ANTOINE SKALECKI wawa kashaspa qhoyapi (mina de carbón) llankʼarqa. Qhoyamanta carbón cargata orqhomunanpajtaj, 500 metrosta jina caballonwan yaykoj. Tatanqa qhoyapi cargawan japʼichikusqanrayku mana allinchu kasharqa, chayrayku familian qhoyapi sapa pʼunchay 9 horasta llankʼananpaj payta kacharqanku. Uj kutipitaj, paypis casi wañorqa qhoya chinkaykojtin.

Poloniamanta ashkha runas 1920 wata chaynejpi, 1930 wata chaynejpi Fraciaman riporqanku, chaypitaj wawasninku nacekorqanku. Antoinepis chaypi nacekorqa. ¿Imaraykú Poloniamanta runas Franciaman riporqanku? Polonia suyoqa Ñaupaj kaj Guerra Mundial tukukusqantawan, manaña waj suyoj makinpichu kasqanrayku runasmanta juntʼa kasharqa. Chantá chay guerrapi Fraciamanta qharis uj millón kuraj wañusqankurayku, qhoyaspi llankʼajkuna necesitakorqa. Chayrayku septiembre de 1919 watapi Franciamanta gobiernowan, Poloniamanta gobiernowan, Poloniamanta runas Franciaman yaykunankupaj uj tratota ruwarqanku. Kay 1931 watapajtaj Franciapi Poloniamanta kajkuna 507.800 jinaña karqanku. Chaykunamanta ashkhastaj Franciaj pata ladonpi kaj qhoyas chaynejpi tiyakorqanku.

Poloniamanta Franciaman ripojkunaqa ususninkuta, Diosmanta yachakuyta munasqankuta ima mana qonqarqankuchu. Antoineqa 90 watayojña, nintaj: “Abueloy Josephqa Bibliata may jatunpaj qhawaj, tatan yachachisqanrayku”, nispa. Poloniamanta runasqa, suyunkupi jina sapa domingo iglesiaman rinankupaj sumaj ropankuta churakoj kanku. Chaytaj Franciamanta kajkunata phiñachej, imaraykuchus paykunaqa llankʼayllapi yuyaj kanku.

Bibliamanta Yachaqajkunaqa 1904 watamantapacha sonqo kʼajaywan Nord-Pas-de-Calais nisqapi willasharqanku. Poloniamanta kajkunataj chaypi ñaupaj kutirayku paykunawan parlarerqanku. Kay 1915 watapi polaco qallupi The Watch Tower revista sapa killa llojsiyta qallarerqa, chay qallullapitaj The Golden Age nisqa revista 1925 watapi llojsiyta qallarerqa. Ashkha familiastaj chay revistasmanta, polaco qallupi El Arpa de Dios nisqa libromanta ima yachakorqanku.

Antoinej familianqa Bibliamanta Yachaqajkunamanta tionnejta yachakorqa, tionqa 1924 watapi ñaupaj kutirayku Bibliamanta Yachaqajkunaj tantakuyninkuman rerqa. Chay watallapitaj  Bibliamanta Yachaqajkunaqa Bruay-en-Artois nisqa llajtapi, ñaupaj kutirayku polaco qallupi jatun tantakuyta ruwarqanku. Chay tantakuy ruwakusqanmanta casi killanman, chay llajtallamantaj Bibliamanta Yachaqajkunaj centralninkumanta hermano Rutherford jamorqa. Chay hermanoqa tukuypaj umalliricherqa, chaytataj 2.000 runas uyarerqanku. Poloniamanta chay tantakuypi ashkhas kasqankurayku hermano Rutherford nerqa: “Jehová Franciaman pusamusorqachej cheqa kajta yachakunaykichejpaj. Kunantaj qankuna, wawasniykichej ima, kaypi kajkunaman Diosmanta yachachiychej. Diosmanta mayraj willana kashan, Jehovataj willajkunata rikhurichenqa”, nispa.

Jehovataj chaytapuni ruwarqa. Poloniamanta hermanosqa imaynatachus qhoyapi llankʼaj kanku, ajinallatataj Diospaj sonqo kʼajaywan llankʼaj kanku. Chay hermanosmanta wakenqa Poloniaman kutiporqanku, runasman willanankupaj. Chay kutipoj heramanosmanta Teofil Piaskowski, Szczepan Kosiak, Jan Zabuda ima karqanku.

Wakintaj Franciapi qhepakorqanku, Franciamanta hermanoswan khuskataj sonqo kʼajaywan willallarqankupuni. Kay 1926 watapi Sin-le-Noble nisqapi, Asamblea general ruwakushajtin, polacota parlajkuna 1.000 karqanku, francés qalluta parlajkunataj 300. Anuario 1929 nin: “Chay watapeqa 332 hermanos Diosman qokusqankuta rikucherqanku bautizakuspa”, nispa. Niraj Iskay kaj Guerra Mundial qallarishajtin Franciapi 84 qotuchakuykuna karqa, chaykunamantataj 32 polaco qallupi karqa.

Kay 1947 watapi Poloniamanta gobiernoqa, Franciaman ripojkunata Poloniaman kutipunankuta nerqa. Chayrayku ashkha hermanos Poloniaman kutiporqanku. Chay hermanos Franciapi willanankupaj kallpachakusqankoqa mana qhasichu karqa, imaraykuchus Franciapi chay wata, sapa pachaj willajkunaman, 10 willajkunapiwan yapakorqa. Chaymanta qhepamanpis, 1948-1950 watas chaynejpipis sapa pachaj willajkunaman, 20, 23, 40 willajkunapiwan yapakorqa. Chay mosoj willajkunata yanapanankupaj, Francia sucursalqa 1948 watapi, ñaupaj kutirayku qotuchakuykunata waturinankupaj 5 hermanosta ajllarqa. Paykunamanta 4 hermanostaj Poloniamanta karqanku, chay hermanosmanta ujnintaj Antoine Skalecki karqa.

Franciaman ripojkunaqa, imaynatachus qhoyapi llankʼarqanku jinallatataj Reinomanta willaspapis mayta llankʼarqanku. Franciamanta ashkha testigospa tatasninku, abuelosninku ima Poloniamanta kanku. Kunanpis Franciaman ripojkunamanta ashkhas Diosmanta yachakushanku. Wakin hermanos suyunkuman kutipunku, wakintaj mana. Jinapis tukuyninku Poloniamanta hermanos jina Reinomanta sonqo kʼajaywan willanku. (Franciapi waqaychakusqanmanta.)