Bibliamanta yachakusqankuqa kawsayninkuta tikrachirqa

¿Imaraykutaq juk runa motollapi puriyman, pukllayman, drogasta ukyayman ima qukusqanta saqispa Diospa Reinonmanta willananpaq tukuy tiemponta churayta akllarqa? ¿Imataq wak runata yanaparqa qullqirayku pukllayman qukusqanta saqispa juk llamkʼayta maskʼananpaq? ¿Imataq Jehovamanta sutʼinchaqjina uywasqa juk sipasta yanaparqa, Bibliap kamachiykunasninta pʼakisqanmanta pesachikuspa, Bibliap nisqanmanjina kawsayta qallarinanpaq? Imatachus paykuna kutichisqankuta qhawarina.

YACHANAPAQ

SUTIN: TERRENCE J. OʼBRIEN

WATASNIN: 57

SUYUN: AUSTRALIA

ÑAWPAQ KAWSAYNIN: DROGASTA UKYAQ, MOTOPI PURIYTAQ MAYTA GUSTAQ

ÑAWPAQ KAWSAYNIY: Brisbane jatun llaqtapi wiñakurqani, kay llaqtataq, Queenslandpa capitalnin (Australia). Familiaymanta tukuyniyku iglesia catolicaman riq kayku, chaywanpis niraq pusaq watayuq kachkaptiy manaña iglesiaman riqchu kayku, religionmantataq qunqapurqayku. Chantá 10 watayuq kachkaptiy, Costa de Oro nisqaman tiyakuq ripurqayku. Mama quchap kantunpi tiyakusqaykuraykutaq, waynayachkaspa mama quchapi sumaqta waytʼayta yachakurqani.

Chaywanpis mana kusisqachu kawsakurqani. Tatayqa, 8 watayuq kachkaptiy saqirpawarqayku. Mamaytaq wak runawan casarakurqa, chaymantapachataq padrastroy sapa kuti machaykuspa, mamaywan siminakuq. Juk chʼisi mamaywan padrastroywan sinchita siminakurqanku. Chay chʼisitaq camayman tiyaykuytawan, “maykʼaqllapis casarakuspa ni jaykʼaq warmiywan siminakusaqchu”, nispa nikusqayta yuyarikuni. Ajinata kawsakuspapis padrastroywan, mamaywan, phichqa hermanosniywan ima jukchasqas kawsakurqayku.

Waynallaraq kachkaptiy amigosniyqa, ni pita kasukuqchu kanku, cigarrosta pitaq kanku, alcoholta, drogasta ima ukyallaqtaq kanku, manataq ni imamanta phutikuqchu kanku. Llakikunapaqjina paykunajina kawsayta qallarirqani. Chantá achkha kutita motowan accidentakuspapis, motopi puriy gustallawaqpuni, chayrayku juk pʼunchay motoyman wicharispa Australiamanta tukuy llaqtasta riqsinaypaq ripurqani.

 Jaqay tiempopi mana imamanta dakuqchu kani. Chaywanpis Jallpʼantinpi achkha ñakʼariykuna kasqanpi, achkha runas mana imamanta dakusqankupi tʼukurispa ima, mayta llakikuq kani. Diosmanta, religionmanta, imaraykuchus achkha ñakʼariykuna kasqanta ima yachayta munarqani. Chayrayku iskay sacerdotesta wakin tapuykunata tapurirqani, manataq allinta kutichiyta atiwarqankuchu. Chantá wakin evangelistaswanñataq parlarirqani, manallataq sumaqta kutichiyta atiwarqankuchu. Chantá juk amigoy, Jehovamanta sutʼinchaq juk hermanota, Eddie sutiyuqta riqsichiwarqa. Tawa kutita paywan parlarirqani, chay kutispitaq Bibliawanpuni tapuykunasniyman kutichiwarqa. Ñawpaq kutillataraq paywan parlasqaypiqa, sumaq yachachiykunata yachakuchkasqayta repararqani. Chaywanpis chay kutipi, kawsayniyta mana tikrachinaychu kasqanta yuyarqani.

BIBLIAMANJINA KAWSAYNIYTA TIKRACHISQAY: Australiamanta wakin llaqtasta riqsichkaspa Jehovamanta sutʼinchaq wak hermanowanpis achkha kutista parlarillarqanitaq, chaywanpis Queensland llaqtaman kutipuytawan suqta killatapuni ni juk Jehovamanta sutʼinchaqwan parlarirqanichu.

Juk pʼunchay llamkʼayniymanta wasiyman ripuchkaspa, iskay runasta callepi purichkaqta rikurqani. Maletineswan purichkasqankurayku, allin pʼachallisqas kachkasqankurayku ima, Jehovamanta sutʼinchaqkuna kasqankuta yuyarqani. Paykunaman qayllaykuspataq Jehovamanta sutʼinchaqchus manachus kasqankuta tapurirqani, Jehovamanta sutʼinchaqkuna kasqankuta niwasqankutawankama paykunawan Bibliata estudiayta munasqayta nirqani. Chaymanta pisi pʼunchaykunaman tantakuyninkuman riyta qallarirqani, chantá 1973 watapi, Sydney llaqtapi juk jatun tantakuyta ruwasqankumanpis rillarqanitaq. Chaywanpis familiayqa, astawanraq mamayqa, Bibliamanta yachakuchkasqayta mana allinpaqchu qhawaq. Chayrayku manaña paykunawan Bibliata estudiarqanichu, nitaq tantakuyninkuman rirqaniñachu. Chaymantapacha juk watatapuni juk laya pukllayman qukurqani.

Tiempo pasasqanmanjina, Bibliamanta yachakuchkaspalla kusiyta tarisqayta reparakurqani. Chayrayku watiqmanta Jehovamanta sutʼinchaqkunata maskʼarqani, tantakuyninkumantaq riyta qallarirqani, chantá saqra ruwayman tanqawaq amigosniymanta karunchakurqani.

Jehovamanta sutʼinchaq juk kuraq hermanowan Bill sutiyuqwan Bibliata estudiayta qallarirqani. Payqa manchay kʼacha karqa, imallatapis sutʼita niq. Juk kuti imatachus niwasqanqa kawsayniyta tikranaypaq yanapawarqa. Chaypacha Jobpa kawsayninmanta ñawirisqaykutawan jinata niwarqa: “Chiqamantapuni Kuraq Supayqa, Job mana Diosta yupaychayta munasqanta nirqa. Chayta nispaqa, ¿Jobllamantachu llullakuspa jinata nirqa?” (Job 2:3-5). Chay tapuwasqanman kutichinaypaq, yuyarikusqaymanjina unay tiempomanta Diospa kamachisninpa sutisninkuta uqhariyta qallarirqani, chaywanpis Billqa kʼachamanta tapuchkallawarqapuni: “Arí, chantá, ¿pimantawantaq jinata nirqa?”, nispa. Mana tapuyninman kutichiyta atiptiytaq, Bill niwarqa: “Qammantapis kikillantataq nirqa”, nispa. Chayta uyarispataq mancharikurqani. Bibliamanta imatachus yachakuchkasqayqa, chiqa kasqanta yacharqani, chaywanpis chay kutipi imaraykuchus yachakusqaymanjina kawsanay kasqanta reparakurqani. Chaymanta tawa killanman bautizakurqani.

BENDICIONESTA JAPʼISQAY: Bibliap yuyaychaykunasninta manachus yachakuyman karqa chayqa, imachus ñuqamanta kanman karqa. Ichapis wakin amigosniyjina drogasta chayri alcoholta ukyayman qukuspa wañuyman karqa, chayri wakinjina qhariwarmi kawsayniypi mana kusisqachu kawsakuyman karqa.

Chaywanpis Bibliamanta yachakusqayrayku kusisqa kawsakuni. Iskay chunka phichqayuq  watataña Margaret warmiywan casarasqa kachkani, iskayniykutaq Australiapi Jehovamanta sutʼinchaqkunap sucursalninkupi llamkʼachkayku. Watas pasasqanmanjina iskayniyku Bibliamanta yachachispa, kawsayninkuta tikrachinankupaq achkha runasta yanaparqayku. Jinamanta achkha amigosta ruwakurqayku, chaytaq sunquchawan imaraykuchus familiaymanta ni mayqin Jehovata yupaychanchu. Margaret warmiyqa Jehovamanta sutʼinchaqjina uywakurqa. Paypa yanapayninwantaq 40 watas ñawpaqta imatachus ñuqa kikin nikusqayta juntʼarqani, imaraykuchus wakin kuti mana kikinta yuyaspapis ni jaykʼaq siminakurqaykuchu, Bibliap yuyaychasqanmanjina kawsakusqaykurayku.

YACHANAPAQ

SUTIN: MASAHIRO OKABAYASHI

WATASNIN: 39

SUYUN: JAPÓN

ÑAWPAQ KAWSAYNIN: QULLQIRAYKU PUKLLAQ

ÑAWPAQ KAWSAYNIY: Iwakura llaqtitamanta kani, kay llaqtitamantataq Nagoya llaqtamanqa trenpi rispa kimsa chunka minutosta rina. Tatasniy may kʼacha runas kasqankuta yuyarikuni. Chaywanpis aswan qhipaman tatay Japonpi achkha saqra runaswan khuska, pakayllamanta runasta wañuchiq, chʼawkiyaq ima kasqanta yacharqani. Chantapis sapa pʼunchay machaykuq. Chayrayku 20 watayuq kachkaptiy cirrosis unquywan unquykuspa wañupurqa.

Tatay Corea suyumanta kasqanrayku runasqa, pisipaq qhawawaq kayku. Chayrayku waynallaraq kachkaspa mayta ñakʼarirqani. Yachaywasiman yaykuspapis, wakin kutilla clasesman riq kani, juk watamantataq yachaywasimanta lluqsipurqani. Chaypachaqa policiaman achkha kutistaña apawasqankurayku, tatay coreano kasqanrayku ima, mana juk llamkʼayta tariyta atillaqchu kani. Mayta maskʼaytawanraq juk llamkʼayta tarirqani, chaywanpis chaki muqusniyta sinchita takaykukusqayrayku manaña llamkʼayta atirqanichu.

Qullqiyuq kanaypaq pachinko nisqa maquinapi qullqirayku pukllayta qallarirqani, kay maquinataq pinball nisqa maquinaman rikchʼakun. Chaypacha juk warmiwan mana casarakuspalla tiyakuchkarqani. Paytaq juk sumaq llamkʼayta tarinayta, paywan casarakunayta ima munarqa. Chaywanpis ñuqaqa pachinko nisqa maquinapi pukllaspa achkha qullqita japʼiq kani, manataq imaynatachus kawsachkasqayta tikrachiyta munarqanichu.

BIBLIAMANJINA KAWSAYNIYTA TIKRACHISQAY: Juk pʼunchay, Jehovamanta sutʼinchaq juk hermano wasiyman jamurqa, La vida... ¿cómo se presentó aquí? ¿Por evolución, o por creación?, nisqa librotataq saqiwarqa. Ni jaykʼaq chayta tapurikurqanichu. Chaywanpis chay librota ñawiriyta tukuytawan Bibliamanta astawan yachakuyta munarqani. Wañupuspa maymanchus ripusqanchikta yachaytapuni munarqani. Bibliapi tukuy tapuykunasniyman kutichiykunata tarisqayqa, wak imasta astawan sutʼita entiendenaypaq yanapawarqa.

 Chay ratopacha Bibliap nisqanmanjina kawsakunay kasqanta reparakurqani. Chayrayku tantasqalla kachkarqani chay sipaswan casarakurqani, cigarrota pitayta saqipurqani, teñisqa chukchayta kʼutuchikurqani, maychus kaqta pʼachallikuyta qallarirqani, qullqirayku pukllaytapis saqipullarqanitaq.

Kawsayniyta tikrachiyta mana atillarqanichu. Sutʼincharinapaq, cigarrota pitayta sapallaymanta mana saqiyta atillarqanichu, chaywanpis Diosmanta mañakuspa, paypi atienekuspataq saqiyta atirqani. Chantá pachinkopi pukllayta saqiytawankama juk llamkʼayta tarisqaypiqa, sinchita llamkʼanay karqa, manataq pachinkopi pukllachkaspajinachu achkha qullqita japʼiq kani. Chaymantataq phutikuq kani. Chaywanpis Filipenses 4:6, 7 pʼitikuna nisqanqa, mayta yanapawarqa, chaypitaq nin: “Ama imamantapis phutikuychejchu, astawanqa Diosmanta mañakuspaqa, imatachus munasqaykichejta mañakuychej, tukuy imamanta graciasta qospallapuni. Chantá Diosqa chay mana unanchay atina sonqo tiyaykuyninta sonqosniykichejman churanqa, chaytaj sonqoykichejta, yuyayniykichejtawan waqaychanqa Cristo Jesuspi”. ¡Achkha kutispi kay pʼitikuna imatachus nisqanqa, chiqapuni kasqanta rikurqani!

BENDICIONESTA JAPʼISQAY: Qallariypiqa warmiy mana munaqchu Jehovamanta sutʼinchaqkunawan Bibliamanta yachakunayta. Chaywanpis Bibliap yuyaychaykunasnin kawsayniyta tikrachinaypaq yanapawasqanta rikuspa, paypis Bibliamanta yachakuyta, ñuqawan khuskataq Jehovamanta sutʼinchaqkunap tantakuyninkuman riyta qallarirqa. Kunantaq iskayniyku Jehovamanta sutʼinchaq kayku. Iskayniyku Diospaq llamkʼachkasqaykuqa, ñuqapaq may sumaq bendición.

Niraq Bibliamanta yachakuchkaspa kusisqa kawsakuchkasqayta yuyaq kani. Chaywanpis kunanqa Biblia nisqanmanjina kawsaspalla, chiqamanta kusisqas kawsakuyta atisqanchikta yachani, wakin kuti Bibliap nisqanmanjina kawsay mana atikuptillanpis.

YACHANAPAQ

SUTIN: ELIZABETH JANE SCHOFIELD

WATASNIN: 35

SUYUN: REINO UNIDO

ÑAWPAQ KAWSAYNIN: SAPA SEMANA TUKUKUYPI MACHAYKUNA FIESTASMAN RIQ

ÑAWPAQ KAWSAYNIY: Hardgate llaqtitapi wiñakurqani, kay llaqtitataq Glasgow llaqtap qayllitanpi kachkan (Escocia). Qanchis watitayuq kachkaptiy mamayqa, Jehovamanta sutʼinchaqjina bautizakurqa, Bibliamantataq yachachiyta qallariwarqa. Chaywanpis 17 watayuq kachkaspa yachaywasimanta amigasniywan khuska kayta, tusunaypaq localesman riyta, heavy metal sutichasqa takinata uyariyta, alcoholta ukyayta imalla munaq kani. Sapa semana tukukuypi fiestasman riyllapi tʼukuriq kani, Bibliamanta astawan yachakuypitaq mana tʼukurillaqpischu kani. Chaywanpis pisi watasman kawsayniy tikrakurqa.

 Iskay chunka jukniyuq watayuq kachkaspa Irlanda del Norte nisqa suyuman familiaresniyta waturikuq rirqani. Chaypi kachkaspataq evangelistasta desfilachkaqta rikurqani. Evangelistaswan, catolicoswan mayta chiqninakusqankuta rikusqayqa, mancharichiwarqa, imatachus kawsayniywan ruwachkasqaypi tʼukurinaypaqtaq yanapawarqa. Chantá imatachus mamay Bibliamanta yachachiwasqanpi tʼukurirqani, yuyarikurqanitaq Jehová Dios kamachiykunasninta pakʼiqkunata mana allinpaqchu qhawasqanta. Chaymantaraq reparakurqani munayniymanjinalla kawsachkasqayta manataq Diospa munayninmanjinachu. Chayrayku Escociaman kutipuytawan Bibliap yachachiykunasninta astawan ukhunchanayta nikurqani.

BIBLIAMANJINA KAWSAYNIYTA TIKRACHISQAY: Maypichus wiñakurqani chay llaqtitapi Jehovamanta sutʼinchaqkunap tantakuyninkuman watiqmanta risqaypiqa, mancharisqajina kachkarqani. Chaywanpis tukuyninku watiqmanta rikuwaspa kusikurqanku. Biblia nisqanmanjina kawsanaypaq kallpachakuchkasqayta rikuspa, juk hermanaqa kʼachamanta yanapawarqa. Ñuqamanta mayta dakusqanqa, Diospa llaqtanmanta juknin kanaypaq yanapawarqa. Pikunawanchus machaykuna fiestasman riq kani paykunaqa, mayta waqyarimuwaq kanku paykunawan rinaypaq, chaywanpis ñuqaqa Biblia yuyaychasqanmanjina kawsayta munasqayta sutʼitapuni niq kani. Tiempo pasasqanmanjinataq manaña waqyamuwaqchu kanku.

Unayqa, Biblia kamachiykunallamanta juntʼa kachkasqanta yuyaq kani. Chaywanpis watiqmanta Bibliata ñawirispaqa, unay tiempo Diospa kamachisninpis ñuqajina wakin llakiykunapi rikukusqankuta, pantaq runas kasqankuta ima repararqani. Wakinkunaqa ñuqajina juchallikuspa Jehová Diosta wasanchasqanku, chaywanpis juchallikusqankumanta tukuy sunqu pesachikuptinku Diosqa paykunata perdonarqa. Kaytaq Jehová Diosta kusichinaypaq mayta kallpachakuptiy Jehová perdonawanpi atienekunaypaq yanapawarqa.

Chantá mamay, Diosta yupaychayta mana saqisqanqa, yanapallawarqataq. Diosmanta karunchakuptiypis payqa Diosman chiqa sunqullapuni karqa. Chaytaq Jehová Diosta yupaychay imamantapis aswan allin kasqanta reparachiwarqa. Wawallaraq kachkaspa wasimanta wasi willaq riyqa manapuni gustawaqchu, ni jaykʼaq yuyarqanichu Diospa Reinonmanta achkha horasta willaspa kanayta. Chaywanpis bautizakusqaymanta pisi tiempoman, llamkʼayniyta saqispa, khuskan pʼunchayllataña llamkʼanaypaq wak llamkʼayta maskʼakuytawan, Diospa Reinonmanta astawan horasta willayta qallarirqani. Chantapis Jesús kay Mateo 6:31-33 pʼitikunapi nisqan chiqachus manachus kasqanta yachayta munarqani, imaraykuchus pay nirqa: “Ama phutikuychejchu: Imatataj mikhusun? Imatataj ujyasun? Chayrí imawantaj pʼachallikusun? nispa. [...] Janaj pacha Dios Tataykichejrí yachanña chay tukuy imamanta pisichikusqaykichejta. Ñawpajtaqa Diospa reinonta, cheqan kaynintawan maskʼaychej, chay tukuy imatataj yapata jina Dios qosonqachej”, nispa.

BENDICIONESTA JAPʼISQAY: Unayqa, sapa semana tukukuyta fiestasman rispapis, mana juntʼa sunquchu kaq kani. Qhasipaq kawsachkasqaytataq yuyaq kani. Chaywanpis kunanqa Jehová Diosta servinaypaq tukuy tiempoyta churaspa juntʼa sunqu, kusisqa ima kawsakuni. Kunanqa casarasqaña kani, qusaywantaq sapa semana qutuchakuykunata waturikuq riyku hermanosta kallpachanaykupaq. Kay llamkʼayta ruwachkasqaykutaq ñuqapaq juk sumaq bendición. Jehová Diosman may agradecesqa kachkani watiqmanta payman qayllaykunaypaq yanapawasqanmanta.