MAMAY niwarqa: “¿Imaraykú ñaupa tatasninchejta mana yupaychayta munankichuri? ¿Mana reparanki paykunarayku kausashasqanchejta? ¿Manachu chaymanta agradecekunki? ¿Imaynatá ñaupa tatasninchejpa costumbresninkuta qhesachankiri? Ñaupa tatasninchejpa costumbresninkuta pisipaj qhawaspaqa, yupaychashasqanchej mana allinchu kasqanta nishanki”, nispa. Chayta niytawantaj waqayta qallarerqa.

Killas ñaupajta Jehovaj testigosnin mamayman Bibliamanta yachachinankuta nerqanku. Mamaytajrí mana munarqachu, astawanpis noqaman yachachinawankuta nerqa. Chantá familiaresniykoj costumbresninkuta niña ruwayta munajtiytaj phiñakorqa. Mamaytaqa tukuy ima niwasqanta kasukojpuni kani, chaywanpis chay kutipi mana kasukuyta aterqanichu, imaraykuchus Jehovata kusichiyta munarqani. Mana atikullajtinpis Jehová kallpata qowarqa.

Noqa, familiay ima, ashkha japoneses jina budistas karqayku. Jehovaj testigosninwan iskay killata jina yachakuspataj Bibliaj nisqan cheqapuni kasqanta repararqani. Cielopi uj cheqa Dios kasqanta yachaspataj, chay Diosmanta astawan yachakuyta munarqani. Mamaywantaj yachakusqaymanta parlarej kayku, domingosninpis tantakuykunaman rej kani. Bibliamanta astawan yachakuspataj mamayman nerqani niña costumbresniykuta ruwanayta. Mamaytaj niwarqa: “Familiapi ñaupa tatasninchejta pisipaj qhawajqa uj pʼenqay”, nispa. Chantapis Bibliamanta manaña yachakunayta, nitaj tantakuykunamanpis rinayta niwarqa. Ni jaykʼaj yuyarqanichu chayta ninawanta. Mamayqa niña ñaupajta jinachu karqa.

Tataypis mamay jinallataj yuyarqa. Efesios 6 capitulopi yachakorqani tatasniyta kasukunayta Jehová munasqanta. Munarqani familiaywan kusisqa kausakuyta, yuyarqanitaj tatasniyta uyarejtiy, paykunapis uyarinawankuta. Examenesniypaj wakichikunay kasqanrayku, kinsa killata tatasniy niwasqankuman jina ruwayta ajllarqani. Chaywanpis Jehovaman nerqani chay kinsa killa pasayta tantakuykunaman watejmanta rinayta.

Ajinata ajllasqayqa iskay imasrayku mana allinchu karqa. Kinsa killa pasasqantawan Jehovata sirviyta munanallaytapuni yuyarqani. Chaywanpis mana yuyasqayman jinachu karqa, Jehovawan allinpi kasqayqa llauchʼiyarqa. Chantapis tatasneyqa tukuy imata ruwallarqankupuni Jehovata niña sirvinaypaj.

Qotuchakuypeqa noqa jina chʼampaykunasniyoj hermanosta rejserqani. Chay hermanosqa niwarqanku Jehová kallpachanawanta, chʼampayniyta aguantajtiytaj, familiaypis Jehovamanta yachakunanta (Mat. 10:34-37). Noqaqa Jehovapi atienekuyta munasqayrayku, tukuy sonqo mana saykʼuspa mañakorqani.

Tatasneyqa mayta churanakuwarqanku. Mamayqa kutin kutita Bibliamanta amaña yachakunayta niwarqa. Imallatapis nejtiy chʼajwayllata qallarisqaykurayku chʼinlla qhepakoj kani, imaraykuchus iskayniyku cheqanta parlashasqaykuta yuyaj kayku. Kunanraj reparani mamay imatachus yuyasqanta, imatachus nisqanta entiendeyman karqa chayqa mana chʼajwaykumanchu karqa. Tatasneyqa wasillapi kanaypaj ashkha ruwanasta qowarqanku. Wakin kutistaj wasiman yaykojta mana saqewarqankuchu, nitaj mikhuytapis qowarqankuchu.

Mamayqa profesorniywan parlarqa Bibliamanta manaña yachakunaypaj. Profesorneyqa chʼampaykunasniykuman mana satʼikuyta munarqachu. Chantapis patronninmanñataj pusawarqa budismo religionlla cheqa kasqanta ninawanpaj. Familiaresniykumanpis telefononejta wajyarqa, waqaspataj yanapanawankuta nerqa. Chaytaj mayta phiñachiwarqa. Chaywanpis ancianosqa niwarqanku mamay sapa kuti wajkunaman Bibliamanta yachakushasqaymanta parlaspaqa, Diosmanta parlashasqanta.

Tatasneyqa uj sumaj llankʼayta tarinaypaj universidadman rinayta munarqanku. Chaymanta parlaspa phiñanakullajpuni kasqaykuraykutaj, imastachus ruwayta munasqaymanta cartasnejta paykunaman willarqani. Uj pʼunchaytaj tatayqa  may phiñasqa niwarqa: “Uj llankʼayta tarinaykita creenki chayqa, qʼayapacha tariwanki, mana chayri wasimanta ripunki”, nispa. Chayraykutaj Jehovamanta yanapata mañakorqani. Qʼayantinpachataj willaypi kashajtiy iskay hermanas wawasninkuman clasesta qospa llankʼanayta niwarqanku. Chay llankʼayta tarisqaymanta tatayqa mana kusisqachu kasharqa, niñataj parlapayawarqachu. Mamaytaj Jehovaj testigon kanaykimantaqa suwapis kawaj nispa niwaj.

Wakin kutisqa tapurikoj kani, tatasniy imatachus noqapaj munasqankuman churanakusqayta Jehová allinpajchus manachus qhawashasqanta. Diospa munakuyninmanta imatachus Biblia nisqanpi tʼukuriy, Diosmanta mañakuy ima, tatasniy munakuwasqankurayku imatapis ruwasqankuta entiendenaypaj yanapawarqa. Jehová yanapawasqanrayku allin yuyayniyoj kani, allin imastataj ajllayta yachakuni. Diosmanta willaspa kusiyta tarisqayrayku, precursora kayta munarqani.

Wakin hermanasqa precursora jina llankʼayta munasqayta yachaytawan, tatasniypa rabianku pasanankama suyarinayta niwarqanku. Chantá Jehovamanta yachayta mañakorqani, publicacionesninchejpi yuyaychaykunata maskʼarqani, imaraykuchus precursora kayta munasqaypitaj tʼukurerqani, unaytaña precursores kajkunawantaj parlarerqani. Chantá repararqani Jehovata kusichinaypaj imatachus ruwanay kasqanta. Yacharqanitaj precursora kanaypaj uj tiempota suyajtiypis, ichá tatasniy churanakunallawankutapuni.

Colegiota tukunaypaj uj watallaña faltashajtin, precursora jina llankʼayta qallarerqani. Unayninmantaj maypichus pisi willajkuna kanku chayman riyta munarqani. Tatasniy wasimanta mana ripunayta munasqankurayku, 20 watasniyoj kanaykama suyarqani. Chantá mamay mana anchata llakikunanpaj Japón suyoj ura ladonpi wakin familiaresniyku tiyakunku, chayman precursora jina llankʼanaypaj ripuyta munarqani, chayrayku sucursalta tapurerqani chay lugarman riyta atisqaytachus manachus.

Chay lugarpi ashkha runasta Jehovaj testigosninman tukunankupaj yanapasqaymanta mayta kusikorqani. Jehovapaj astawan llankʼanayrayku inglesta yachakuyta qallarerqani. Qotuchakuyniymanta iskay precursores especiales tukuy sonqo Jehovapaj llankʼasqankuta, wajkunata yanapasqankuta ima rikuspa, precursora especial kayta munarqani. Chay tiempopitaj iskay kutispi mamay sinchʼita onqoykorqa, iskaynin kutispitaj yanapanaypaj wasiyman kutiporqani. Chaytaj mamayta tʼukucherqa, chayraykutaj niña anchata noqawan phiñakojchu.

Qanchis watanmantaj, chay iskay precursores especialesmanta ujnin Atsushi sutiyoj uj cartata apachimuwarqa. Chay cartanejta casarakuyta yuyashasqanta niwarqa, tapuriwarqataj payta munakusqaytachus manachus. Noqaqa ni jaykʼaj paypi yuyarqanichu, nitaj yuyarqanichu paypis noqapi yuyananta. Killanmanraj payta astawan rejsiyta munasqayta nerqani. Repararqaykutaj iskayniyku kikin imasta ruwayta munasqaykuta. Iskayniyku Jehovapaj astawan llankʼayta munarqayku, chayrayku ima llankʼaytapis Diospa llajtanpi qowajtiyku ruwanaykuta nerqayku. Tiemponmantaj casarakorqayku. Mayta kusikorqani tatasniy, waj familiaresniy ima casamientoyman jamusqankumanta.

Precursores regulares jina llankʼashasqaykumanta pisi tiemponman qosayta wakin kutis wajyarej kanku qotuchakuykunata waturinanpaj. Pisi tiemponmantaj precursores especiales jina llankʼanaykupaj wajyarisqas karqayku, chantá qotuchakuykunata waturispa llankʼanaykupajñataj  wajyarisqas karqayku. Ñaupaj kutirayku qotuchakuykunata waturiyta tukusqaykutawan sucursalmanta wajyarimuwarqayku. Tapuriwarqaykutaj Nepal suyupi qotuchakuykunata waturispa llankʼayta munasqaykutachus manachus.

Chay chhika karuman ripunaykuta yachaspa imatachus tatasniy yuyanankumanta llakikorqani. Paykunawan telefononejta parlarejtiytaj tatay niwarqa chay lugar manchay kʼachitu kasqanta. Imaraykuchus uj semana ñaupajta ujnin amigon Nepal suyumanta uj librota jaywasqa, chay lugarta rejsiyta munasqanpitaj tʼukurisqa.

Nepalpi runasqa kʼachas kanku, paykunawan parlarispataj kusikoj kayku. Chantapis Bangladesh nisqapi qotuchakuykunata waturillarqaykutaj. Nepal suyoj qayllanpi kajtinpis, uj jina karqa. Chay lugarpitaj tukuy imaymanamanta Reinomanta willaj kayku. Phishqa watanmantaj watejmanta Japonman kachawarqayku, kunankamataj chaypi qotuchakuykunata waturispa llankʼashallaykupuni.

Bangladeshpi, Nepalpi, Japonpi ima Jehovapaj llankʼashaspa, payta astawan sumajta rejserqani. Chay suyuspi runasqa mana kikin costumbresniyojchu, yuyayniyojchu, ruwayniyojchu kanku. Sapa uj runa waj jina ruwaykunasniyoj kanku. Chaywanpis rikorqani Jehová sapa uj runamanta llakikusqanta, allinpaj qhawasqanta, yanapasqanta, bendecisqanta ima.

Jehovaman mayta agradecekuni payta rejsinaypaj, paypaj astawan llankʼanaypaj yanapawasqanmanta, uj kʼacha qosata qowasqanmanta ima. Jehovaqa sumaj imasta kausayniypi ajllanaypaj yanapawan, kunantaj paywan, familiaywan ima allinpi kani. Jehová yanapawasqanrayku mamaywan watejmanta sumaj amigas kayku. May agradecesqa kashani Jehovawan, mamaywan allinpi kasqaymanta.