ANDREA Jehovaj testigon jina bautizakojtin, qosan paywan mayta phiñarikorqa. * Manataj tantakuykunaman rinanta saqerqachu, Diospa sutinta oqharinantapis mana munarqachu. Jehová sutita oqharejta uyarispataj mayta phiñarikoj.

Chantapis qosanqa mana munarqachu wawasninman Jehovamanta yachachinanta, nitaj tantakuykunaman pusanantapis. Chayraykutaj hermanaqa mayta llakikorqa, imaraykuchus wawasninman pakayllamanta yachachinan karqa.

¿Ajinapi maykʼajllapis rikukorqankichu? Ichapis familiaykimanta pillapis Jehovaj testigon kasqaykirayku churanakusunki. Chayri may unayña uj onqoywan ñakʼarishanki. Chayri familiaykimanta pillapis wañupun. Chayri familiaykimanta mayqellanpis manaña Jehovaj testigonchu. Ajinapi rikukuspa, ¿imatá ruwawaj Jehovaman cheqa sonqollapuni kanaykipaj?

Apóstol Pablo nerqa: “Sinchʼita sayallaychejpuni”, nispa (Heb. 10:36). Chantá, ¿imataj sinchʼita sayanallapajpuni yanapawasunchej?

Chʼampaykunapi kaspaqa, sinchʼita sayanapaj Diospa yanapayninta necesitanchej. Chaypajtaj Diosmanta mañakunanchej tiyan. Chayta Ana sutiyoj hermana ruwarqa, qosan wañupojtin. Kinsa chunka watasña casarasqas karqanku. Pay nin: “Qosayqa llankʼaj risqanmanta manaña kutimorqachu, 52 watasniyojllaraj karqa”, nispa.

Chay hermanaqa, llakiyninwan mana atipachikunanpaj llankʼaj rerqa, chaywanpis llakisqallapuni kasharqa. Chayrayku, ¿imatá pay ruwarqa? Pay nin: “Jehovaman uj mañakuypi imaynachus kashasqayta willarqani, yanapanawantataj nerqani”, nispa. Chay hermanaqa Jehová yanapasqanta repararqa, imaraykuchus mañakusqantawan sonqon tiyaykorqa. Chantapis mayta sonqochakun qosanta Jehová paraisopi kausarichinanta yachaspa (Fili. 4:6, 7).

Jehovaqa mañakuykunasninchejta uyarisqanta niwanchej (Sal. 65:2). Chantapis Payta yupaychanallapajpuni imatachus necesitasqanchejta qowanchej. Chayrayku qantapis chʼampaykunapi kajtiyki, yanapasonqa ñaupajllamanpuni rinaykipaj.

Chantapis Jehovaqa sinchʼita sayanallanchejpajpuni hermanosnejta yanapawanchej. Tesalonicapi kaj hermanosninchejpi tʼukurina. Paykunaqa mayta ñakʼarerqanku qhatiykachasqas kashaspa, chayrayku Diosman cheqa sonqos kanallankupajpuni sonqochanakorqanku, kallpachanakorqanku ima (1 Tes. 2:14; 5:11). Chaypajtaj tantakuykunaman rerqanku, uj familia jinataj karqanku. ¿Imatataj paykunamanta yachakusunman?

Qotuchakuypi amigosniyoj kananchejqa may allin. Ajinamanta chʼampaykunapi rikukuspa purajmanta kallpachanakusunchej (Rom. 14:19). Apóstol Pabloqa qhatiykachasqa karqa, waj llakiykunapi ima rikukorqa. Chaywanpis Jehová hermanosnejta yanaparqa chaykunata aguantananpaj. Chayrayku hermanos mayta sonqochasqankuta nerqa (Col. 4:10, 11). Ajinamanta hermanosqa Pablota munakusqankuta rikucherqanku. ¿Yuyarikunkichu maykʼajllapis hermanos sonqochasunankupaj imatachus ruwasqankuta chayri imatachus nisusqankuta?

Jehovaqa ancianosnejta yanapallawanchejtaj. Paykunaqa Bibliaj yuyaychasqanwan sonqochasonqanku, kallpachasonqanku ima. Biblia nin: “[Ancianosqa] wayramanta pakakunapaj jina  kan[ku], loco para wayramanta pakakunapaj jina. Chʼaki jallpʼapi qarpanapaj larqʼa jina kan[ku], chʼin pampapi jatun chhankaj llanthun jinataj”, nispa (Isa. 32:2). Qotuchakuypi ancianos kasqanqa mayta kusichiwanchej, ¿icharí? Chayrayku chʼampaypi rikukuspa paykunawan parlariy. Paykunaqa Jehovata sirvinallaykipajpuni yanapasonqanku.

Ancianosqa noqanchej jina juchasapa runas kanku (Hech. 14:15). Chayrayku mana chʼampaykunasninchejta chinkachiyta atenqankuchu. Chaywanpis noqanchejpaj Diosmanta mañapuwasunchej, chaytaj yanapawasunchej mana llakisqa kanapaj (Sant. 5:14, 15). Italiapi, uj hermanoqa unayta manchay onqosqa karqa. Chaywanpis chay hermanoqa llakiyninta atiparqa. ¿Imataj yanaparqa? Chay hermanoqa, hermanos waturikoj risqanku, munakuyninkuta rikuchisqanku ima aguantananpaj yanapasqanta nin. Chayrayku Jehovaqa chʼampaykunasniyoj kajtinchej, ancianospa yanapayninkuta maskʼananchejta niwanchej.

Chʼampaykunapi kaspa Jehovata sirvillasunpuni chayqa, pay yanapawasunchej. Ajinapi rikukorqa uj hermano John sutiyoj. Paymanqa 39 watayoj kashajtin cáncer onqoyniyoj kasqanta willarqanku. Payqa mana creeyta aterqachu cancerniyoj kasqanta. Chayraykutaj may llakisqa kasharqa warminmanta, kinsa watayoj wawitanmanta ima. Pay nin: “Warmeyqa mana wawitallaykutachu qhawanan karqa, manaqa noqatapis, doctormanpis pusanawan karqa”, nispa. Chay onqoyninpaj tratamientota ruwasqanrayku may saykʼusqa kasharqa, vómitos ima japʼej. Ajinapi kashaspataj yachallarqataj tatan wañupunanpaj jina onqosqa kashasqanrayku qhawanata necesitasqanta.

¿Imataj Johnta, familianta ima yanaparqa? Onqoyninrayku tukuy tiempo may saykʼusqa kaspapis, familianta Diosta sirvinallanpajpuni yanaparqa. Pay nin: “Wakin kuti tantakuykunaman, willayman ima mana riyta atispapis, rejpuni kayku, Familiapi Diosta Yupaychanapaj tantakuytapis ruwajpuni kayku”, nispa. Chay hermanoqa Diospa qayllallanpipuni kananpaj mayta kallpachakunan kasqanta yacharqa. Cáncer onqoyniyoj kasqanta yachaspa may mancharisqa kasharqa, chaywanpis repararqa Jehová llakiyninwan mana atipachikunanpaj yanapasqanta, aguantananpaj kallpata qosqanta ima. Johnqa payman jina Jehová kamachisninman kallpata qoyta atisqanta nin. Qantapis Jehová yanapasonqa llakiyniykita, manchachikuyniykita ima atipanaykipaj.

Chʼampaykunapi kaspa, imatachus Pablo nisqanta yuyarikuy, pay nerqa: “Sinchʼita sayallaychejpuni”, nispa. Chayrayku Jehovamanta mañakuy, hermanospa qayllallanpipuni kay, ancianospa yanapayninta maskʼay, Jehovatataj sirvillaypuni. Imaraykuchus Jehovaqa kunan, aswan qhepaman ima chʼampaykunata atipanaykipaj yanapasonqa.