantaj Sarepta llajtayoj uj viuda. ¡Maytachá chay viudaj creeynin sinchʼiyarqa wawitan kausarimusqanrayku! Kunanqa imatachus chay viudamanta yachakusqanchejta qhawarina.

Jehovaqa Eliaswan willacherqa Israelpi sajra rey Achab kamachishajtin chʼaki watas kananta. Willasqantawantaj Achabmanta Eliasta pakaykorqa. Chay tiempopitaj qharqañasta kamacherqa tʼantata, aychatawan Eliasman apanankuta. Chantá Jehovaqa Eliasta nerqa: “Jatarikuspa, Sidonpi Sarepta llajtaman ripuy, chaypitaj tiyakamuy; noqa kamachiniña uj viudata qanta mikhuchisunampaj”, nispa (1 Rey. 17:1-9).

Eliasqa Sareptaman chayaspa, chaypi uj wajcha viudata llantʼata pallakushajta rikorqa. ¿Chay viudachu mikhunata qonman karqa? ¿Manachu chayta ruwananpaj ancha wajcha karqa? Eliasqa ichapis chaykunata tapukorqa, jinapis payta wajyaspa, nerqa: “Ama jinachu kay, uj vaso yakuta qoriway ujyanaypaj”, nispa. Chay viuda apamunanpaj rishajtinña, watejmanta nillarqataj: “Ama jinachu kay, uj chhikan tʼantatawan aparimpuway”, nispa (1 Rey. 17:10, 11). Chay viudaqa yakuta qoyta atillanman karqa, chaywanpis mikhunata qonanpajqa niña imanpis karqachu.

 Chayrayku kayta nerqa: “Señorniyki Tata Diospis yachan, mana chayasqa tʼantay kanchu; uj chhika jakʼullay tiyapuwan uj wichʼipi, uj yurupi uj chhika aceitepiwan. Kunanqa uj iskay llantʼasta pallakusharqani, noqapaj, wawaypajwan tʼantata ruwarqonaypaj; chayta mikhuykuspa, yarqhaymanta wañupusqaykupischá”, nispa (1 Rey. 17:12). ¿Imatataj chay parlasqankumanta yachakusunman? Chayta qhawarina.

Chay viuda “Señorniyki Tata Diospis yachan” nisqanqa, Eliasta Diospa kamachinta jina qhawasqanta rikuchin. Chay viudaqa ichapis Diosmanta tumpata yacharqa, chaywanpis mana Jehovataqa “Diosniy” nerqachu. Payqa Sarepta llajtayoj karqa, chay llajtataj 1 Reyes 17:9 nisqanman jina Sidonpi tarikorqa. Ichapis Sarepta llajtapi tiyakojkuna Baalta yupaychaj kanku. Jinapis Jehovaqa chay wajcha viuda allin sonqoyoj kasqanta rikorqa.

Chay viudaqa llulla diosesta yupaychajkuna chaupipi kausakuspapis, Jehovapi creerqa. Jehovataj Eliasta wasinman kacharqa, chaytaj mana Eliasllatachu yanaparqa, manaqa chay viudatapis. ¿Imatá chaymanta yachakusunman?

Sarepta llajtapi tiyakojkunaqa mana tukuychu llulla diosesta yupaychaj kanku. ¿Imatá Jehová rikucherqa Eliasta chay viudaj wasinman kachaspa? Llampʼu sonqoyoj runasmanta llakikusqanta, manaraj Payta yupaychajtinkupis. Arí, “mayqen nacionllamantapis pichá Diosta manchachikoj, cheqa kajtataj ruwaj runatamin Diosqa allin ñawiwan qhawan” (Hech. 10:34, 35).

Willanchej chaynejpipis Sarepta llajtamanta viuda jina ashkha runaschá tiyan. Chay runasmanta wakenqa llulla religionpi kajkunaj chaupinkupi tiyakojtinkupis, allin sonqoyoj kanku. Ichapis paykunaqa Jehovamanta pisillata chayri ni imata yachankuchu. Chayrayku Diosta yupaychanankupajqa pillapis paykunata yanaparinan tiyan. ¿Maskʼashanchejchu chay runasta? ¿Paykunata yanapashanchejchu?

Kunanqa qhawarina imatachus Elías chay viudamanta mañakusqanta. Chay viudaqa paypajwan wawanpajwan imallaña mikhuna kasqanta nerqa, chaymantataj wañuyllataña suyanankuta. Eliastaj kuticherqa: “Ama chaymantaqa llakikuychu; rillay, nisqaykita jina ruwamullay. Chaywampis ñawpajta uj tʼantata ruwaytawan, nina kʼajajpi chayachispa apamuway; Chantá ruwallanki wawaykipaj, qampajpis. Israelpa Señornin Tata Dios kay jinata nin: Wichʼipi jakʼoqa, yurupi aceitepis mana tukukonqachu, noqa kay jallpʼa pataman parachimunaykama”, nispa (1 Rey. 17:11-14).

“Paykunapaj manaña mikhunapis kashajtin, ¿maymantataj chay viuda Eliaspaj mikhunata apamunman karqari?” nispa ichá wakin yuyarqanku. Chaywanpis, ¿imatá chay viuda ruwarqa? Jehovamanta pisillata yachaspapis Eliaspa nisqanta creerqa, mañasqanman jinataj ruwarqa. Chayta ruwaspataj, sinchʼi creeyniyoj kasqanta rikucherqa.

Jehovataj mana chay viudata saqerparqachu. Elías nerqa jina, chay chʼaki watas pasanankama mikhunanta mana pisicherqachu. Ajinamanta paypaj, wawanpaj, Eliaspaj ima mikhuna kallarqapuni. Arí, “wichʼipi jakʼoqa mana tukukoj karqa, yurupi aceitepis mana pisiyarqachu, Elías profetanejta Tata Dios parlasqanman jina” (1 Rey. 17:16; 18:1). Chay viuda mana jinata ruwanmanchu karqa  chayqa uj chhika jakʼun, aceitenpis tukukapunmanchá karqa, nitaj ni ima mikhunankupaj kanmanchu karqa. Chaywanpis creeyniyoj kasqanrayku, Jehovapitaj atienekusqanrayku Eliasta ñaupajtaqa mikhucherqa.

¿Imatá chaymanta yachakunchej? Creeyniyoj kajkunata Jehová bendecisqanta. Pruebaman churasqa kashajtinchejqa Pay yanapawanchej. Imajtinchus Jehovaqa tukuy imata Qowajninchej, Jarkʼawajninchej, Amigonchejtaj (Éxo. 3:13-15).

Kay 1898 watapi, inglespi La Torre del Vigía de Sión nisqa revistapi, chay viudamanta kayta sutʼinchakorqa: “Chay warmi creeyniyoj kasqanta rikuchejtin, kasukojtin ima, Señorqa profetannejta yanapanman karqa. Mana creeyniyoj kanman karqa chaytaj, waj creeyniyoj viudata maskʼayta atinman karqa. Ajinallataj noqanchejwanpis, Señorqa ashkha kutispi creeyninchej pruebaman churasqa kananta saqen. Creeyniyoj kasqanchejta rikuchejtinchejqa bendicionesta japʼinchej, manachayrí, ni imata japʼinchejchu.”

Creeyninchej pruebaman churasqa kashajtenqa, Diospa yuyaychayninta maskʼananchej tiyan Bibliapi, publicacionespi ima. Chaymantataj, chaypi imatachus Jehová niwasqanchejman jina ruwana, mana atinapaj jina kajtinpis. Biblia kayta yuyaychawasqanchejman jina ruwajtinchejqa Jehová bendeciwasunpuni: “Tukuy sonqoykiwan Tata Diospi atienekuy; ama qampa yachasqallaykipeqa atienekuychu. Tukuy ima ruwasqaykipi Tata Diosmantaqa yuyarikuy. Paymin cheqan ñanta pusasonqa” (Pro. 3:5, 6).

Viudaj creeynenqa ujtawan pruebaman churasqa karqa. Biblia nin: “Chaymanta aswan unaymantaqa viudaj wawan anchatapuni onqoykorqa, wañorqataj”, nispa. Viudataj imaraykuchus wawan wañusqanmanta Eliasta nerqa: “Diospa profetan, imanaykitaj noqa qantari? Juchasniymanta yuyarichiwajchu kayman jamunki, wawaytapis wañuchej?” nispa (1 Rey. 17:17, 18). ¿Imaraykutaj chayta ninman karqa?

¿Ñaupa juchasninmanta yuyarikuspachu chayta ninman karqa? ¿Yuyanmanchu karqa Dios castigashasqanta, Eliastaj chaypaj kachasqa kasqanta? Bibliaqa mana chayta sutʼinchanchu. Chaywanpis chay viudaqa wawan wañupusqanmanta mana Diostachu tumpasharqa.

Eliastaj, viudaj wawan wañupusqanmanta tʼukullachá qhepakorqa. Ichapis yuyarqa pay juchayoj kasqanta. Payqa wawata japʼispa, altos wasipi puñunaman churaykuytawan Tata Diosman qhaparikuspa, nerqa: “Señor Tata Diosníy, kay viudaj wasimpi tiyashajtiy, payta llakichinkichu wawanta wañuchispa?”, nispa. Eliasqa mana munarqachu chay kʼacha viuda astawan ñakʼarinanta, nitaj chayrayku Dios pisipaj qhawasqa kanantaqa. Chayrayku Diosta qhaparikuspa, nerqa: “Señor Tata Diosníy, mañakuyki kay wawata kawsarichinaykita”, nispa (1 Rey. 17:20, 21).

Jehovaqa Eliaspa mañakusqanta uyarerqa. Imajtinchus chay viudaqa Eliasta mikhucherqa, creeyniyoj kasqantataj rikucherqa. Ichapis Jehovaqa chay viudaj wawan onqoykuspa wañunanta saqellarqa, imajtinchus yacharqa kausarichinanta. Chay kausarichisqantaj, Biblia nisqanman jinaqa ñaupaj kutirayku karqa, runasmantaj uj sumaj suyakuyta qonman karqa. Jehovaqa Elías mañakusqantawan, chay lloqallituta kausaricherqa. Viudataj mayta kusikorqa Elías kayta nejtin: “Qhaway, wawaykeqa kawsashan”, nispa. Chantá Eliasta nerqa: “Kunanqa yachani cheqamantapuni Diospa profetan kasqaykita, Tata Diospa nisqantaj cheqapuni qampa simiykipi kasqanta”, nispa (1 Rey. 17:22-24).

Kay 1 Reyes 17 capituloqa manaña chay viudamanta waj imasta sutʼinchanchu. Chaywanpis Jesusqa chay viuda allinta ruwasqanmanta parlarqa. Chayrayku nisunman chay viudaqa wañupunankama Diosta yupaychasqanta (Luc. 4:25, 26). Kausaynintaj rikuchiwanchej, Diosqa kamachisninta yanapajkunata bendecisqanta (Mat. 25:34-40). Chantapis, Payman cheqa sonqo kajkunaman ni imata pisichisqanta, ima llakiypi tarikojtinkupis (Mat. 6:25-34). Jinallataj rikuchiwanchej wañusqasta kausarichiyta munasqanta, chaypajtaj atiyniyoj kasqanta (Hech. 24:15). Arí, Sarepta llajtayoj viudamantaqa mayta yachakusunman.